ಬೆಂಗಳೂರು: ಕರೊನಾ ವೈರಸ್ ಸೋಂಕು ಹರಡುತ್ತಿದ್ದು, ಜನಜಾಗೃತಿ ಮೂಡಿಸುತ್ತಿರುವ ವೇಳೆಯೇ ಪರಿಸ್ಥಿತಿಯ ಲಾಭ ಪಡೆದು ಹಣ ಮಾಡಲು ಹವಣಸಿದ ಕೆಮಿಕಲ್ ವ್ಯಾಪಾರಿಗಳಿಬ್ಬರು ಈಗ ಬೆಂಗಳೂರು ಸಿಸಿಬಿ ಪೊಲೀಸರ ಅತಿಥಿಗಳು! ಬರೋಬ್ಬರಿ 56 ಲಕ್ಷ ರೂಪಾಯಿ ಮೌಲ್ಯದ ನಕಲಿ ಸ್ಯಾನಿಟೈಸರ್, ಹ್ಯಾಂಡ್ರಬ್ ಬೆಂಗಳೂರು ಪೊಲೀಸರ ವಶಕ್ಕೆ ಸಿಕ್ಕಿದೆ.
ಬಂಧಿತ ಕೆಮಿಕಲ್ ವ್ಯಾಪಾರಿಗಳನ್ನು ಬೆಂಗಳೂರಿನ ಕಸ್ತೂರ್ಬಾ ನಗರದ ರಾಜು (43) ಮತ್ತು ಚಾಮರಾಜ ಪೇಟೆಯ ಚಂದನ್(64) ಎಂದು ಗುರುತಿಸಲಾಗಿದೆ. ಬೆಂಗಳೂರಿನ ನಾಗರಿಕರು ಸೋಂಕು ಹರಡದಂತೆ ಕಾಳಜಿ ವಹಿಸುತ್ತಿದ್ದರೆ ಪರಿಸ್ಥಿತಿಯ ಲಾಭ ಪಡೆಯಲು ಆರೋಪಿಗಳು ಪ್ರಯತ್ನಿಸಿದ್ದರು. ಆರೋಪಿಗಳು ಬೆಂಗಳೂರಿನ ತರಗುಪೇಟೆಯ ಜ್ಯೋತಿ ಕೆಮಿಕಲ್ಸ್, ಕಸ್ತೂರ್ಬಾ ನಗರದ ಸ್ವಾತಿ ಆ್ಯಂಡ್ ಕಂಪನಿಗೆ ಸೇರಿದ ಗೋಡೌನ್ಗಳಲ್ಲಿ ನಕಲಿ ಹ್ಯಾಂಡ್ ಸ್ಯಾನಿಟೈಸರ್ ಮತ್ತು ಹ್ಯಾಂಡ್ ರಬ್ಗಳನ್ನು ತಯಾರಿಸಿ ಮಾರಾಟ ಮಾಡುತ್ತಿದ್ದರು.
ದಾಳಿ ನಡೆಸಿದ ವೇಳೆ ಗೋಡೌನ್ನಲ್ಲಿ ಮಾರಾಟಕ್ಕೆ ಸಿದ್ಧಪಡಿಸಿ ಇರಿಸಿದ್ದ 100 ಎಂಎಲ್, 120 ಎಂಎಲ್, 200 ಎಂಎಲ್, 500 ಎಂಎಲ್ಗಳ ಒಟ್ಟು 8,500 ಬಾಟಲಿಗಳು, 4,500 ಖಾಲಿ ಪ್ಲಾಸ್ಟಿಕ್ ಬಾಟಲಿಗಳು ಮತ್ತು 35 ಲೀಟರ್ ಇಸೋಪ್ರೊಪೈಲ್ ಆಲ್ಕೋಹಾಲ್ನ 8 ಕ್ಯಾನ್ಗಳು, 4,500 ಸ್ಟಿಕ್ಕರ್ಗಳು ಇದ್ದವು. ಇವುಗಳ ಬೆಲೆ 56 ಲಕ್ಷ ರೂಪಾಯಿ ಅಂದಾಜಿಸಲಾಗಿದ್ದು ಪೊಲೀಸರು ವಶಪಡಿಸಿದ್ದಾರೆ.
ನಕಲಿ ಉತ್ಪನ್ನವನ್ನು ಇವರು ತಯಾರಿಸಿದ ಬಳಿಕ 100 ಎಂಎಲ್ಗೆ 170 ರೂಪಾಯಿ, 200 ಎಂಎಲ್ಗೆ 325 ರೂಪಾಯಿ, 500 ಎಂಎಲ್ಗೆ 620 ರೂಪಾಯಿ ದರದ ಸ್ಟಿಕ್ಕರ್ ಅಂಟಿಸಿ ಮಾರಾಟಕ್ಕೆ ಮಾರುಕಟ್ಟೆ ರವಾನಿಸುತ್ತಿದ್ದರು. ಉತ್ಪನ್ನ ತಯಾರಿಗೆ ತಗುಲುವ ವೆಚ್ಚಕ್ಕಿಂತ 10 ಪಟ್ಟು ಲಾಭಾಂಶ ಇಟ್ಟುಕೊಂಡು ಎಂಆರ್ಪಿ ಹಾಕಿ ದುಬಾರಿ ಲಾಭಾಂಶ ದೋಚುತ್ತಿದ್ದರು. ಇವರ ವಿರುದ್ಧ ಐಪಿಸಿ ಮತ್ತು ಡ್ರಗ್ಸ್ ಆ್ಯಂಡ್ ಕಾಸ್ಮೆಟಿಕ್ಸ್ ಕಾಯ್ದೆಯ ವಿವಿಧ ಅಂಶಗಳ ಅಡಿ ಪ್ರಕರಣ ದಾಖಲಿಸಲಾಗಿದೆ ಎಂದು ಪೊಲೀಸ್ ಇಲಾಖೆ ತಿಳಿಸಿದೆ.
ನಿರ್ಭಯಾ ಕೇಸ್ ಅಪರಾಧಿಗಳಿಗೆ ಶಿಕ್ಷೆ ಜಾರಿ- ಗಮನಸೆಳೆಯಿತು ಪ್ರಧಾನಿ ಟ್ವೀಟ್