| ಹರ್ಷವರ್ಧನ್ ಬ್ಯಾಡನೂರು
ಅತ್ತ ನರೇಂದ್ರ ಮೋದಿಯವರು ಮೂರನೇ ಬಾರಿಗೆ ಪ್ರಧಾನ ಮಂತ್ರಿಯಾಗಿ ಪದಗ್ರಹಣ ಮಾಡುತ್ತಿದ್ದರೆ, ಇತ್ತ ಹಳೆಯ ಹಿಟ್ ಸಿನಿಮಾಗಳು ಸಹ ಮತ್ತೊಮ್ಮೆ, ಮಗದೊಮ್ಮೆ ರಿಲೀಸ್ ಆಗುತ್ತಿವೆ. ರಾಜ್ಯದಲ್ಲಿ ಥಿಯೇಟರ್ಗಳ ಉಳಿವಿಗೆ ಹಳೆಯ ಹಿಟ್ ಚಿತ್ರಗಳೂ ಬೇಕೇಬೇಕು ಎಂಬ ಮಾತುಗಳು ಕೇಳಿಬರುತ್ತಿವೆ. ಕಳೆದ ಎರಡು ತಿಂಗಳಲ್ಲಿ 15ಕ್ಕೂ ಹೆಚ್ಚು ಸಿನಿಮಾಗಳು ಥಿಯೇಟರ್ಗಳಲ್ಲಿ ರಿ-ರಿಲೀಸ್ ಆಗಿವೆ.
ಪ್ರೇಕ್ಷಕ ನೀ ಬೇಗನೆ ಬಾರೋ…
ಪ್ರತಿ ವರ್ಷ ಆಗೊಮ್ಮೆ ಈಗೊಮ್ಮೆ ಕೆಲವು ಹಳೆಯ ಸಿನಿಮಾಗಳು ರಿ-ರಿಲೀಸ್ ಆಗುತ್ತಿದ್ದುದು ಸಾಮಾನ್ಯ. ಆದರೆ, ಈ ವರ್ಷ ಮೇ ಮತ್ತು ಜೂನ್ನಲ್ಲಿ ಹೊಸ ಸಿನಿಮಾಗಳಷ್ಟೇ ಸಂಖ್ಯೆಯಲ್ಲಿ ಹಳೆಯ ಸಿನಿಮಾಗಳೂ ತೆರೆಗೆ ಬಂದಿವೆ. ಡಾ. ವಿಷ್ಣುವರ್ಧನ್ ಅಭಿನಯಿಸಿದ್ದ 1986ರ ಹಿಟ್ ಸಿನಿಮಾ “ಕೃಷ್ಣ ನೀ ಬೇಗನೆ ಬಾರೋ’ ರಾಜ್ಯಾದ್ಯಂತ 30ಕ್ಕೂ ಅಧಿಕ ಮಲ್ಟಿಪ್ಲೆಕ್ಸ್ ಮತ್ತು ಸಿಂಗಲ್ ಸ್ಕ್ರೀನ್ ಥಿಯೇಟರ್ಗಳಲ್ಲಿ ಕಳೆದ ಮೇ 17ರಂದು ರಿಲೀಸ್ ಆಗಿತ್ತು.
ಮತ್ತೆ ಬಂತು ಎ
ಉಪೇಂದ್ರ ನಟಿಸಿ, ನಿರ್ದೇಶಿಸಿದ್ದ “ಎ’ ಚಿತ್ರ ಕೂಡ ಕಳೆದ ಮೇ 17ರಂದು ರಾಜ್ಯಾದ್ಯಂತ ಬಿಡುಗಡೆಯಾಗಿದ್ದು, ಇದೀಗ ನಾಲ್ಕನೇ ವಾರಕ್ಕೆ ಎಂಟ್ರಿ ಕೊಟ್ಟಿದೆ. ಇದೇ ಸಮಯದಲ್ಲಿ ರಿಲೀಸ್ ಆದ ಕೆಲ ಹೊಸ ಸಿನಿಮಾಗಳು ಸಹ ಥಿಯೇಟರ್ಗಳಲ್ಲಿ ನಾಲ್ಕು ವಾರ ಪೂರೈಸಲು ಸಾಧ್ಯವಾಗಿಲ್ಲ ಎಂಬುದು ನೆನಪಿರಲಿ!
ಪುನೀತ್ ಹ್ಯಾಟ್ರಿಕ್ ರಿ-ರಿಲೀಸ್
ಪುನೀತ್ ರಾಜಕುಮಾರ್ ಅಭಿನಯಿಸಿದ್ದ “ಪವರ್’ ಮತ್ತು “ಅಂಜನಿಪುತ್ರ’ ಚಿತ್ರಗಳು ಮೇ 10ರಂದು ಒಂದೇ ದಿನ ರಿ&ರಿಲೀಸ್ ಆಗಿದ್ದು ವಿಶೇಷ. “ಪವರ್’ 70 ಥಿಯೇಟರ್ಗಳಲ್ಲಿ ಬಿಡುಗಡೆಯಾಗಿದ್ದರೆ, “ಅಂಜನಿಪುತ್ರ’ 100ಕ್ಕೂ ಹೆಚ್ಚು ಸ್ಕ್ರೀನ್ಗಳಲ್ಲಿ ರಿಲೀಸ್ ಆಗಿತ್ತು. ಮೇ 17ರಂದು ಪುನೀತ್ ರಾಜಕುಮಾರ್ ಹುಟ್ಟುಹಬ್ಬವಿದ್ದ ಕಾರಣ, ಅಭಿಮಾನಿಗಳು ತಮ್ಮ ನೆಚ್ಚಿನ ನಟನ ಸಿನಿಮಾಗಳನ್ನು ಮತ್ತೊಮ್ಮೆ ಥಿಯೇಟರ್ಗಳಲ್ಲಿ ನೋಡಿ ಸಂಭ್ರಮಿಸಿದರು. ಹಾಗೇ ಥಿಯೇಟರ್ಗಳ ಮುಂದೆ ಮತ್ತೊಮ್ಮೆ ಪುನೀತ್ ಕಟೌಟ್ ಕಟ್ಟಿ ಸಡಗರದಿಂದ ರಿ-ರಿಲೀಸ್ ಆಚರಿಸಿದರು.
ಜಾಕಿ ಸಂಭ್ರಮ
ಅಂದಹಾಗೆ ಈ ವರ್ಷ ಐಪಿಎಲ್ ಮತ್ತು ಲೋಕಸಭಾ ಚುನಾವಣೆಯ ನಡುವೆ ಹೊಸ ಸಿನಿಮಾಗಳು ಪ್ರೇಕ್ಷಕರನ್ನು ಸೆಳೆಯಲು ಹರಸಾಹಸ ಪಡುವಂತಾಗಿತ್ತು. ಜತೆಗೆ ಸ್ಟಾರ್ ಸಿನಿಮಾಗಳೂ ಇಲ್ಲದ ಕಾರಣ ಥಿಯೇಟರ್ಗಳು ಬಾಗಿಲು ಮುಚ್ಚುವ ಆತಂಕ ಪ್ರಾರಂಭವಾಗಿತ್ತು. ಆಗ ಪುನೀತ್ ರಾಜಕುಮಾರ್ ಅವರ “ಜಾಕಿ’ ಚಿತ್ರವನ್ನು ಮಾ. 15ರಂದು ರಿ-ರಿಲೀಸ್ ಮಾಡಲಾಯಿತು. ನೂರಕ್ಕೂ ಹೆಚ್ಚು ಥಿಯೇಟರ್ಗಳಲ್ಲಿ ಮರುಬಿಡುಗಡೆಯಾದ “ಜಾಕಿ’ ಚಿತ್ರವನ್ನು ಕೆಲವೆಡೆ ಮುಂಜಾನೆ 4.30 ಪ್ರದರ್ಶನ ಆಯೋಜಿಸಲಾಗಿತ್ತು.
ಮತ್ತೊಮ್ಮೆ “ರಾರ್ಬಟ್’ ಜಾತ್ರೆ
ಈ ವಾರವೂ ಹೇಳಿಕೊಳ್ಳುವಂತಹ ಸಿನಿಮಾಗಳು ರಿಲೀಸ್ ಆಗದ ಕಾರಣ, ದರ್ಶನ್ ಅಭಿನಯದ “ರಾರ್ಬಟ್’ ಚಿತ್ರವನ್ನು ರಿ-ರಿಲೀಸ್ ಮಾಡಲಾಗಿದೆ. 100ಕ್ಕೂ ಹೆಚ್ಚು ಸ್ಕ್ರೀನ್ಗಳಲ್ಲಿ “ರಾರ್ಬಟ್’ ಸಿನಿಮಾ ಮರುಬಿಡುಗಡೆಯಾಗಿದೆ.
ಹೊಸ ಚಿತ್ರಗಳಿಗೆ ಪೆಟ್ಟು
ಇತ್ತೀಚಿನ ದಿನಗಳಲ್ಲಿ ಸ್ಟಾರ್ ನಟರ ಹಳೆಯ ಹಿಟ್ ಸಿನಿಮಾಗಳು ರಿ&ರಿಲೀಸ್ ಆಗುತ್ತಿರುವ ಕಾರಣ ಹೊಸ ಚಿತ್ರಗಳಿಗೆ ಕೆಲವೆಡೆ ಸಮಸ್ಯೆ ಎದುರಾಗಿದೆ ಎನ್ನುವ ಮಾತುಗಳೂ ಕೇಳಿಬರುತ್ತಿವೆ. ಕೆಲವೆಡೆ ಪ್ರಮುಖ ಥಿಯೇಟರ್ಗಳೂ ಸಿಗದೇ ಹೊಸಬರು ಪರದಾಡುವಂತಾಗಿದೆ ಎನ್ನಲಾಗಿದೆ. “ಹಾಗೇ ಎಲ್ಲ ಹಳೆಯ ಹಿಟ್ ಸಿನಿಮಾಗಳೂ ಮತ್ತೊಮ್ಮೆ ಹೌಸ್ಫುಲ್ ಆಗುತ್ತಿವೆ ಎಂದು ಹೇಳಲು ಕಷ್ಟ. ಏಕೆಂದರೆ ನಮ್ಮ ಚಿತ್ರಮಂದಿರದಲ್ಲೇ ಭಾನುವಾರ ರಜಾ ದಿನವೂ ಕೇವಲ 60 ಜನರಷ್ಟೇ ಪ್ರೇಕ್ಷಕರಿದ್ದರು’ ಎಂದು ಹೇಳಿಕೊಳ್ಳುತ್ತಾರೆ ಹೆಸರು ಹೇಳಲು ಇಚ್ಛಿಸದ ಥಿಯೇಟರ್ ಮಾಲೀಕರು.
ಪರಭಾಷೆ ಚಿತ್ರಗಳೂ ರಿ-ರಿಲೀಸ್
ಕನ್ನಡದ “ಸಿಂಗಾಪೂರ್ನಲ್ಲಿ ರಾಜಾ ಕುಳ್ಳ’, “ಸಾಹಸ ಸಿಂಹ’ ಸೇರಿ ಇನ್ನೂ ಕೆಲ ಚಿತ್ರಗಳು ಇದೀಗ ರಿ&ರಿಲೀಸ್ಗೆ ರೆಡಿಯಾಗಿವೆ. ಅದರ ಜತೆ ಜತೆಗೇ ಕರ್ನಾಟದಲ್ಲಿ ಅದರಲ್ಲೂ ಹೆಚ್ಚಾಗಿ ಬೆಂಗಳೂರಿನಲ್ಲಿ ಪರಭಾಷೆಯ ಸಿನಿಮಾಗಳೂ ಸಹ ರಿ-ರಿಲೀಸ್ ಆಗಿವೆ. ಪವನ್ ಕಲ್ಯಾಣ್ ಅಭಿನಯದ ತೆಲುಗಿನ “ತಮ್ಮುಡು’, ಕಮಲ್ ಹಾಸನ್ ನಟಿಸಿದ್ದ “ಇಂಡಿಯನ್’, “ಸೂರ್ಯ ನಾಯಕನಾಗಿದ್ದ “ಜಿನಿ’ ಮತ್ತು ಅಜಿತ್ ಅಭಿನಯದ ತಮಿಳಿನ “ಎನ್ನೈ ಅರಿಂದಾಳ್’ ಚಿತ್ರದ ತೆಲುಗು ರಿಮೇಕ್ “ಸತ್ಯದೇವ್ ಐಪಿಎಸ್’ ಕೂಡ ರಿ&ರಿಲೀಸ್ ಆಗಿವೆ.