ನವದೆಹಲಿ: ದೇಶದ ಪ್ರಮುಖ ದೂರಸಂಪರ್ಕ ಕಂಪನಿ ಜಿಯೋ ಜು. 3ರಿಂದ ತನ್ನ ಮೊಬೈಲ್ ಸೇವಾ ದರಗಳನ್ನು ಶೇ. 12ರಿಂದ 27ರವರೆಗೆ ಏರಿಸಲು ನಿರ್ಧರಿಸಿದೆ. ಅದಲ್ಲದೆ 5ಜಿ ಅನ್ಲಿಮಿಟೆಡ್ ಉಚಿತ ಸೇವೆಯನ್ನು ಮಿತಿಗೆ ಒಳಪಡಿಸಲು ತೀರ್ವನಿಸಿದೆ. ಎರಡೂವರೆ ವರ್ಷಗಳ ಬಳಿಕ ಇದೇ ಮೊದಲ ಸಲ ಜಿಯೋ ದರ ಏರಿಸುತ್ತಿದೆ. ಇದು ಬಹುತೇಕ ಎಲ್ಲ ಪ್ಲ್ಯಾನ್ಗಳಿಗೆ ಅನ್ವಯವಾಗಲಿದೆ. 1 ಜಿಬಿ ಡೇಟಾ ಆಡ್ ಆನ್ ಪ್ಯಾಕ್ನ ದರ ರೂ. 15 ಇದ್ದದ್ದು ರೂ. 19 ಆಗಲಿದೆ. 399 ರೂ. ಇದ್ದ 75 ಜಿಬಿ ಪೋಸ್ಟ್ಪೇಡ್ 449 ರೂ. ಆಗಲಿದೆ. 84 ದಿನಗಳ ವ್ಯಾಲಿಡಿಟಿಯ 666 ರೂ.ನ ಪ್ಲ್ಯಾನ್ 799 ರೂ. ಆಗಲಿದೆ. ವಾರ್ಷಿಕ ರೀಚಾರ್ಜ್ ಪ್ಲ್ಯಾನ್ಗಳು ಕೂಡ ಶೇ. 21ರಷ್ಟು ಏರಿಕೆಯಾಗಲಿವೆ. ಈ ಹಿಂದೆ 2021ರ ಡಿಸೆಂಬರ್ನಲ್ಲಿ ಜಿಯೋ ದರ ಏರಿಸಿತ್ತು. ಈ ಮಾರುಕಟ್ಟೆಯ ಶೇ. 41ರಷ್ಟು, ಅಂದರೆ 47 ಕೋಟಿ ಮೊಬೈಲ್ ಚಂದಾದಾರರನ್ನು ಜಿಯೋ ಹೊಂದಿದೆ. ಭಾರ್ತಿ ಏರ್ಟೆಲ್ ಮತ್ತು ವೊಡಾಫೋನ್ ಕೂಡ ಸದ್ಯದಲ್ಲೇ ದರ ಏರಿಸುವ ಸಾಧ್ಯತೆ ಇದೆ.
ಎರಡು ಹೊಸ ಆಪ್ಗಳು
ಜಿಯೋ ತನ್ನ ಡಿಜಿಟಲ್ ಸೌಲಭ್ಯದ ವ್ಯಾಪ್ತಿಯನ್ನೂ ವಿಸ್ತರಿಸಿದೆ. ಜಿಯೋ ಸೇಫ್ ಮತ್ತು ಜಿಯೋ ಟ್ರಾನ್ಸ್ಲೇಟ್ ಎಂಬ ಎರಡು ಅಪ್ಲಿಕೇಷನ್ಗಳನ್ನು ಬಿಡುಗಡೆ ಮಾಡಿದೆ. ಜಿಯೋ ಸೇಫ್ ತಿಂಗಳ ದರ 199 ರೂ. ಇದ್ದು, ಸುರಕ್ಷಿತ ಕರೆ, ಮೆಸೇಜಿಂಗ್ ಮತ್ತು ಫೈಲ್ ಟ್ರಾನ್ಸ್ಫರ್ ಸೇವೆಯನ್ನು ಒದಗಿಸುತ್ತದೆ. ಕೃತಕ ಬುದ್ಧಿಮತ್ತೆಯಿಂದ ಚಾಲಿತವಾದ ಜಿಯೋ ಟ್ರಾನ್ಸ್ಲೇಟ್ ಆಪ್ ತಿಂಗಳಿಗೆ 99 ರೂ. ಪಾವತಿಸಿದರೆ, ವಾಯ್ಸ್, ಕಾಲ್, ಮೆಸೇಜ್, ಟೆಕ್ಸ್ಟ್ ಮತ್ತು ಇಮೇಜ್ಗಳನ್ನು ಟ್ರಾನ್ಸ್ಲೇಟ್ ಮಾಡುತ್ತದೆ. ಜಿಯೋ ಬಳಕೆದಾರರಿಗೆ ಒಂದು ವರ್ಷದವರೆಗೆ ಈ ಎರಡೂ ಆಪ್ಗಳು ಉಚಿತವಾಗಿರಲಿವೆ.
ಗರಿಷ್ಠ ಗುಣಮಟ್ಟದ, ಕೈಗೆಟಕುವ ಇಂಟರ್ನೆಟ್ ಸೌಲಭ್ಯವು ಡಿಜಿಟಲ್ ಇಂಡಿಯಾದ ಬೆನ್ನೆಲುಬು. ಇದಕ್ಕೆ ಹೆಚ್ಚಿನ ಕೊಡುಗೆ ನೀಡುತ್ತಿರುವುದಕ್ಕೆ ಜಿಯೋಗೆ ಹೆಮ್ಮೆ ಇದೆ- ಆಕಾಶ್ ಎಂ. ಅಂಬಾನಿ, ರಿಲಯನ್ಸ್ ಜಿಯೋ ಅಧ್ಯಕ್ಷ