ಬೆಂಗಳೂರು: ಯುವ ಜನರೇ ಎಚ್ಚರ! ಉದ್ಯೋಗ ಕೊಡಿಸುವುದಾಗಿ ಆಮಿಷದ ಬಲೆ ಬೀಸುವ ವಂಚಕ ಜಾಲ ಸಕ್ರಿಯವಾಗಿದೆ ಜೋಕೆ. ನಿತ್ಯ ಒಂದಿಲ್ಲೊಂದು ವಂಚನೆಯ ಸುದ್ದಿಗಳನ್ನು ನಾವು ಕೇಳುತ್ತಲೇ ಇರುತ್ತೇವೆ. ಇದೀಗ ಸಬ್ ರಿಜಿಸ್ಟ್ರಾರ್ ಹುದ್ದೆ ಕೊಡಿಸುವುದಾಗಿ ಯುವಕನೊಬ್ಬನಿಗೆ ಆಮಿಷವೊಡ್ಡಿದ ವಂಚಕರಿಬ್ಬರು ಆತನಿಂದ ಬರೋಬ್ಬರಿ 36 ಲಕ್ಷ ರೂಪಾಯಿ ಪಡೆದು ಮೋಸ ಮಾಡಿರುವ ಪ್ರಕರಣ ಬೆಳಕಿಗೆ ಬಂದಿದೆ.
ವಂಚಕರ ಬಲೆಗೆ ಬಿದ್ದ ಮರಿಯಪ್ಪನಪಾಳ್ಯದ ಪಿ.ಮಹೇಶ್ ಹಣ ಕಳೆದುಕೊಂಡಿದ್ದು, ಈ ಬಗ್ಗೆ ಜ್ಞಾನಭಾರತಿ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.
‘ಸ್ಪರ್ಧಾತ್ಮಕ ಪರೀಕ್ಷೆಯ ತರಬೇತಿ ಕೇಂದ್ರ ನಡೆಸುತ್ತಿದ್ದ ಬಂದ್ರಿನಾಥ್ ಎಂಬುವವರು 2017ರಲ್ಲಿ ನನಗೆ ಪರಿಚಯವಾದರು. ಈ ವೇಳೆ 2016ರಲ್ಲಿ ಕೆಪಿಎಸ್ಸಿ ಕರೆ ಮಾಡಿದ್ದ ಸಬ್ ರಿಜಿಸ್ಟ್ರಾರ್ ಹುದ್ದೆಗೆ ಪರೀಕ್ಷೆ ಬರೆದಿರುವುದಾಗಿ ಮಾಹಿತಿ ಹಂಚಿಕೊಂಡಿದ್ದೆ. ಆಗ ಬಂದ್ರಿನಾಥ್, 36 ಲಕ್ಷ ರೂ. ಕೊಟ್ಟರೇ ಕೆಲಸ ಕೊಡಿಸುವುದಾಗಿ ಆಮಿಷವೊಡ್ಡಿದ್ದರು. ಅದಕ್ಕೆ ಒಪ್ಪಿ 36 ಲಕ್ಷ ರೂ.ಅನ್ನು ಬಂದ್ರಿನಾಥ್ ಮತ್ತು ಪಲ್ಲವಿ ಎಂಬಾಕೆಗೆ ಹಂತ ಹಂತವಾಗಿ ಪಾವತಿ ಮಾಡಿದ್ದೆ. ಆದರೆ, ಅಂತಿಮ ಆಯ್ಕೆ ಪಟ್ಟಿಯಲ್ಲಿ ನನ್ನ ಹೆಸರು ಬರಲಿಲ್ಲ. ಕೇಳಿದಾಗ ಸಬೂಬು ಹೇಳಿಕೊಂಡು ಕಾಲ ಮುಂದೂಡಿದ್ದರು. ಹಣ ವಾಪಸ್ ಕೊಡುವಂತೆ ಒತ್ತಾಯ ಮಾಡಿದಾಗ 6 ಲಕ್ಷ ರೂ. ಕೊಟ್ಟು ಸುಮ್ಮನಾಗಿದ್ದಾರೆ. ಉಳಿಕೆ 30 ಲಕ್ಷ ರೂ. ಹಿಂತಿರುಗಿಸಿಲ್ಲ. ಹಣ ಕೇಳಿದಾಗ ಪ್ರಾಣ ಬೆದರಿಕೆ ಹಾಕುತ್ತಿದ್ದಾರೆ’ ಎಂದು ಮಹೇಶ್ ದೂರಿನಲ್ಲಿ ವಿವರಿಸಿದ್ದಾರೆ.
‘ಆರೋಪಿಗಳಾದ ಬದ್ರಿನಾಥ್ ಮತ್ತು ಪಲ್ಲವಿ ವಿರುದ್ಧ ಕಾನೂನು ಕ್ರಮ ತೆಗೆದುಕೊಳ್ಳಬೇಕು’ ಎಂದು ಮಹೇಶ್ ಮನವಿ ಮಾಡಿದ್ದಾರೆ. ಮಹೇಶ್ ನೀಡಿದ ದೂರಿನ ಮೇರೆಗೆ ಡಿ.ಬದ್ರಿನಾಥ್ ಮತ್ತು ಪಲ್ಲವಿ ವಿರುದ್ಧ ಎಫ್ಐಆರ್ ದಾಖಲಿಸಿ ತನಿಖೆ ಕೈಗೊಂಡಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.
ನನ್ನ ಮಗನನ್ನು ಅವರ ಮನೆಯಲ್ಲೇ ಕೂರಿಸಿಕೊಳ್ಳಲಿ… ನಮಗೆ ಊಟ ಕೊಟ್ಟರೆ ಸಾಕೆಂದ ಡಿಕೆಶಿ ತಾಯಿ
ಬೆಳಗ್ಗೆ ಮನೆಯಲ್ಲಿದ್ದ ಬಾಲಕ ಮಧ್ಯಾಹ್ನ ಪೊದೆಯಲ್ಲಿ ಶವವಾಗಿ ಬಿದ್ದಿದ್ದ !
ಬಂಧನ ಭೀತಿಯಲ್ಲಿ ತನಗೆ ಕರೊನಾ ಇದೆಯೆಂದು ಅನುಶ್ರೀ ಡ್ರಾಮ ಮಾಡ್ತಾರಂತೆ!