ನವದೆಹಲಿ: ಟಿ20 ವಿಶ್ವಕಪ್ ಎತ್ತಿ ಹಿಡಿಯುವ ಮೂಲಕ 17 ವರ್ಷಗಳ ಬಳಿಕ ಟೀಮ್ ಇಂಡಿಯಾ ಮತ್ತೆ ವಿಶ್ವ ಚಾಂಪಿಯನ್ ಆಗಿದೆ. ಈ ಮೆಗಾಟೂರ್ನಮೆಂಟ್ನಲ್ಲಿ ಭಾರತ ತಂಡವು ತನ್ನ ಒಟ್ಟಾರೆ ಪ್ರದರ್ಶನದಿಂದ ಎಲ್ಲರ ಗಮನ ಸೆಳೆಯಿತು. ಬ್ಯಾಟಿಂಗ್, ಬೌಲಿಂಗ್ ಮತ್ತು ಫೀಲ್ಡಿಂಗ್ ಎಲ್ಲದರಲ್ಲೂ ಮುಂಚಿತು. ಪ್ರತಿಯೊಬ್ಬ ಆಟಗಾರನು ಕೂಡ ಪರಿಸ್ಥಿತಿಗಳಿಗೆ ಅನುಗುಣವಾಗಿ ಅದ್ಭುತ ಪ್ರದರ್ಶನ ನೀಡಿದರು.
ಆದರೆ, ಈ ಬಾರಿಯ ವಿಶ್ವಕಪ್ನಲ್ಲಿ ಆರಂಭಿಕರಾಗಿ ಕಣಕ್ಕೆ ಇಳಿದಿದ್ದ ವಿರಾಟ್ ಕೊಹ್ಲಿ, ಲೀಗ್, ಸೂಪರ್ 8 ಮತ್ತು ಸೆಮಿಫೈನಲ್ನಲ್ಲಿ ದಯನೀಯವಾಗಿ ವಿಫಲರಾಗಿದರು. ಆದರೆ, ನಿರ್ಣಾಯಕ ಫೈನಲ್ ಪಂದ್ಯದಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿ ತಂಡಕ್ಕೆ ಪ್ರಶಸ್ತಿ ತಂದುಕೊಟ್ಟರು. ಅಂತಿಮ ಪಂದ್ಯದಲ್ಲಿ 76 ರನ್ ಗಳಿಸಿ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು. ಅಲ್ಲದೆ, ಪ್ಲೇಯರ್ ಆಫ್ ದಿ ಅವಾರ್ಡ್ ಕೂಡ ಪಡೆದರು. ಆದರೆ, ಕೊಹ್ಲಿ ಈ ಪ್ರಶಸ್ತಿಗೆ ಅರ್ಹರಲ್ಲ ಎಂದು ಟೀಮ್ ಇಂಡಿಯಾದ ಮಾಜಿ ಕ್ರಿಕೆಟಿಗ ಸಂಜಯ್ ಮಂಜ್ರೇಕರ್ ಆಘಾತಕಾರಿ ಕಾಮೆಂಟ್ ಮಾಡಿದ್ದಾರೆ.
ಪಂದ್ಯದಲ್ಲಿ ಬಳಿಕ ಇಎಸ್ಪಿಎನ್ಕ್ರಿಕ್ಇನ್ಫೋ ಶೋನಲ್ಲಿ ಮಾತನಾಡಿದ ಭಾರತದ ಮಾಜಿ ಕ್ರಿಕೆಟಿಗ ಮತ್ತು ಖ್ಯಾತ ವೀಕ್ಷಕ ವಿವರಣೆಗಾರ ಸಂಜಯ್ ಮಂಜ್ರೇಕರ್, ಟಿ20 ವಿಶ್ವಕಪ್ ಫೈನಲ್ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಅವರಿಗೆ ಪ್ಲೇಯರ್ ಆಫ್ ದಿ ಅವಾರ್ಡ್ ಪ್ರಶಸ್ತಿ ನೀಡಿದ್ದನ್ನು ಟೀಕಿಸಿದರು. ವಿರಾಟ್ ಅವರು ಈ ಪ್ರಶಸ್ತಿಗೆ ಅರ್ಹರಲ್ಲ ಎಂದು ಅನಿರೀಕ್ಷಿತ ಕಾಮೆಂಟ್ಗಳನ್ನು ಮಾಡಿದರು.
ಕೊಹ್ಲಿ ನಿಧಾನಗತಿಯ ಬ್ಯಾಟಿಂಗ್ನಿಂದಾಗಿಯೇ ಪಂದ್ಯದ ಗೆಲುವು ತ್ರಾಸದಾಯಕವಾಗಿತ್ತು. ಒಂದು ಹಂತದಲ್ಲಿ ವಿಜಯಲಕ್ಷ್ಮೀ ದಕ್ಷಿಣ ಆಫ್ರಿಕಾ ಕಡೆ ವಾಲಿದ್ದಳು. ಅದಕ್ಕೆ ಕಾರಣ ಕೊಹ್ಲಿಯ ಮಂದಗತಿ ಬ್ಯಾಟಿಂಗ್ ಎಂದು ಮಂಜ್ರೇಕರ್ ಟೀಕಿಸಿದರು. ಒಂದು ವೇಳೆ ಟೀಮ್ ಇಂಡಿಯಾ ಫೈನಲ್ನಲ್ಲಿ ಸೋತಿದ್ದರೆ ವಿರಾಟ್ ಕೊಹ್ಲಿ ಟೀಕೆಗಳನ್ನು ಎದುರಿಸುವುದು ಮಾತ್ರವಲ್ಲದೆ ವಿಲನ್ ಕೂಡ ಆಗುತ್ತಿದ್ದರು ಎಂದರು.
ಫೈನಲ್ ಪಂದ್ಯದಲ್ಲಿ ಟೀಮ್ ಇಂಡಿಯಾದ ಬ್ಯಾಟಿಂಗ್ ಉತ್ತಮವಾಗಿತ್ತು. ಆದರೆ ವಿರಾಟ್ ಕೊಹ್ಲಿ ನಿಧಾನಗತಿಯ ಬ್ಯಾಟಿಂಗ್ನಿಂದ ಪಂದ್ಯ ರೋಚಕವಾಯಿತು. ಕೊಹ್ಲಿಯ ಬ್ಯಾಟಿಂಗ್ನಿಂದ ಹಾರ್ದಿಕ್ ಪಾಂಡ್ಯರಂತಹ ಬಿಗ್ ಹಿಟ್ಟರ್ಗಳು ಕಡಿಮೆ ಎಸೆತಗಳನ್ನು ಆಡಬೇಕಾಯಿತು. ಆದರೆ ಪ್ಲೇಯರ್ ಆಫ್ ದಿ ಮ್ಯಾಚ್ ಪ್ರಶಸ್ತಿಯನ್ನು ಬೌಲರ್ಗೆ ಕೊಡಬೇಕಾಯಿತು. ಏಕೆಂದರೆ, ಸೋಲಿನ ದವಡೆಯಲ್ಲಿದ್ದ ಪಂದ್ಯವನ್ನು ಭಾರತಕ್ಕೆ ದಕ್ಕುವಂತೆ ಮಾಡಿದ್ದು ಬೌಲರ್ಗಳು. ಹೀಗಾಗಿ ಕೊಹ್ಲಿ ಪಂದ್ಯದ ಆಟಗಾರ ಪ್ರಶಸ್ತಿಗೆ ಅನರ್ಹರು ಎಂದು ಮಂಜ್ರೇಕರ್ ಹೇಳಿದರು.
ಆದರೆ, ಮಂಜ್ರೇಕರ್ ಮಾತನ್ನು ಜಿಂಬಾಂಬ್ವೆ ದಿಗ್ಗಜ ಆ್ಯಂಡಿ ಫ್ಲವರ್ ನಿರಾಕರಿಸಿದರು. ಕೆರಿಬಿಯನ್ ಪಿಚ್ಗಳಲ್ಲಿ 176 ರನ್ ಒಂದು ದೊಡ್ಡ ಮೊತ್ತವೆಂದರು. ಒಂದು ವೇಳೆ ಭಾರತ ಆ ಮೊತ್ತವನ್ನು ದಾಖಲಿಸದೇ ಹೋಗಿದ್ದರೆ ಮತ್ತೆ ಎಲ್ಲರು ಕೊಹ್ಲಿಯನ್ನು ಟೀಕಿಸುತ್ತಿದ್ದರು ಎಂದು ಆ್ಯಂಡಿ ಫ್ಲವರ್ ಕೊಹ್ಲಿ ಪರ ಬ್ಯಾಟ್ ಬೀಸಿದರು. (ಏಜೆನ್ಸೀಸ್)
ಇದನ್ನು ಸಾಧಿಸಲೇಬೇಕು… ಕೋಚ್ ಹುದ್ದೆ ತೊರೆಯುವಾಗ ಕೊಹ್ಲಿಗೆ ಮತ್ತೊಂದು ಟಾರ್ಗೆಟ್ ನೀಡಿದ ದ್ರಾವಿಡ್!
ವಿಚ್ಛೇದಿತ ಖ್ಯಾತ ಯೂಟ್ಯೂಬರ್ ಜತೆ ನಟಿ ಸುನೈನಾ ನಿಶ್ಚಿತಾರ್ಥ! ನಿಗೂಢ ಫೋಟೋ ರಹಸ್ಯ ಬಯಲು