ಕೊಚ್ಚಿ: ನಿಷೇಧಿತ ಪಾಪ್ಯುಲರ್ ಫ್ರಂಟ್ ಆಫ್ ಇಂಡಿಯಾ (ಪಿಎಫ್ಐ) 2047ರ ಹೊತ್ತಿಗೆ ಭಾರತದಾದ್ಯಂತ ಇಸ್ಲಾಮಿಕ್ ಆಡಳಿತ ಜಾರಿಗೆ ತರುವ ಗುರಿ ಹೊಂದಿತ್ತು ಎಂದು ರಾಷ್ಟ್ರೀಯ ತನಿಖಾ ಸಂಸ್ಥೆ (ಎನ್ಐಎ) ಹೇಳಿದೆ.
‘ಪಾಲಕ್ಕಾಡ್ನ ಆರ್ಎಸ್ಎಸ್ ನಾಯಕ ಶ್ರೀನಿವಾಸನ್ ಕೊಲೆಯು ಪಿಎಫ್ಐನ ಈ ಗುರಿಯ ಭಾಗವಾಗಿತ್ತು’ ಎಂದು ಕೇರಳ ಹೈಕೋರ್ಟ್ಗೆ ಇತ್ತೀಚೆಗೆ ಸಲ್ಲಿಸಿರುವ ವರದಿಯಲ್ಲಿ ಎನ್ಐಎ ತಿಳಿಸಿದೆ. 2022ರ ಏ. 16ರಂದು ಶ್ರೀನಿವಾಸನ್ ಕೊಲೆ ನಡೆದಿತ್ತು. ಆರೋಪಿಗಳ ಜಾಮೀನು ಅರ್ಜಿಗಳನ್ನು ಹೈಕೋರ್ಟ್ ವಿಚಾರಣೆ ನಡೆಸುತ್ತಿದೆ.
‘15ನೇ ಆರೋಪಿ ಆಗಿರುವ ಮುಹಮ್ಮದ್ ಮುಬಾರಕ್ನ ಫೋನ್ನಲ್ಲಿ ‘ಮಿಷನ್ 2047’ ಕುರಿತ ಧ್ವನಿಸಂಭಾಷಣೆಯ ಕ್ಲಿಪ್ ದೊರಕಿದೆ. ಎರಡನೇ ಆರೋಪಿ ಅಶ್ರಫ್ ಅಲಿಯಾಸ್ ಮೌಲ್ವಿ ಪಿಎಫ್ಐನ ಶಿಕ್ಷಣ ವಿಭಾಗದ ಮುಖ್ಯಸ್ಥನಾಗಿದ್ದು, ಐಸಿಸ್ನಂತಹ ಉಗ್ರಗಾಮಿ ಸಂಘಟನೆಗಳಿಗೆ ಯುವಕರನ್ನು ಸೇರಿಸುವ ಕಾರ್ಯದಲ್ಲಿ ನಿರತನಾಗಿದ್ದ. ಬಂಧಿತರೆಲ್ಲರೂ ಪಿಎಫ್ಐನ ಉಗ್ರ ಸಂಘಟನೆಗಾಗಿ ಕೆಲಸ ಮಾಡುತ್ತಿದ್ದರು. ಆರ್ಯ ಸಮಾಜ ಮತ್ತಿತರ ಬೇರೆ ಧರ್ಮ-ಸಮುದಾಯದ ಸಂಘಟನೆಗಳ ಸದಸ್ಯರ ಮಾಹಿತಿ ಸಂಗ್ರಹಿಸುವಲ್ಲಿ ನಿರತರಾಗಿದ್ದರು. ತಿರುವನಂತಪುರಂ ಶಿಕ್ಷಣ ಸೇವಾ ಟ್ರಸ್ಟ್ ಮತ್ತು ಪೆರಿಯಾರ್ ವ್ಯಾಲಿ ಟ್ರಸ್ಟ್ನ ಕಚೇರಿಗಳಲ್ಲಿ ಪಿಎಫ್ಐ ಕಾರ್ಯಕರ್ತರಿಗೆ ಶಸ್ತ್ರಾಸ್ತ್ರ ತರಬೇತಿ ಕೊಡಿಸುತ್ತಿದ್ದರು. ಸ್ಪೋಟಕಗಳನ್ನು ಸಂಗ್ರಹಿಸಿಡುತ್ತಿದ್ದರು’ ಎಂದು ಎನ್ಐಎ ತನ್ನ ವರದಿಯಲ್ಲಿ ಹೇಳಿದೆ.
ಹಿಂದು ಸಮಾಜದ ಪ್ರಮುಖ ನಾಯಕರನ್ನು ಕೊಲ್ಲುವ ಮೂಲಕ ಆ ಧರ್ಮದವರಲ್ಲಿ ಭಯ ಉಂಟು ಮಾಡುವುದು ಇವರ ಉದ್ದೇಶವಾಗಿತ್ತು. ಹಿಂದುಗಳನ್ನು ಕಾಫಿರರು (ಇಸ್ಲಾಂನಲ್ಲಿ ನಂಬಿಕೆ ಇಲ್ಲದವರು) ಎಂದು ಬಣ್ಣಿಸಿರುವ ದಾಖಲೆಗಳು, ಭಾರತದಲ್ಲಿ ಇಸ್ಲಾಮಿಕ್ ಆಡಳಿತ ತರುವ ಕುರಿತ ಸೋಷಿಯಲ್ ಮೀಡಿಯಾ ಪೋಸ್ಟ್ಗಳು ಬಂಧಿತರ ಬಳಿ ದೊರೆತಿವೆ ಎಂದು ಎನ್ಐಎ ಹೇಳಿದೆ.
ಹಿಂದುಗಳ ಕೊಲೆಗೆ ಕುಮ್ಮಕ್ಕು: ಶ್ರೀನಿವಾಸನ್ ಕೊಲೆಯಲ್ಲಿ 51 ಜನರ ಪಾತ್ರ ಇರುವುದನ್ನು ಗುರುತಿಸಿದ್ದ ಪೊಲೀಸರು ಆ ಪೈಕಿ 44 ಜನರನ್ನು ಬಂಧಿಸಿದ್ದರು. ಅದರಲ್ಲಿ ಒಬ್ಬ ನಂತರ ಮೃತಪಟ್ಟಿದ್ದಾನೆ, ಏಳು ಜನರು ನಾಪತ್ತೆಯಾಗಿದ್ದಾರೆ. ನೆಜಿಮಾನ್ ಎಂಬ ಆರೋಪಿ ಪ್ರಚೋದನಕಾರಿ ಭಾಷಣಗಳ ವಿಡಿಯೋ ಕ್ಲಿಪ್ಗಳನ್ನು, ಇತರ ಧರ್ಮದವರಿಗೆ ಬೆದರಿಕೆ ಹಾಕುವ ಪೋಸ್ಟ್ಗಳನ್ನು ಶೇರ್ ಮಾಡುತ್ತಿದ್ದ. ಹಿಂಸಾತ್ಮಕ ಧರ್ಮಯುದ್ಧದ ವಿಚಾರಧಾರೆಯನ್ನು ಮತ್ತೊಬ್ಬ ಆರೋಪಿ ಸಿ.ಟಿ. ಸುಲೇಮಾನ್ ಪ್ರಸಾರ ಮಾಡುತ್ತಿದ್ದ. ‘ಮಿಷನ್ 2047’ಕ್ಕೆ ಪೂರಕವಾಗಿ ಇತರ ಧರ್ಮದವರ ಕೊಲೆ ಮಾಡಲು ಪಿಎಫ್ಐ ಕಾರ್ಯಕರ್ತರಿಗೆ ಕುಮ್ಮಕ್ಕು ಕೊಡುತ್ತಿದ್ದ ಎಂದು ಎನ್ಐಎ ಹೇಳಿದೆ.