ನವದೆಹಲಿ: ಬೋಯಿಂಗ್ ವಿಮಾನಗಳ ಮಾರಾಟವು ಮೇ ತಿಂಗಳಲ್ಲಿ ವ್ಯಾಪಕ ಹಿನ್ನಡೆ ಅನುಭವಿಸಿದೆ. ಈ ಕಂಪನಿಯ ಅತಿಹೆಚ್ಚು ಮಾರಾಟವಾಗುವ 737 ಮ್ಯಾಕ್ಸ್ ಮಾದರಿ ವಿಮಾನಕ್ಕೆ ಸತತ ಎರಡನೇ ತಿಂಗಳು ಯಾವುದೇ ಬೇಡಿಕೆಗಳು ಬಂದಿಲ್ಲ.
ಕಂಪನಿಯು ಕೇವಲ ನಾಲ್ಕು ಹೊಸ ವಿಮಾನಗಳಿಗೆ ಆರ್ಡರ್ಗಳನ್ನು ಪಡೆದಿದೆ. ಇದು ಯುರೋಪ್ನ ಪ್ರತಿಸ್ಪರ್ಧಿ ಕಂಪನಿ ಏರ್ಬಸ್ಗೆ ಹೋಲಿಸಿದರೆ ಸಾಕಷ್ಟು ಹಿನ್ನಡೆಯಾಗಿದೆ. ಏರ್ಬಸ್ ಇದೇ ಅವಧಿಯಲ್ಲಿ 15 ವಿಮಾನಗಳಿಗೆ ಆರ್ಡರ್ ಪಡೆದುಕೊಂಡಿದೆ.
ಏರೋಲಿನಾಸ್ ಅರ್ಜೆಂಟೀನಾಸ್ ವಿಮಾನಯಾನ ಸಂಸ್ಥೆ ಕೂಡ ತಾನು ಒಂದು ಮ್ಯಾಕ್ಸ್ ಜೆಟ್ ವಿಮಾನಕ್ಕೆ ನೀಡಿದ್ದ ಆರ್ಡರ್ ಅನ್ನು ಕೂಡ ರದ್ದುಗೊಳಿಸಿದೆ, ಈ ಮೂಲಕ ಬೋಯಿಂಗ್ನ ನಿವ್ವಳ ಮಾರಾಟವು ಈ ತಿಂಗಳಿಗೆ ಮೂರಕ್ಕೆ ಇಳಿಯಿತು. ಈ ಹಿನ್ನೆಲೆಯಲ್ಲಿ ಬೋಯಿಂಗ್ ಕಂಪನಿಯ ಷೇರುಗಳ ಬೆಲೆ ಕುಸಿತ ಕಂಡಿದೆ. ಹಲವಾರು ಸಮಸ್ಯೆಗಳು ಬೋಯಿಂಗ್ನ ಉತ್ಪಾದನೆ ಮತ್ತು ಮಾರಾಟದ ಮೇಲೆ ಪರಿಣಾಮ ಬೀರುತ್ತಿವೆ.
ಅಲಾಸ್ಕಾ ಏರ್ಲೈನ್ಸ್ನ ಮ್ಯಾಕ್ಸ್ ವಿಮಾನದಲ್ಲಿ ಬಾಗಿಲು ಕಿತ್ತುಹೋದ ಘಟನೆಯ ನಂತರ ಮತ್ತು ತ್ವರಿತ ಉತ್ಪಾದನೆಗಾಗಿ ಅಡ್ಡ ದಾರಿಗಳನ್ನು ಅನುಸರಿಸುವ ಕುರಿತ ಆರೋಪಗಳ ಹಿನ್ನೆಲೆಯಲ್ಲಿ ಅಮೆರಿಕದ ಫೆಡರಲ್ ಏವಿಯೇಷನ್ ಅಡ್ಮಿನಿಸ್ಟ್ರೇಷನ್, 737 ಮ್ಯಾಕ್ಸ್ ವಿಮಾನಗಳ ಉತ್ಪಾದನೆಯನ್ನು ಮಿತಿಗೊಳಿಸುತ್ತಿದೆ.