ಗಯಾನಾ: ಟಿ20 ವಿಶ್ವಕಪ್ ಟೂರ್ನಿಯಲ್ಲಿ ಅಜೇಯವಾಗಿ ಮುನ್ನುಗ್ಗುತ್ತಿರುವ ಭಾರತ ತಂಡ ಪ್ರಾವಿಡೆನ್ಸ್ ಸ್ಟೇಡಿಯಂನಲ್ಲಿ ಗುರುವಾರ ನಡೆಯಲಿರುವ 2ನೇ ಸೆಮಿಫೈನಲ್ ಪಂದ್ಯದಲ್ಲಿ ಹಾಲಿ ಚಾಂಪಿಯನ್ ಇಂಗ್ಲೆಂಡ್ ತಂಡವನ್ನು ಎದುರಿಸಲಿದೆ. ಟೂರ್ನಿಯುದ್ದಕ್ಕೂ ಕಾಡುತ್ತ ಮತ್ತು ಲಿತಾಂಶಗಳನ್ನು ಏರುಪೇರು ಮಾಡುತ್ತ ಬಂದಿರುವ ಮಳೆ ಈ ಮಹತ್ವದ ಪಂದ್ಯಕ್ಕೂ ಅಡಚಣೆ ತರುವ ಭೀತಿ ಇದೆ. ಭಾರಿ ಮಳೆಯಿಂದಾಗಿ ಪಂದ್ಯ ರದ್ದಾದರೂ ಅಚ್ಚರಿ ಇಲ್ಲ ಎಂದು ವರದಿಯಾಗಿದೆ.
ಹವಾಮಾನ ಇಲಾಖೆಯ ಮುನ್ಸೂಚನೆ ಪ್ರಕಾರ, ಪಂದ್ಯದ ಸಮಯದಲ್ಲಿ ಮಳೆ ಸುರಿಯುವ ಸಾಧ್ಯತೆ ಶೇ. 88ರಷ್ಟಿದೆ. ದ. ಆಫ್ರಿಕಾ-ಅಫ್ಘಾನಿಸ್ತಾನ ನಡುವಿನ ಮೊದಲ ಸೆಮಿಫೈನಲ್ ಪಂದ್ಯಕ್ಕೆ ಮೀಸಲು ದಿನವಿದ್ದರೂ, ಭಾರತ-ಇಂಗ್ಲೆಂಡ್ ನಡುವಿನ 2ನೇ ಸೆಮಿಫೈನಲ್ ಪಂದ್ಯಕ್ಕೆ ಮೀಸಲು ದಿನವಿಲ್ಲ. ಹೀಗಾಗಿ ಒಂದು ವೇಳೆ ಪಂದ್ಯ ರದ್ದುಗೊಂಡರೆ ಭಾರತ ತಂಡವೇ ಫೈನಲ್ಗೇರಲಿದೆ. ಸೂಪರ್-8 ಅಂಕಪಟ್ಟಿಯಲ್ಲಿ ಭಾರತ ಅಗ್ರಸ್ಥಾನ ಸಂಪಾದಿಸಿದ್ದು ಇದಕ್ಕೆ ಕಾರಣ. ಇಂಗ್ಲೆಂಡ್ ಸೂಪರ್-8 ಅಂಕಪಟ್ಟಿಯಲ್ಲಿ 2ನೇ ಸ್ಥಾನ ಗಳಿಸಿತ್ತು.
ಸೂಪರ್-8ನಲ್ಲಿ ಭಾರತ ಯಾವುದೇ ಸ್ಥಾನ ಪಡೆದರೂ, ಜೂನ್ 27ಕ್ಕೆ ಗಯಾನಾದಲ್ಲಿನ 2ನೇ ಸೆಮಿಫೈನಲ್ನಲ್ಲೇ ಆಡಲಿದೆ ಎಂದು ಐಸಿಸಿ ಮೊದಲೇ ತೀರ್ಮಾನಿಸಿತ್ತು. ಈ ಪಂದ್ಯ ಭಾರತೀಯ ವೀಕ್ಷಕರಿಗೆ ಅನುಕೂಲಕರ ಸಮಯದಲ್ಲಿ (ರಾತ್ರಿ 8) ನಿಗದಿಯಾಗಿರುವುದು ಇದಕ್ಕೆ ಕಾರಣ. ಇದೇ ವೇಳೆ, ಫೈನಲ್ ಪಂದ್ಯ ಶನಿವಾರವೇ ನಡೆಯಲಿರುವುದರಿಂದ, 2ನೇ ಸೆಮೀಸ್ಗೆ ಮೀಸಲು ದಿನವಿಲ್ಲ ಎಂದೂ ಸ್ಪಷ್ಟಪಡಿಸಿತ್ತು. ಆದರೆ 2ನೇ ಸೆಮಿಫೈನಲ್ ಪಂದ್ಯ ಮುಗಿಸಲು 250 ನಿಮಿಷಗಳ ಹೆಚ್ಚುವರಿ ಸಮಯವನ್ನು ಐಸಿಸಿ ನೀಡಿದೆ. ಜತೆಗೆ ಸೆಮಿಫೈನಲ್ನಲ್ಲಿ ಸ್ಪಷ್ಟ ಫಲಿತಾಂಶ ಬರಬೇಕಾದರೆ ಉಭಯ ತಂಡಗಳು ಕನಿಷ್ಠ 10 ಓವರ್ಗಳ ಪಂದ್ಯ ಆಡಬೇಕಾಗಿದೆ. ಲೀಗ್, ಸೂಪರ್-8ನಲ್ಲಿ ಫಲಿತಾಂಶಕ್ಕೆ ಕನಿಷ್ಠ 5 ಓವರ್ಗಳ ಪಂದ್ಯ ಸಾಕಾಗಿತ್ತು.
ಜೂನ್ 29ಕ್ಕೆ ಬ್ರಿಜ್ಟೌನ್ನಲ್ಲಿ ನಿಗದಿಯಾಗಿರುವ ಫೈನಲ್ಗೆ ಜೂನ್ 30 (ಭಾನುವಾರ) ಮೀಸಲು ದಿನವಾಗಿದೆ. ಮಳೆ ಕಾಡಿದರೆ ಎರಡೂ ದಿನ 190 ನಿಮಿಷ ಹೆಚ್ಚುವರಿ ಸಮಯ ನಿಗದಿಪಡಿಸಲಾಗಿದೆ. ಫೈನಲ್ನಲ್ಲೂ ಫಲಿತಾಂಶ ನಿರ್ಧಾರಕ್ಕೆ ಉಭಯ ತಂಡಗಳು ಕನಿಷ್ಠ 10 ಓವರ್ ಆಡಬೇಕು. ಮೀಸಲು ದಿನವೂ ಮಳೆ ಅಡ್ಡಿಪಡಿಸಿದರೆ, ಫೈನಲ್ಗೇರಿದ ಎರಡೂ ತಂಡಗಳನ್ನು ಜಂಟಿ ಚಾಂಪಿಯನ್ ಎಂದು ಐಸಿಸಿ ಘೋಷಿಸಲಿದೆ.
ಮೊದಲ ಸೆಮೀಸ್ಗೆ ಮಾತ್ರ ಮೀಸಲು ದಿನ
ಆಫ್ರಿಕಾ-ಆಫ್ಘನ್ ನಡುವಿನ ಮೊದಲ ಸೆಮೀಸ್ಗೆ ಮೀಸಲು ದಿನವಿದೆ. ಸ್ಥಳಿಯ ಕಾಲಮಾನದಂತೆ ಬುಧವಾರ ರಾತ್ರಿ ನಿಗದಿಯಾಗಿರುವ ಈ ಪಂದ್ಯಕ್ಕೆ ಗುರುವಾರ ಮೀಸಲು ದಿನವಾಗಿದೆ. ಅಂದರೆ ಭಾರತೀಯ ಕಾಲಮಾನ ಪ್ರಕಾರ ಎರಡೂ ಗುರುವಾರವೇ ಆಗಿದೆ. ಮೀಸಲು ದಿನ ಸ್ಥಳಿಯ ಕಾಲಮಾನ ಮಧ್ಯಾಹ್ನ 2ಕ್ಕೆ ಪಂದ್ಯ ಶುರುವಾಗಲಿದೆ. ಅಂದರೆ ಭಾರತದಲ್ಲಿ ಗುರುವಾರ ರಾತ್ರಿ 11.30ರಿಂದ ಪಂದ್ಯ ನಡೆಯಲಿದೆ. ಮೊದಲ ಸೆಮೀಸ್ಗೆ ಪಂದ್ಯದ ದಿನ 60 ನಿಮಿಷ ಹೆಚ್ಚುವರಿ ಸಮಯ ನೀಡಲಾಗಿದ್ದರೆ, ಮೀಸಲು ದಿನ 190 ನಿಮಿಷ ಹೆಚ್ಚುವರಿ ಸಮಯವಿದೆ. ಮೊದಲ ಸೆಮೀಸ್ ಮೀಸಲು ದಿನವೂ ರದ್ದಾದರೆ ದ. ಆಫ್ರಿಕಾ ಫೈನಲ್ಗೇರಲಿದೆ.
ಆಸೀಸ್ ನಂತರ ಆಂಗ್ಲರೆದುರು ಸೇಡಿನ ತವಕ
ಆಸ್ಟ್ರೆಲಿಯಾ ತಂಡವನ್ನು ಸೋಲಿಸಿ ಟಿ20 ವಿಶ್ವಕಪ್ ಟೂರ್ನಿಯ ಸೂಪರ್-8 ಹಂತದಲ್ಲೇ ಹೊರದಬ್ಬುವ ಮೂಲಕ ಭಾರತ ತಂಡ 2023ರ ತವರಿನ ಏಕದಿನ ವಿಶ್ವಕಪ್ ಫೈನಲ್ ಸೋಲಿಗೆ ಸೇಡು ತೀರಿಸಿಕೊಂಡಿದೆ. ಇದೀಗ 2022ರ ಟಿ20 ವಿಶ್ವಕಪ್ ಟೂರ್ನಿಯ ಸೆಮಿಫೈನಲ್ ಸೋಲಿಗೆ ಇಂಗ್ಲೆಂಡ್ ವಿರುದ್ಧವೂ ಸೇಡು ತೀರಿಸಿಕೊಳ್ಳುವ ಅವಕಾಶ ಭಾರತಕ್ಕೆ ಎದುರಾಗಿದೆ. ಅಡಿಲೇಡ್ನಲ್ಲಿ ನಡೆದ ಕಳೆದ ಟಿ20 ವಿಶ್ವಕಪ್ ಸೆಮೀಸ್ನಲ್ಲಿ ಭಾರತ 6 ವಿಕೆಟ್ಗೆ 168 ರನ್ ಪೇರಿಸಿದ್ದರೆ, ಇಂಗ್ಲೆಂಡ್ 16 ಓವರ್ಗಳಲ್ಲೇ ವಿಕೆಟ್ ನಷ್ಟವಿಲ್ಲದೆ 170 ರನ್ ಗಳಿಸಿ ಗೆದ್ದಿತ್ತು.
13 ನೇ ಆವೃತ್ತಿಯ ಬಿಸಿಐಸಿ ಕಾರ್ಪೊರೇಟ್ ಗಾಲ್ಫ್ ಟೂರ್ನಿಯಲ್ಲಿ ಮಿಲೇಶ್, ಅನುಪಮಾಗೆ ಪ್ರಶಸ್ತಿ