ಯಾವುದೇ ಕಾರಣಕ್ಕೂ ದೈತ್ಯ ಬಸವನ ಹುಳುಗಳ ಹತ್ತಿರವೂ ಹೋಗ್ಬೇಡಿ: ತಜ್ಞರಿಂದ ಬಂದಿದೆ ಖಡಕ್​ ವಾರ್ನಿಂಗ್​! Giant Snails

ಕೊಚ್ಚಿ: ಆಫ್ರಿಕನ್ ದೈತ್ಯ ಬಸವನ ಹುಳುಗಳು ( Giant Snails ) ಕಂಡುಬರುವಂತಹ ಪ್ರದೇಶದ ಜನರು ಅವುಗಳನ್ನು ಕೈಯಿಂದ ಮುಟ್ಟದೇ ಆದಷ್ಟು ದೂರ ಇರುವಂತೆ ಎಚ್ಚರಿಕೆ ವಹಿಸಬೇಕಿದೆ. ಬಸವನ ಹುಳುಗಳು ಸವಿಸುವ ಲೋಳೆಯ ಸಂಪರ್ಕದಿಂದ ಮೆನಿಂಜೈಟಿಸಗೆ ಕಾರಣವಾಗುವ ಲಾರ್ವಾ ದೇಹ ಪ್ರವೇಶಿಸುವ ಸಾಧ್ಯತೆ ಇದೆ. ಇದರಿಂದ ಚಿಕ್ಕ ಮಕ್ಕಳು ಹೆಚ್ಚು ಅಪಾಯಕ್ಕೆ ಒಳಗಾಗಬಹುದು. ತೀವ್ರ ಜ್ವರ, ವಾಂತಿ, ತಲೆನೋವು ಬಂದರೆ ತಕ್ಷಣ ವೈಧ್ಯರನ್ನು ಸಂಪರ್ಕಿಸಬೇಕು ಎಂದು ತಜ್ಱರು ಸೂಚಿಸಿದ್ದಾರೆ.

ಬಸವನ ಹುಳುಗಳು ಸ್ರವಿಸುವ ಲಾರ್ವಾಗಳು ರಕ್ತನಾಳದ ಮೂಲಕ ಚಲಿಸಿ ಮಿದುಳು ಮತ್ತು ಅದರ ಸುತ್ತಲಿನ ಭಾಗಗಳಲ್ಲಿ ಉರಿಯೂತವನ್ನು ಉಂಟು ಮಾಡುತ್ತವೆ. ತೀವ್ರ ಜ್ವರ, ತಲೆನೋವು ಮತ್ತು ವಾಂತಿ ಆಗುವುದು ಈ ರೋಗದ ಪ್ರಮುಖ ಲಕ್ಷಣಗಳಾಗಿವೆ.

ಈ ಸೋಂಕಿಗೆ ಎಲೆಗಳಲ್ಲಿ ಕಂಡುಬರುವ ರ್ಯಾಟ್ ಲಂಗ್​ವೊರ್ಮ್​ ಎಂಬ ಪರಾವಲಂಬಿ ಜೀವಿ ಕಾರಣವಾಗುತ್ತದೆ. ಇದು ಸಾಮಾನ್ಯವಾಗಿ ಇಲಿಗಳಲ್ಲಿ ಕಂಡುಬರುತ್ತದೆ. ಇಲಿಗಳ ಮಲವನ್ನು ಸೇವಿಸುವುದರಿಂದ ಈ ಪರಾವಲಂಬಿ ಜೀವಿ ಬಸವನ ಹುಳುಗಳಿಗೆ ಸೋಂಕು ತಗಲುತ್ತದೆ. ಇದು ಮಾನವ ಸಂಪರ್ಕಕ್ಕೆ ಬಂದರೆ, ಅವರಿಗೂ ಸೋಂಕು ತಗುಲುವ ಹೆಚ್ಚಿನ ಅಪಾಯ ಇರುತ್ತದೆ. ಈ ಆಫ್ರಿಕನ್ ದೈತ್ಯ ಬಸವನ ಹುಳುಗಳು ಕೇವಲ ಮನುಷ್ಯರಿಗಲ್ಲದೆ, ಮನೆಯ ಕೈತೋಟ, ತರಕಾರಿ ಹಾಗೂ ಬೆಳೆಗಳಿಗೂ ವ್ಯಾಪಕವಾಗಿ ಹಾನಿಯನ್ನುಂಟು ಮಾಡುತ್ತವೆ.

* ಕೈಗೆ ಗ್ಲೌಸ್​ಗಳನ್ನು ಧರಿಸದೆ ಬಸವನ ಹುಳುಗಳನ್ನು ಮುಟ್ಟಬೇಡಿ. ಉಪ್ಪು ಮತ್ತು ತಾಮ್ರದ ಸಲ್ಫೆಟ್ ದ್ರಾವಣ ಬಳಸಿ ಅವುಗಳನ್ನು ದೂರ ಇಡಬಹುದು. ಇಲಿಗಳ ಸಂತಾನೋತ್ಪತ್ತಿ ಹೆಚ್ಚಾಗದಂತೆ ಅಗತ್ಯ ಕ್ರಮ ಕೈಗೊಳ್ಳಬೇಕು.

* ಮನೆ ಹಾಗೂ ಸುತ್ತಮುತ್ತಲಿನ ಪ್ರದೇಶವನ್ನು ಸ್ವಚ್ಛವಾಗಿ ಇಟ್ಟುಕೊಳ್ಳಬೇಕು.

* ಬಸವನ ಹುಳುಗಳನ್ನು ಕೊಲ್ಲುವುದರಿಂದ ಸಮಸ್ಸೆ ಪರಿಹಾರವಾಗುವುದಿಲ್ಲ, ಅವುಗಳ ಮೊಟ್ಟೆ ದೀರ್ಘಕಾಲ ಮಣ್ಣಿನೊಳಗೆ ಸುರಕ್ಷಿತವಾಗಿ ಉಳಿಯಬಹುದು. ಒಂದು ಬಸವನ ಹುಳು ಒಂದು ಬಾರಿಗೆ ಸುಮಾರು 500 ಮೊಟ್ಟೆಗಳನ್ನ ಇಡಬಹುದು.

* ತರಕಾರಿ ಹಾಗೂ ಇತರ ಪದಾರ್ಥ ಸೇವಿಸುವ ಮೊದಲು ಚನ್ನಾಗಿ ತೊಳೆಯಬೇಕು.

ಮಣ್ಣಿನಲ್ಲಿ ಸುಮಾರು ಒಂದೂವರೆ ಆಳದ ಗುಂಡಿ ತೋಡಿ, ಅನಾಸಸ್ ಹಾಗೂ ಈಸ್ಟ್​ ಅನ್ನು ಗುಂಡಿ ಒಳಗೆ ಹಾಕಬೇಕು. ಅದರ ವಾಸನೆಗೆ ಬಸವನ ಹುಳುಗಳು ಆಕರ್ಷಿತವಾಗಿ ಬಂದಾಗ ಅವುಗಳ ಮೇಲೆ ಉಪ್ಪಿನ ದ್ರಾವಣವನ್ನು ಸಿಂಪಡಿಸಬೇಕು. ಇದಾದ ನಂತರ ಗುಂಡಿಯನ್ನು ಮುಚ್ಚಬೇಕು.

ಬಸವನ ಹುಳು ಹಾಗೂ ಇಲಿ ಇವೆರಡನ್ನು ದೂರ ಇಡುವುದು ತುಂಬಾ ಮುಖ್ಯ. ಯಾರಿಗಾದರು ಸೊಂಕಿನ ಲಕ್ಷಣ ಕಂಡುಬಂದರೆ ತಕ್ಷಣ ವೈದ್ಯರನ್ನು ಭೇಟಿಯಾಗಬೇಕು ಎಂದು ತಜ್ಞರು ಹೇಳಿದ್ದಾರೆ, (ಏಜೇನ್ಸಿಸ್).