ಕೆಲವೇ ಗಂಟೆಗಳಲ್ಲಿ, ಪ್ರಿಪ್ಯಾಟ್ ನಿವಾಸಿಗಳಿಗೆ ತಮ್ಮ ಗಂಟುಮೂಟೆಯನ್ನು ಕಟ್ಟಿಕೊಂಡು ನಗರವನ್ನು ತೊರೆಯುವಂತೆ ಆದೇಶ ನೀಡಲಾಯಿತು. ಜನರನ್ನು ಸುರಕ್ಷಿತ ಸ್ಥಳಗಳಿಗೆ ಕರೆದೊಯ್ಯಲು 1,200ಕ್ಕೂ ಹೆಚ್ಚು ಬಸ್‌ಗಳನ್ನು ವ್ಯವಸ್ಥೆ ಮಾಡಲಾಯಿತು. ಏಪ್ರಿಲ್ 27ರ ಸಂಜೆಯ ವೇಳೆಗೆ, ಇಡೀ ನಗರವೇ ಖಾಲಿಯಾಗಿತು. ಬೀದಿಗಳಲ್ಲಿ ಭಯಾನಕವಾದ ನಿಶ್ಯಬ್ದ ಆವರಿಸಿತು. ಪ್ರಿಪ್ಯಾಟ್ ನಿವಾಸಿಗಳು ತಮ್ಮ ಮನೆಗಳು, ಆಸ್ತಿಪಾಸ್ತಿಗಳು ಮತ್ತು ತಮ್ಮ ಜೀವನವನ್ನೇ ಬಿಟ್ಟುಹೋಗುವಂತ ಪರಿಸ್ಥಿತಿ ನಿರ್ಮಾಣಗೊಂಡಿದ್ದು ಕಲ್ಪನೆಗೂ ಮೀರಿ ಹೋಗಿತ್ತು.
ಇಂದು ಅದೇ ಪ್ರಿಪ್ಯಾಟ್ ಒಂದು 'ಭೂತಗಳ ನಗರ' ಎಂಬ ಪಟ್ಟಿಗೆ ಸೇರಿಕೊಂಡಿದೆ. ಒಂದು ಕಾಲದಲ್ಲಿ ಜನನಿಬೀಡ ಪ್ರದೇಶವಾಗಿದ್ದ ಊರು ಈಗ ಜನರ ಕೆಲಸ, ಮಾತು, ಓಡಾಟಗಳಿಲ್ಲದೇ ಪಾಳುಬಿದ್ದಿದೆ. ಶಿಥಿಲಗೊಂಡ ಕಟ್ಟಡಗಳು, ಗಿಡಗಂಟಿಗಳಿಂದ ಮುಚ್ಚಿ ಹೋಗಿರುವ ಬಸ್ ನಿಲ್ದಾಣಗಳು ಮತ್ತು ಆಟದ ಮೈದಾನದ ಉಪಕರಣಗಳೆಲ್ಲವೂ ತುಕ್ಕು ಹಿಡಿದಿವೆ. ನಿಂತಲ್ಲೇ ನಿಂತ ಕಾರುಗಳು ಮತ್ತು ಮರೆತುಹೋದ ಯುಗದ ಅವಶೇಷಗಳು ಇಂದಿಗೂ ನಗರದ ಬೀದಿಗಳಲ್ಲಿ ಅನಾಥವಾಗಿವೆ.
ಚೆರ್ನೋಬಿಲ್ ದುರಂತ: ಜಗತ್ತಿಗೊಂದು ಎಚ್ಚರಿಕೆ
ಚೆರ್ನೋಬಿಲ್ ದುರಂತವು ಜಗತ್ತಿಗೆ ಒಂದು ಎಚ್ಚರಿಕೆಯ ಗಂಟೆಯಾಯಿತು ಎಂಬುದರಲ್ಲಿ ಅನುಮಾನವೇ ಇಲ್ಲ. ಇದು ಪರಮಾಣು ಸುರಕ್ಷತೆಯ ಮಹತ್ವವನ್ನು ಮತ್ತು ಮಾನವನ ತಪ್ಪುಗಳಿಂದ ಉಂಟಾಗುವ ವಿನಾಶಕಾರಿ ಪರಿಣಾಮಗಳನ್ನು ಎತ್ತಿ ಹಿಡಿಯಿತು. ಪ್ರಿಪ್ಯಾಟ್‌ನ ಕಥೆಯು ಈ ದುರಂತದಿಂದ ಮಾನವಕುಲಕ್ಕೆ ಉಂಟಾದ ಭಾರಿ ನಷ್ಟವನ್ನು ನೆನಪಿಸುತ್ತದೆ. ಕಾರಣ, ಅಲ್ಲಿನ ಅನೇಕ ನಿವಾಸಿಗಳು ಸುರಕ್ಷಿತ ಸ್ಥಳಗಳಿಗೆ ಹೋಗಲು ಸಾಧ್ಯವೇ ಆಗಲಿಲ್ಲ.
