ಮುಲ್ತಾನ್/ಕೊಲಂಬೊ: ಉಪಖಂಡದ ಅತಿದೊಡ್ಡ ಕ್ರಿಕೆಟ್ ಹಬ್ಬ ಎನಿಸಿರುವ ಏಷ್ಯಾಕಪ್ ಟೂರ್ನಿಗೆ ವೇದಿಕೆ ಸಜ್ಜಾಗಿದೆ. ವಿಶ್ವಕಪ್ ಸಿದ್ಧತೆ ದೃಷ್ಟಿಯಿಂದ ಈ ಬಾರಿ ಮತ್ತೆ ಏಕದಿನ ಮಾದರಿಗೆ ಟೂರ್ನಿ ಮರಳುತ್ತಿದೆ. ಬುಧವಾರ ಮುಲ್ತಾನ್ನಲ್ಲಿ ನಡೆಯಲಿರುವ ಟೂರ್ನಿಯ ಉದ್ಘಾಟನಾ ಪಂದ್ಯದಲ್ಲಿ ಪಾಕಿಸ್ತಾನ ತಂಡ ನೇಪಾಳ ವಿರುದ್ಧ ಸೆಣಸಲಿದೆ. ಕಳೆದ ವರ್ಷದ ಟಿ20 ಏಷ್ಯಾಕಪ್ನಲ್ಲಿ ಶ್ರೀಲಂಕಾ ಪ್ರಶಸ್ತಿ ಗೆದ್ದಿದ್ದರೂ, ಏಕದಿನ ಮಾದರಿಯಲ್ಲಿ 2018ರಲ್ಲಿ ನಡೆದ ಕೊನೇ ಏಷ್ಯಾಕಪ್ನಲ್ಲಿ ಭಾರತ ಪ್ರಶಸ್ತಿ ಗೆದ್ದಿತ್ತು. ಹೀಗಾಗಿ ಭಾರತವನ್ನೇ ಹಾಲಿ ಚಾಂಪಿಯನ್ ಮತ್ತು ಫೇವರಿಟ್ ತಂಡವನ್ನಾಗಿ ಪರಿಗಣಿಸಬಹುದು. ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನ ತಂಡವನ್ನು ಎದುರಿಸುವ ಮೂಲಕ ರೋಹಿತ್ ಶರ್ಮ ಪಡೆ ಶನಿವಾರ ಅಭಿಯಾನ ಆರಂಭಿಸಲಿದೆ. ಶ್ರೀಲಂಕಾ ತಂಡ ಕೆಲ ಪ್ರಮುಖ ಆಟಗಾರರ ಗಾಯದ ಹಿನ್ನಡೆ ಹೊಂದಿದ್ದರೆ, ಬಾಂಗ್ಲಾ ತಂಡ ಮತ್ತೆ ಶಕೀಬ್ ಅಲ್ ಹಸನ್ ಸಾರಥ್ಯ ಪಡೆದುಕೊಂಡಿದೆ. ಅಫ್ಘಾನಿಸ್ತಾನ ತಂಡ ಗಮನಾರ್ಹ ನಿರ್ವಹಣೆ ತೋರುವ ಹಂಬಲದಲ್ಲಿದೆ. ಹಿಂದಿನ 15 ಆವೃತ್ತಿಗಳಲ್ಲಿ 7ರಲ್ಲಿ ಭಾರತ ಚಾಂಪಿಯನ್ ಪಟ್ಟವೇರಿದೆ. ಶ್ರೀಲಂಕಾ 6 ಮತ್ತು ಪಾಕಿಸ್ತಾನ 2 ಬಾರಿ ಪ್ರಶಸ್ತಿ ಜಯಿಸಿವೆ.
ಪಾಕ್-ನೇಪಾಳ ಉದ್ಘಾಟನಾ ಪಂದ್ಯ
ಎರಡು ಬಾರಿಯ ಚಾಂಪಿಯನ್ ಪಾಕಿಸ್ತಾನ ಮತ್ತು ಇದೇ ಮೊದಲ ಬಾರಿಗೆ ಟೂರ್ನಿ ಆಡುತ್ತಿರುವ ನೇಪಾಳ ತಂಡಗಳ ನಡುವೆ 16ನೇ ಆವೃತ್ತಿಯ ಉದ್ಘಾಟನಾ ಪಂದ್ಯ ನಡೆಯಲಿದೆ. ತವರಿನ ಅನುಕೂಲಕರ ವಾತಾವರಣದಲ್ಲಿ ಪಾಕಿಸ್ತಾನ ತಂಡ ಶುಭಾರಂಭ ಕಾಣುವ ತವಕದಲ್ಲಿದೆ. ಇತ್ತೀಚೆಗಷ್ಟೇ ಐಸಿಸಿ ಏಕದಿನ ರ್ಯಾಂಕಿಂಗ್ನಲ್ಲಿ ನಂ. 1 ಪಟ್ಟಕ್ಕೇರಿರುವುದು ಬಾಬರ್ ಅಜಮ್ ಬಳಗದ ಆತ್ಮವಿಶ್ವಾಸ ಹೆಚ್ಚಿಸಿದೆ.
ಪಾಕ್-ಲಂಕಾ ಜಂಟಿ ಆತಿಥ್ಯ
ಮೂಲ ವೇಳಾಪಟ್ಟಿಯ ಪ್ರಕಾರ ಟೂರ್ನಿ ಸಂಪೂರ್ಣವಾಗಿ ಪಾಕಿಸ್ತಾನದಲ್ಲಿ ನಡೆಯಬೇಕಾಗಿತ್ತು. ಆದರೆ ರಾಜತಾಂತ್ರಿಕ ಬಿಕ್ಕಟ್ಟು ಮತ್ತು ಭದ್ರತಾ ಭೀತಿಯಿಂದ ಭಾರತ ತಂಡ ಪಾಕಿಸ್ತಾನಕ್ಕೆ ಹೋಗದ ಕಾರಣ, ಟೂರ್ನಿ ಶ್ರೀಲಂಕಾಕ್ಕೂ ವಿಸ್ತರಿಸಲ್ಪಟ್ಟಿದೆ. ಪಾಕ್ನಲ್ಲಿ 4 ಪಂದ್ಯಗಳು ನಡೆದರೆ, ಉಳಿದ 9 ಪಂದ್ಯಗಳು ಲಂಕಾದಲ್ಲಿ ನಡೆಯಲಿವೆ. ಭಾರತ ಎಲ್ಲ ಪಂದ್ಯಗಳನ್ನು ಲಂಕಾದಲ್ಲೇ ಆಡಲಿದ್ದರೆ, ಶ್ರೀಲಂಕಾ ಸಹಿತ ಉಳಿದೆಲ್ಲ ತಂಡಗಳು ಕನಿಷ್ಠ ಒಂದಾದರೂ ಪಂದ್ಯವನ್ನು ಪಾಕ್ನಲ್ಲಿ ಆಡಲಿದೆ.
ವಿಶ್ವಕಪ್ಗೆ ಸಮರಾಭ್ಯಾಸ
ಭಾರತದ ಆತಿಥ್ಯದಲ್ಲಿ ಅಕ್ಟೋಬರ್-ನವೆಂಬರ್ನಲ್ಲಿ ನಡೆಯಲಿರುವ ಏಕದಿನ ವಿಶ್ವಕಪ್ಗೆ ಸಿದ್ಧತೆ ಮತ್ತು 11ರ ಬಳಗವನ್ನು ಅಂತಿಮಗೊಳಿಸುವ ನಿಟ್ಟಿನಲ್ಲಿ ಎಲ್ಲ ತಂಡಗಳಿಗೂ ಈ ಟೂರ್ನಿ ಮಹತ್ವದ್ದಾಗಿದೆ. ಭಾರತ ಫೇವರಿಟ್ ಆಗಿದ್ದರೂ, ಸೂಪರ್-4ರಲ್ಲಿ ಪ್ರತಿ ಪಂದ್ಯವೂ “ಸೆಮಿಫೈನಲ್’ ಎನಿಸಲಿದೆ.
ಐಸಿಸಿ ಟೂರ್ನಿ ಬಳಿಕ ದೊಡ್ಡ ಕಾದಾಟ
1984ರಲ್ಲಿ ಆರಂಭಗೊಂಡ ಏಷ್ಯಾಕಪ್, ವಿವಿಧ ಐಸಿಸಿ ಟೂರ್ನಿಗಳ ಬಳಿಕ ಅತಿದೊಡ್ಡ ಮತ್ತು ಅತಿಹೆಚ್ಚು ತಂಡಗಳು ಆಡುವ ಅಂತಾರಾಷ್ಟ್ರೀಯ ಕ್ರಿಕೆಟ್ ಟೂರ್ನಿ ಎನಿಸಿದೆ. ಏಷ್ಯಾಕಪ್ ಮೊದಲಿಗೆ ಇಂತಿಷ್ಟೇ ವರ್ಷಗಳಿಗೆ ಎಂಬಂತೆ ನಡೆಯುತ್ತಿರಲಿಲ್ಲ. 2008ರಿಂದ 2018ರವರೆಗೆ ಪ್ರತಿ 2 ವರ್ಷಕ್ಕೊಮ್ಮೆ ಏಷ್ಯಾಕಪ್ ನಡೆದಿತ್ತು. 2020-2021ರಲ್ಲಿ ಕರೊನಾ ಹಾವಳಿಯಿಂದಾಗಿ ಟೂರ್ನಿ ನಡೆಯಲಿಲ್ಲ. ಹೀಗಾಗಿ ಈ ಬಾರಿ ಸತತ 2ನೇ ವರ್ಷ ಏಷ್ಯಾಕಪ್ ನಡೆಯುತ್ತಿದೆ.
ಈ ಬಾರಿ ಮತ್ತೆ ಏಕದಿನ ಮಾದರಿ
ಮೊದಲಿಗೆ ಏಕದಿನ ಮಾದರಿಯಲ್ಲಿ ಮಾತ್ರ ಏಷ್ಯಾಕಪ್ ನಡೆಯುತ್ತಿತ್ತು. ಆದರೆ ಟಿ20 ವಿಶ್ವಕಪ್ ಇರುವ ವರ್ಷಗಳಲ್ಲಿ ಅದರ ಪೂರ್ವಸಿದ್ಧತೆಗೆ ಅನುಕೂಲವಾಗುವ ದೃಷ್ಟಿಯಿಂದ ಟಿ20 ಮಾದರಿಯಲ್ಲೂ 2 ಟೂರ್ನಿ ನಡೆಸಲಾಗಿದೆ. 2016 ಮತ್ತು 2022ರಲ್ಲಿ ಟಿ20 ಮಾದರಿಯಲ್ಲಿ ಏಷ್ಯಾಕಪ್ ಆಯೋಜಿಸಲಾಗಿತ್ತು. ಈ ವರ್ಷ ಏಕದಿನ ವಿಶ್ವಕಪ್ ಸಿದ್ಧತೆ ದೃಷ್ಟಿಯಿಂದ ಮತ್ತೆ ಏಕದಿನ ಮಾದರಿಯಲ್ಲೇ ಏಷ್ಯಾಕಪ್ ನಡೆಯಲಿದೆ.
ಗುಂಪುಗಳು:
ಎ: ಭಾರತ, ಪಾಕಿಸ್ತಾನ, ನೇಪಾಳ
ಬಿ: ಶ್ರೀಲಂಕಾ, ಬಾಂಗ್ಲಾದೇಶ, ಅಫ್ಘಾನಿಸ್ತಾನ
ಟೂರ್ನಿ ಸ್ವರೂಪ
ಟೂರ್ನಿಯಲ್ಲಿ ಆಡುವ 6 ತಂಡಗಳನ್ನು ತಲಾ 3ರಂತೆ 2 ಗುಂಪುಗಳಾಗಿ ವಿಭಾಗಿಸಲಾಗಿದೆ. ರೌಂಡ್ ರಾಬಿನ್ ಲೀಗ್ ಬಳಿಕ ಪ್ರತಿ ಗುಂಪಿನ ಅಗ್ರ 2 ತಂಡಗಳು ‘ಸೂಪರ್-4’ ಹಂತಕ್ಕೇರಲಿವೆ. ಸೆ. 6ರಿಂದ ಸೂಪರ್-4ರಲ್ಲಿ ಎಲ್ಲ 4 ತಂಡಗಳು ತಲಾ ಒಮ್ಮೆ ಮುಖಾಮುಖಿ ಆಗಲಿವೆ. ಅಂತಿಮವಾಗಿ ಸೂಪರ್-4ರ ಅಗ್ರ 2 ತಂಡಗಳು ಸೆ. 17ರಂದು ಫೈನಲ್ ಪಂದ್ಯದಲ್ಲಿ ಪ್ರಶಸ್ತಿಗಾಗಿ ಹೋರಾಡಲಿವೆ.
ಗುಂಪು ಹಂತದ ವೇಳಾಪಟ್ಟಿ
ದಿನಾಂಕ: ಪಂದ್ಯ(ಸ್ಥಳ)
ಆ. 30: ಪಾಕಿಸ್ತಾನ-ನೇಪಾಳ (ಮುಲ್ತಾನ್)
ಆ. 31: ಶ್ರೀಲಂಕಾ-ಬಾಂಗ್ಲಾದೇಶ (ಪಲ್ಲೆಕಿಲೆ)
ಸೆ. 2: ಭಾರತ-ಪಾಕಿಸ್ತಾನ (ಪಲ್ಲೆಕಿಲೆ)
ಸೆ. 3: ಅಫ್ಘಾನಿಸ್ತಾನ-ಬಾಂಗ್ಲಾದೇಶ (ಲಾಹೋರ್)
ಸೆ. 4: ಭಾರತ-ನೇಪಾಳ (ಪಲ್ಲೆಕಿಲೆ)
ಸೆ. 5: ಅಫ್ಘಾನಿಸ್ತಾನ-ಶ್ರೀಲಂಕಾ (ಲಾಹೋರ್)
*ಎಲ್ಲ ಪಂದ್ಯ ಆರಂಭ: ಮಧ್ಯಾಹ್ನ 3.00
*ನೇರಪ್ರಸಾರ: ಸ್ಟಾರ್ ಸ್ಪೋರ್ಟ್ಸ್, ಹಾಟ್ಸ್ಟಾರ್
ನೇಪಾಳ ಹೊಸ ಎಂಟ್ರಿ
ಇತ್ತೀಚೆಗೆ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಉತ್ತಮ ಬೆಳವಣಿಗೆ ಕಾಣುತ್ತಿರುವ ನೇಪಾಳ, ಮೊದಲ ಬಾರಿಗೆ ಏಷ್ಯಾಕಪ್ನಲ್ಲಿ ಕಣಕ್ಕಿಳಿಯಲಿದೆ. ನೇಪಾಳ ಕ್ರಿಕೆಟ್ ಏಷ್ಯಾಕಪ್ಗೆ ಪ್ರವೇಶ ಪಡೆದಿರುವ 8ನೇ ದೇಶವೆನಿಸಿದೆ.
ಭಾರತಕ್ಕೆ ಬರ್ತಿದ್ದಾರೆ ಡಬ್ಲ್ಯುಡಬ್ಲ್ಯುಇ ತಾರೆ ಜಾನ್ ಸೀನಾ; ಎಲ್ಲಿ, ಯಾವಾಗ ಸ್ಪರ್ಧೆ? ಇಲ್ಲಿದೆ ಮಾಹಿತಿ…