Sunday, 25th June 2017  

Vijayavani

1. ಇಂದಿನಿಂದ ಪ್ರಧಾನಿ ಅಮೆರಿಕಾ ಪ್ರವಾಸ- ವೈಟ್‌ಹೌಸ್‌ನಲ್ಲಿ ಮೋದಿಗೆ ವಿಶೇಷ ಡಿನ್ನರ್‌- ಟ್ರಂಪ್‌ರ ಮೊದಲ ಅತಿಥಿಯಾಗಲಿದ್ದಾರೆ ನರೇಂದ್ರ ಮೋದಿ 2. ಹೈವೇಗಳಲ್ಲಿ ಮದ್ಯ ಮಾರಾಟ ನಿಷೇಧ ವಿಚಾರ- ಹೋಟೆಲ್​, ರೆಸ್ಟೋರೆಂಟ್‌ಗಳಲ್ಲಿ ಎಣ್ಣೆಗೆ ಅವಕಾಶ- ರಂಗೋಲಿ ಕೆಳಗೆ ತೂರಿದ ಪಂಜಾಬ್​ ಸರ್ಕಾರ 3. ಇನ್ಫೋಸಿಸ್‌ ವಿರುದ್ಧ ವೀಸಾ ನಿಯಮ ಉಲ್ಲಂಘನೆ ಆರೋಪ- ಆರುವರೆ ಕೋಟಿ ದಂಡ ವಿಧಿಸಿದ ನ್ಯೂಯಾರ್ಕ್‌ ಸರ್ಕಾರ- ಆರೋಪ ಅಲ್ಲಗಳೆದ ಇನ್ಫೋಸಿಸ್‌ 4. ಕಷ್ಟ ಎದುರಾದ್ರೆ ಶಾಲೆಗೆ ಹರಕೆ- ಇಷ್ಟಾರ್ಥ ಸಿದ್ಧಿಯಾದ್ರೆ ವಿವಿಧ ಕೊಡುಗೆ- ಬಂಟ್ವಾಳದ ಸೂರಿಬೈಲ್​ನಲ್ಲಿ ಶಾಲೆಯೇ ದೇವರು 5. ಭಾರತ ವೆಸ್ಟ್‌ವಿಂಡೀಸ್‌ ಕ್ರಿಕೆಟ್‌ ಸರಣಿ- ಮೊದಲ ಪಂದ್ಯ ವರುಣನಿಗೆ ಬಲಿ- ಮಳೆಯಲ್ಲಿ ತೇಲಿಹೋದ ಶಿಖರ್‌ ಧವನ್‌, ರಹಾನೆ ಅರ್ಧ ಶತಕ
Breaking News :

ದಾರಿದ್ರ್ಯ ನಿವಾರಣೆಗೆ ವಿವೇಕಾನಂದರ ಪರಿಹಾರ ಮಂತ್ರ

Friday, 28.04.2017, 3:05 AM       No Comments

ಸಮಾಜ, ರಾಷ್ಟ್ರವನ್ನು ಜಾಗೃತಗೊಳಿಸಲು ಅವಿರತವಾಗಿ ಶ್ರಮಿಸಿದ ಸ್ವಾಮಿ ವಿವೇಕಾನಂದರು ಭಾರತವನ್ನು ಕಾಡುತ್ತಿರುವ ಹಲವು ಸಮಸ್ಯೆಗಳಿಗೆ ಪರಿಹಾರ ಸೂಚಿಸಿದರು. ದೀನದಲಿತರ ಬಗ್ಗೆ, ಬಡ-ದುರ್ಬಲವರ್ಗದವರ ಬಗ್ಗೆ ತೋರಿದ ಕಳಕಳಿ, ಪ್ರೀತಿ ನಿಜಕ್ಕೂ ಅನುಕರಣೀಯ. ಹಾಗಾಗಿಯೇ ಸ್ವಾಮೀಜಿ ಸಂದೇಶಗಳು ಇಂದಿಗೂ ಪ್ರಸ್ತುತವಾಗಿವೆ.

| ಸ್ವಾಮಿ ವೀರೇಶಾನಂದ ಸರಸ್ವತೀ

ಜಗತ್ತು ಕಂಡ ಶ್ರೇಷ್ಠ ಮಾನವತಾವಾದಿಗಳಲ್ಲಿ ಸ್ವಾಮಿ ವಿವೇಕಾನಂದರು ಅಗ್ರಮಾನ್ಯರೆನಿಸಿದ್ದಾರೆ. ಅವರು ತಮ್ಮ ಅತ್ಯುತ್ತಮ ಚಿಂತನೆಗಳ ಮೂಲಕ ಮನುಷ್ಯಲೋಕದ ಆಲೋಚನಾಲಹರಿಯನ್ನೇ ಸಕಾರಾತ್ಮಕವಾಗಿ ಬದಲಿಸಿದ ರೆಂದರೆ ಉತ್ಪ್ರೇಕ್ಷೆಯಲ್ಲ. ಸ್ವಾಮಿ ವಿವೇಕಾನಂದರು ಮನುಷ್ಯ ಸಂಕುಲದ ಅಭಿವೃದ್ಧಿ ಪಥದಲ್ಲಿನ ಎಡರು-ತೊಡರುಗಳನ್ನು ವಿಮಶಿಸಿ ಪರಿಹಾರೋಪಾಯವನ್ನು ಸೂಚಿಸಿದ್ದಾರೆ. ವಿಶ್ವಮಾನವರಾದ ಸ್ವಾಮಿ ವಿವೇಕಾನಂದರು ಭಾರತದ ಸಮಗ್ರ ಇತಿಹಾಸವನ್ನು ಆಮೂಲಾಗ್ರವಾಗಿ ಅಧ್ಯಯನಗೈದು ಈ ಪರಂಪರೆಯು ಹಾದು ಬಂದ ವಿವಿಧ ಹಂತಗಳನ್ನು ನಿಷ್ಪಕ್ಷಪಾತವಾಗಿ ವಿಶ್ಲೇಷಿಸಿದ್ದಾರೆ. ಭಾರತದ ಬಗ್ಗೆ ನಮಗೆ ವಿವೇಕಾನಂದರಿತ್ತ ಅಭಿಪ್ರಾಯಗಳಲ್ಲಿ ವಾಸ್ತವವಿದೆ, ನೈಜತೆಯಿದೆ. ಅವುಗಳಲ್ಲಿ ಪೂರ್ವಾಗ್ರಹದ ಸೋಂಕಿಲ್ಲ, ದ್ವಂದ್ವ ನಿಲುವುಗಳಿಗೆ ಅವಕಾಶವಿಲ್ಲ.

ದಾರಿದ್ರ್ಯ ನಿವಾರಣೆಗೆ ವಿವೇಕಾನಂದರ ಚಿಂತನೆಗಳ ಪರಿಹಾರೋಪಾಯ ವನ್ನು ಕುರಿತು ಆಲೋಚಿಸಿದಾಗ ‘ದಾರಿದ್ರ್ಯ ಎಂಬ ವಿಷಯವನ್ನು ಕೇವಲ ಆರ್ಥಿಕ ದೃಷ್ಟಿಯಿಂದ ವಿಶ್ಲೇಷಿಸಿದರೆ ಅಪರಿಪೂರ್ಣವಾಗುತ್ತದೆ. ‘ದಾರಿದ್ರ್ಯ ಎಂಬುದು ‘ಕೊರತೆ’ಯನ್ನೂ ಸೂಚಿಸುತ್ತದೆ. ಆದ್ದರಿಂದ ಈ ವಿಷಯದ ಕುರಿತಾಗಿ ಆಳವಾದ ಚಿಂತನೆ ಅತ್ಯಗತ್ಯ. ಸ್ವಾಮಿ ವಿವೇಕಾನಂದರು ಸಮಸ್ತ ಮನುಕುಲದ ಅಭ್ಯುದಯವನ್ನು ಅವಲೋಕಿಸಿರುವುದರಿಂದ ನಾವು ಪೌರ್ವಾತ್ಯ-ಪಾಶ್ಚಾತ್ಯ ಎಂಬ ದ್ವಂದ್ವಕ್ಕೆ ಗುರಿಮಾಡದೆ ಈ ವಿಷಯವನ್ನು ವಿಶ್ಲೇಷಿಸಬೇಕಿದೆ.

ಶಿಕ್ಷಣ: ಮಾನವ ಸಮಾಜದಲ್ಲಿ ಮನೆಮಾಡಿರುವ ವೈಯಕ್ತಿಕ ಹಾಗೂ ಸಾಮಾಜಿಕ ಸಮಸ್ಯೆಗಳಿಗೆ ಶಿಕ್ಷಣವೇ ಪರಿಹಾರ ಎಂಬುದು ವಿವೇಕಾನಂದರ ಅಭಿಮತ. ‘ಶಿಕ್ಷಣವು ಮಾನವನನ್ನು ಸೀಮಿತ ಸ್ತರದಿಂದ ಅಸೀಮ ಹಂತಕ್ಕೆ ಒಯ್ಯುವಂಥದ್ದು’ ಎಂದಿದ್ದಾರೆ ಸ್ವಾಮಿ ವಿವೇಕಾನಂದರು. ‘ಶಿಕ್ಷಣವೆಂದರೆ ವ್ಯಕ್ತಿತ್ವ ನಿರ್ವಣ, ವ್ಯಕ್ತಿತ್ವ ನಿರ್ವಣದ ಮೂಲಕ ಚಾರಿತ್ರ್ಯ ನಿರ್ವಣ; ಚಾರಿತ್ರ್ಯ ನಿರ್ವಣದಿಂದ ಮಾತ್ರವೇ ರಾಷ್ಟ್ರನಿರ್ವಣ’ ಎಂಬ ಸ್ವಾಮಿ ವಿವೇಕಾನಂದರ ಅಭಿಪ್ರಾಯವು ಶಿಕ್ಷಣವು ಪ್ರಥಮತಃ ವ್ವಕ್ತಿಯ ಅಭ್ಯುದಯ ತದನಂತರ ಸಮಾಜ, ರಾಷ್ಟ್ರ ಹಾಗೂ ಅಂತಿಮವಾಗಿ ವಿಶ್ವದ ಶ್ರೇಯಸ್ಸಿಗೆ ಪ್ರೇರಕವಾಗುತ್ತದೆ ಎಂಬ ಸತ್ಯವನ್ನು ಸೂಚಿಸುತ್ತದೆ.

ಹೊಸಹೊಸ ಭಾವನೆಗಳನ್ನು ಸ್ವಭಾವ ಸಹಜವಾಗಿಸಿಕೊಳ್ಳುವುದನ್ನು ಶಿಕ್ಷಣ ಎಂದು ಮನಗಂಡಿದ್ದ ಅವರು ಪ್ರತಿಯೊಬ್ಬ ವ್ಯಕ್ತಿಯೂ ಚಾರಿತ್ರ್ಯ್ಷಮತೆಯನ್ನು ನೀಡುವ ಶಿಕ್ಷಣ ಮತ್ತು ಧರ್ಮಕ್ಕೆ ಮೊರೆಹೋಗಬೇಕೆಂಬ ಅಭಿಪ್ರಾಯ ನೀಡುತ್ತಾರೆ. ‘ಉನ್ನತ ವಿಚಾರಗಳನ್ನು ವ್ಯಕ್ತಿಯೊಬ್ಬನಿಗೆ ನೀಡಿ ಆತನನ್ನು ಹುಲಿಯಾಗಿಸದಿದ್ದರೆ ಅವನು ಖಂಡಿತ ನರಿಯಾಗುತ್ತಾನೆ’ ಎಂದು ಸ್ವಾಮೀಜಿ ಎಚ್ಚರಿಸುತ್ತಾರೆ. ಧರ್ಮ-ಸಂಸ್ಕೃತಿಗಳ ಅಧ್ಯಯನದ ಜೊತೆಗೆ ಪಾಶ್ಚಾತ್ಯ ವಿಜ್ಞಾನದ ಅಧ್ಯಯನಕ್ಕೆ ಸ್ವಾಮೀಜಿಯವರು ಒತ್ತು ನೀಡಲು ಕಾರಣ, ವಿಜ್ಞಾನ ವನ್ನು ಅಧ್ಯಯನಗೈಯ್ದು ಅಳವಡಿಸಿಕೊಳ್ಳುವುದರಿಂದ ಲೌಕಿಕ ಸಂಪತ್ತು ವೃದ್ಧಿಯಾಗುತ್ತದೆ ಎಂದು.

ಅರ್ಥವ್ಯವಸ್ಥೆ: ಭಾರತದಾದ್ಯಂತ ಕಾಲ್ನಡಿಗೆಯಲ್ಲಿ ಸಂಚರಿಸಿ ದೇಶದ ಸ್ಥಿತಿಗತಿಗಳನ್ನು ಅಧ್ಯಯನ ಮಾಡುವಲ್ಲಿ ವಿವೇಕಾನಂದರು ಯಶಸ್ವಿಯಾದರು. ಪಾಶ್ಚಾತ್ಯ ಆಡಳಿತವೂ ಭಾರತದ ಆರ್ಥಿಕ ದುಃಸ್ಥಿತಿಗೆ ಕಾರಣವಾಗಿದ್ದಿತು. ಬಡವರು ಎಷ್ಟೇ ಶ್ರಮಜೀವಿಗಳಾದರೂ ಆರ್ಥಿಕವಾಗಿ ಮೇಲೇರದಂತೆ ಮಾಡುತ್ತಿದ್ದ ದಲ್ಲಾಳಿಗಳ ಕುಟಿಲ ತಂತ್ರಗಳನ್ನು ಅವರು ಗುರುತಿಸಿದ್ದರು.

ಕೃಷಿಕರಲ್ಲಿ, ಕಾರ್ವಿುಕ ವರ್ಗದಲ್ಲಿ ಆತ್ಮವಿಶ್ವಾಸವನ್ನು ಮೂಡಿಸಲು ಸರ್ವಪ್ರಯತ್ನಗೈದರು. ‘‘ಜನಸಾಮಾನ್ಯರ ಬೆವರು, ಪರಿಶ್ರಮದಿಂದ ಬದುಕಿನಲ್ಲಿ ಮೇಲೇರಿ ಬಂದ ನಂತರ ಅವರನ್ನು ನಿರ್ಲಕ್ಷಿಸುವ ವಿದ್ಯಾವಂತರು ಎನಿಸಿಕೊಂಡವರನ್ನು ನಾನು ದೇಶದ್ರೋಹಿಗಳೆಂದೇ ಪರಿಗಣಿಸುತ್ತೇನೆ’’ ಎಂದು ಸಮಾಜದ ವಿದ್ಯಾವಂತರನ್ನು ಛೇಡಿಸುತ್ತಾರೆ. ವಿದ್ಯಾವಂತರ ಮತ್ತು ಶ್ರೀಮಂತರ ಅವಿವೇಕವನ್ನು ಕಂಡು, “Give light to the poor, more light to the rich. Give light to uneducated and more light to educated” ಎನ್ನುತ್ತಾರೆ.

ಭಾರತೀಯರಿಗೆ ವ್ಯವಸಾಯವನ್ನು ಒಂದು ಉದ್ಯೋಗವಾಗಿ ರೂಪಿಸಿಕೊಳ್ಳಬೇಕೆಂದು ಸ್ವಾಮೀಜಿ ಕರೆ ಇತ್ತಿದ್ದಾರೆ. ಅವರು ನೀಡುವ ಭರವಸೆ ಅದ್ಭುತವಾಗಿದೆ- ‘‘ಭಾರತೀಯ ಪ್ರಾಚೀನ ಋಷಿಗಳು ಕೃಷಿಕರಾಗಿದ್ದರು. ಆಧುನಿಕ ಜಗತ್ತಿನಲ್ಲಿ ಅಮೆರಿಕ ವ್ಯವಸಾಯವನ್ನು ಪ್ರಗತಿಪಥದಲ್ಲಿ ಒಯ್ದಿರುವುದು ಗಮನೀಯ ಅಂಶ. ಆಧುನಿಕ ಭಾರತವು ಕೃಷಿ ವಿಜ್ಞಾನವನ್ನು ಆಮೂಲಾಗ್ರವಾಗಿ ಅಧ್ಯಯನ ಮಾಡಿ ವ್ಯವಸಾಯದಲ್ಲಿ ಅಳವಡಿಸಬೇಕು. ಅವೈಜ್ಞಾನಿಕ ಪದ್ಧತಿಗಳಿಂದ ಕೃಷಿ ಉತ್ಪಾದನೆ ಕ್ಷೀಣಿಸುತ್ತಿದೆ. ಗ್ರಾಮೀಣ ಜನತೆ ಹಳ್ಳಿಗಾಡಿನ ಉತ್ತಮ ಪರಿಸರದಲ್ಲಿ ವ್ಯವಸಾಯವನ್ನು ಕೈಗೊಂಡು ಆರೋಗ್ಯದಿಂದ ನೆಮ್ಮದಿಯಿಂದ ಬದುಕಲು ಸಾಧ್ಯ’’ ಎಂದಿದ್ದಾರೆ.

ವ್ಯವಸಾಯ ಕ್ಷೇತ್ರವನ್ನು ನಿರ್ಲಕ್ಷಿಸದಂತೆ ಜನಸಾಮಾನ್ಯರನ್ನು ಕೋರಿದ ಸ್ವಾಮೀಜಿ, ವಿಜ್ಞಾನದ ಅಧ್ಯಯನದಿಂದ ರಾಷ್ಟ್ರದ ಔದ್ಯೋಗಿಕ ಕ್ಷೇತ್ರವನ್ನು ಬೆಳೆಸಿ ಲೌಕಿಕ ಸಂಪತ್ತನ್ನು ಗಳಿಸಬಹುದೆಂದು ತಿಳಿವಳಿಕೆ ನೀಡಿದರು. ಅಮೆರಿಕ ಪ್ರವಾಸ ಸಂದರ್ಭದಲ್ಲಿ ಹಡಗಿನಲ್ಲಿ ಭೇಟಿಯಾದ ಶ್ರೀಮಂತರಾದ ಜೆಮ್ೇಠ್​ಜೀ ಟಾಟಾರವರಿಗೆ ಭಾರತದಲ್ಲಿ ಕೈಗಾರಿಕೆ ಉದ್ದಿಮೆಯನ್ನು ಮತ್ತು ವಿಜ್ಞಾನ ಸಂಶೋಧನಾ ಕೇಂದ್ರಗಳನ್ನು ಸ್ಥಾಪಿಸಲು ಮನವಿ ಮಾಡಿದರು.

ಸಾಮಾಜಿಕ ಸಾಮರಸ್ಯ: ಸ್ವಾಮಿ ವಿವೇಕಾನಂದರು ಸ್ವಾತಂತ್ರ್ಯೂರ್ವದ ಭಾರತವನ್ನು ಆಮೂಲಾಗ್ರವಾಗಿ ಅಧ್ಯಯನ ಮಾಡಿದರು. ಕ್ಷುದ್ರ ದ್ವೇಷಾಸೂಯೆ ಮತ್ತು ಸಾಮರಸ್ಯದ ಅಭಾವವು ಭಾರತದಲ್ಲಿ ಇರುವುದನ್ನು ಮನಗಂಡರು. ಆಲ್ವರಿನ ದಿವಾನ ಮೇಜರ್ ರಾಮಚಂದ್ರಜೀ ಅವರು ಸ್ವಾಮೀಜಿ ಅವರನ್ನು ತಮ್ಮ ಮನೆಗೆ ಅತಿಥಿಯಾಗಿ ಆಗಮಿಸಬೇಕೆಂದು ವಿನಂತಿಸಿದಾಗ ಅವರು ಹೀಗೆನ್ನುತ್ತಾರೆ: ‘‘ಶ್ರೀಮಂತರು, ವಿದ್ಯಾವಂತರು ನನ್ನನ್ನು ಕಾಣಲು ಸಾಧ್ಯವಿರುವಂತೆ ಬಡವರು, ಅವಿದ್ಯಾವಂತರಿಗೂ ಯಾವಾಗೆಂದರೆ ಆವಾಗ ಬಂದು ಕಾಣಲು ಅವಕಾಶವಿರಬೇಕು’’. ಬಡವರು ಸಾಮಾನ್ಯವಾಗಿ ಅವಿದ್ಯಾವಂತರಾಗಿರುವು ದರಿಂದ ಇತರರ ದೃಷ್ಟಿಯಲ್ಲಿ ತಿರಸ್ಕೃತರಾಗುತ್ತಾರೆ. ಅವರು ತಮ್ಮನ್ನು ಭೇಟಿ ಮಾಡುವ ಅವಕಾಶದಿಂದ ವಂಚಿತರಾಗಬಾರದು ಎಂಬುದು ಅವರ ಇಂಗಿತ.

ರಾಷ್ಟ್ರದ ಸಮಗ್ರ ಅಭಿವೃದ್ಧಿಗೆ ಸರ್ವರ ಉದ್ಧಾರವೂ ಅನಿವಾರ್ಯ. ಕೆಲವರ ಉದ್ಧಾರ ಮಾತ್ರ ರಾಷ್ಟ್ರದ ಉದ್ಧಾರ ಎನಿಸದು ಎಂದು ಹೇಳುವ ಮೂಲಕ ಸಮಾಜದ ಶೋಷಣೆಗೆ ಸಿಲುಕಿ ಮೃತಹೀನರಂತೆ ಬದುಕುತ್ತಿದ್ದವರಲ್ಲಿ ದೈವತ್ವವನ್ನು ತೋರಿಸಿಕೊಟ್ಟರು.‘‘ಯಾರನ್ನೂ ಪಾಪಿಗಳೆನ್ನಬೇಡಿ. ಪ್ರತಿಯೊಬ್ಬನೂ ಆ ನಿತ್ಯಶುದ್ಧ ಬುದ್ಧ ಮುಕ್ತನಾದ ಆತ್ಮನೇ ಆಗಿದ್ದಾನೆ. ಓ, ಅಮತಪುತ್ರನೇ! ಈ ದಿವ್ಯಸತ್ಯವನ್ನು ಸಕಲರಿಗೂ ಸಾರಿ ಹೇಳು!’’ ಎಂಬ ಉಪನಿಷತ್ತಿನ ವಾಣಿಯು ಪ್ರತಿಧ್ವನಿಸುವಂತೆ ಮಾಡಿದರು.

ದೇಶದ ಕೋಟ್ಯನುಕೋಟಿ ದೀನದಲಿತರ ಪುನರುತ್ಥಾನಕ್ಕೆ ಅವರು ನೂತನ ಕಾರ್ಯಸೂಚಿಯನ್ನು ಮುಂದಿಟ್ಟರು. ಇದು ಆಧುನಿಕ ವೇದಾಂತವೂ ಹೌದು! ‘‘ದೀನರು ನಿಮ್ಮ ದೇವರಾಗಲಿ, ದರಿದ್ರರು ನಿಮ್ಮ ದೇವರಾಗಲಿ…’’ ಎಂದು ಸಾರಿದರು. ಸಮಾಜದ ಯಾವ ಸಮೂಹವು ಇತರರನ್ನು ದೀನರನ್ನಾಗಿ, ದರಿದ್ರರನ್ನಾಗಿ, ಪಾಪಿಗಳನ್ನಾಗಿ, ಮೂರ್ಖರನ್ನಾಗಿಸಿದ್ದಿತೋ ಈಗ ಅವರ ಉದ್ಧಾರಕ್ಕೆ ಈ ಸುಧಾರಿತ ಸಮೂಹವನ್ನೇ ನಿಯೋಜಿಸಿದರು.

ನಿಮ್ನ ವರ್ಗದವರಿಗಾಗಿ ಅವರ ಮನಸ್ಸು ಎಷ್ಟು ಮಮ್ಮಲ ಮರುಗಿತ್ತು ಎಂಬುದನ್ನು ತಿಳಿಯಬೇಕಾದರೆ ಅವರು ಕನ್ಯಾಕುಮಾರಿಯ ಸಮುದ್ರ ಮಧ್ಯದ ಬಂಡೆಯ ಮೇಲೆ ಜಗನ್ಮಾತೆಯನ್ನು ಕುರಿತು ಮಾಡಿದ ಪ್ರಾರ್ಥನಾನುಡಿಗಳನ್ನು ಗಮನಿಸಬೇಕು. ಅವರೆನ್ನುತ್ತಾರೆ, ‘‘ಹೇ ಜಗನ್ಮಾತೆ, ನನಗೆ ಸ್ವರ್ಗಬೇಡ, ಮುಕ್ತಿಬೇಡ, ನನ್ನ ಭಾರತದ ಕೋಟಿ ಕೋಟಿ ದೀನ-ದಲಿತ-ದರಿದ್ರರನ್ನು ಮೇಲೆತ್ತುವ ಮಾರ್ಗ ತೋರು’’.

ಆತ್ಮವಿಶ್ವಾಸ: ನಿರಂತರ ದಾಸ್ಯದ ಜೀವನದಿಂದ ಭಾರತೀಯರು ತಮ್ಮ ಪರಂಪರೆಯಲ್ಲಿ, ತಮ್ಮ ಧರ್ಮದಲ್ಲಿ, ಕಡೆಗೆ ತಮ್ಮಲ್ಲೇ ನಂಬಿಕೆ ಕಳೆದುಕೊಂಡದ್ದು ಇತಿಹಾಸದ ಆಘಾತಕಾರಿ ಘಟ್ಟ. ತಮ್ಮನ್ನು ಪಾಪಿಗಳೆಂದು ತಿಳಿದು ಬದುಕುತ್ತಿದ್ದ ಭಾರತೀಯರಿಗೆ ಪ್ರತಿಯೊಬ್ಬರಲ್ಲೂ ಸುಪ್ತವಾಗಿರುವ ದಿವ್ಯತೆ, ಪವಿತ್ರತೆ ಹಾಗೂ ಸರ್ವಶಕ್ತತೆಯ ಸಂದೇಶವನ್ನಿತ್ತರು. ‘‘ಯಾರನ್ನೂ ಪಾಪಿಗಳೆನ್ನಬೇಡಿ, ಇತರರನ್ನು ಪಾಪಿಗಳೆಂದು ಕರೆಯುವುದೇ ಮಹಾಪಾಪ’’ ಎಂದು ಎಚ್ಚರಿಸಿದರು.

ಭಾರತೀಯರ ಬುದ್ಧಿ, ಮನಸ್ಸುಗಳಿಗೆ ಶಕ್ತಿಸಂದೇಶ ಚಿಕಿತ್ಸೆಯ ಅವಶ್ಯಕತೆ ಯನ್ನು ಮನಗಂಡ ಸ್ವಾಮೀಜಿ ಶಕ್ತಿವಂತನಾದ ದುಷ್ಟನು ಹೇಡಿಗಿಂತ ಉತ್ತಮನೆಂದು ಸಾರಿದರು. ಸಂಸ್ಕಾರಬಲದಿಂದ ವ್ಯಕ್ತಿಯೊಬ್ಬನು ಸಂತನಾಗ ಬಹುದಾದರೆ ಪಾಪದ ಪ್ರಾಯಶ್ಚಿತ್ತ ಹೊಂದಿ ಸನ್ಮಾರ್ಗದಲ್ಲಿ ಸಾಗಲು ಸಂಕಲ್ಪಿಸಿ ಕಾರ್ಯಪ್ರವೃತ್ತನಾಗುವ ದುಷ್ಟನ ಭವಿಷ್ಯವು ಉತ್ತಮವಾಗಿರಲೇಬೇಕು ಎಂದು ಜನಸಾಮಾನ್ಯರಿಗೆ ಮನವರಿಕೆ ಮಾಡಿಕೊಟ್ಟರು.

ರಾಷ್ಟ್ರಭಕ್ತಿ: ಭಾರತೀಯರಿಗೆ ಹಲವು ಶತಮಾನಗಳ ದಾಸ್ಯ ಜೀವನವು ತಮ್ಮ ಸ್ವಂತಿಕೆಯನ್ನು ಕಳೆದುಕೊಳ್ಳುವುದಕ್ಕಷ್ಟೇ ಸೀಮಿತವಾಗಿಸದೆ ಅದನ್ನು ನಿಶ್ಯೇಷಗೊಳಿಸಿದೆ. ಭಾರತೀಯರಿಗೆ ಪಾಶ್ಚಾತ್ಯರಿತ್ತ ಭಾರತೀಯ ಇತಿಹಾಸವು ಅವ್ಯವಸ್ಥಿತವಾಗಿದ್ದುದನ್ನು ಸ್ವಾಮಿ ವಿವೇಕಾನಂದರು ಮನಗಂಡರು. ಭಾರತದ ಚರಿತ್ರೆಯನ್ನು ಭಾರತೀಯರೇ ಬರೆಯಬೇಕೆಂಬುದು ಸ್ವಾಮೀಜಿಯವರ ಸ್ಪಷ್ಟ ನಿಲುವಾಗಿತ್ತು. ‘ಭಾರತವು ನಿಜಕ್ಕೂ ಸಕಲ ಧರ್ಮಗಳ ತವರು, ಆಧ್ಯಾತ್ಮಿಕತೆಯ ಉಗಮಸ್ಥಾನ, ನಾಗರಿಕತೆಯ ತೊಟ್ಟಿಲು’ ಎಂಬ ರಾಷ್ಟ್ರಭಾವವು ಪ್ರತಿಯೊಬ್ಬ ಪ್ರಜೆಯಲ್ಲೂ ಜಾಗೃತವಾಗಿ, ಅವನೊಬ್ಬ ಕೆಚ್ಚೆದೆಯ ಪ್ರಜೆಯಾಗಿ ನಿರ್ವಣವಾಗಬೇಕೆಂಬ ಆವಶ್ಯಕತೆಯನ್ನು ಮನಗಂಡ ಸ್ವಾಮೀಜಿ ರಾಷ್ಟದ ಐತಿಹಾಸಿಕ ಪ್ರಜ್ಞೆಯಿರದ ಪ್ರಜೆಯು ನಿಷ್ಕ್ರಿಯನಾಗುತ್ತಾನೆಂದು ಎಚ್ಚರಿಸುತ್ತಾರೆ.

ಪೌರತ್ವ ಎಂಬ ನಾಣ್ಯಕ್ಕೆ ಸ್ವಾತಂತ್ರ್ಯ ಮತ್ತು ಜವಾಬ್ದಾರಿಯೆಂಬ ಎರಡು ಮುಖಗಳಿವೆ ಎಂಬ ಸತ್ಯವನ್ನು ಸ್ಪಷ್ಟಪಡಿಸುತ್ತಾರೆ. ಸೇವೆ ಎಂಬುದು ಕೇವಲ ಭಾವುಕತನವೂ, ತಾತ್ಕಾಲಿಕವೂ ಆಗದೆ ಜೀವನದ ದೃಷ್ಟಿಕೋನವಾಗಬೇಕೆಂದು ಸೂಚಿಸಿದ್ದಾರೆ. ಸ್ವಾಮಿ ವಿವೇಕಾನಂದರ ಜೀವನ ಸಂದೇಶಗಳನ್ನು ಅಧ್ಯಯನ ಮಾಡುವುದರಿಂದ ನಾವು ಸರ್ವರೀತಿಯ ದಾರಿದ್ರ್ಯಳಿಂದ ಮುಕ್ತರಾಗಲು ಸಾಧ್ಯ. ಇಂದಿನ ಸಮಾಜದಲ್ಲಿನ ಸಮಸ್ಯೆಗಳಿಗೆ ದುಷ್ಟ ಜನರ ಐಕಮತ್ಯ ಮತ್ತು ಕಾರ್ಯಪ್ರಕ್ರಿಯೆಗಳಿಗಿಂತ ಸಜ್ಜನರ ನಿಷ್ಕ್ರಿಯತೆಯೇ ಪ್ರಧಾನ ಕಾರಣ ಎಂದಿದ್ದಾರೆ ಸ್ವಾಮೀಜಿ. ಶೀಲವಂತರು ಹಾಗೂ ವಿವೇಕಿಗಳು ರಾಷ್ಟ್ರವನ್ನು ಸದೃಢವಾಗಿ ನಿರ್ವಿುಸಬಲ್ಲರು.

ಬಡವ-ಶ್ರೀಮಂತರೆನ್ನದೆ, ವಿದ್ಯಾವಂತ-ಅವಿದ್ಯಾವಂತರೆಂಬ ತಾರತಮ್ಯ ಭಾವನೆಗೆ ಎಡೆಮಾಡಿ ಕೊಡದೆ, ಪೂರ್ವ-ಪಶ್ಚಿಮ ದಿಕ್ಕುಗಳನ್ನು ವೈರುಧ್ಯದ ಅಂಗಗಳಾಗಿಸದೆ, ‘East is East; West is West; they will never meet’ ಎಂಬ ಪಾಶ್ಚಾತ್ಯರಲ್ಲಿ ಬಲವಾಗಿ ಬೇರೂರಿದ್ದ ಸಂಕುಚಿತವೂ ದ್ವಂದ್ವವೂ ಆದ ನಿಲುವನ್ನು ತಮ್ಮ ಬುದ್ಧಿ-ಭಾವಗಳಿಂದ ನಿಶ್ಶೇಷಗೊಳಿಸಿದವರು ಸ್ವಾಮಿ ವಿವೇಕಾನಂದರು.

1993ರಲ್ಲಿ ಅಮೆರಿಕದಲ್ಲಿ ನೆರವೇರಿದ ಐತಿಹಾಸಿಕ ಚಿಕಾಗೋ ಸಮ್ಮೇಳನದ ಶತಮಾನೋತ್ಸವದ ಅಂತಾರಾಷ್ಟ್ರೀಯ ಸಭೆಯಲ್ಲಿ ಸ್ವಾಮಿ ವಿವೇಕಾನಂದರ ವಿಶ್ವಪ್ರಜ್ಞೆಯ ಕುರಿತು ಯುನೆಸ್ಕೋ ಸಂಸ್ಥೆಯ ಡೈರೆಕ್ಟರ್ ಜನರಲ್ ಫೆಡೆರಿಕೋ ಮೇಯರ್​ರವರು ಹೀಗೆ ಅಭಿಪ್ರಾಯ ಪಡುತ್ತಾರೆ: ‘‘ಸ್ವಾಮಿ ವಿವೇಕಾನಂದರು 1897ರಷ್ಟು ಹಿಂದೆಯೇ ಸ್ಥಾಪಿಸಿದ ರಾಮಕೃಷ್ಣ ಮಹಾಸಂಘದ ಸಂವಿಧಾನಕ್ಕೂ 1945ರಲ್ಲಿ ರೂಪುಗೊಂಡ ಯುನೆಸ್ಕೋ ಸಂವಿಧಾನಕ್ಕೂ ಇರುವ ಸಾಮ್ಯತೆ ಯನ್ನು ಕಂಡು ನಾನು ನಿಜಕ್ಕೂ ಚಕಿತನಾಗಿದ್ದೇನೆ. ಇವೆರಡೂ ಕೂಡ ಪ್ರಗತಿಯನ್ನು ಉದ್ದೇಶವಾಗಿ ಉಳ್ಳ ತಮ್ಮ ಪ್ರಯತ್ನಗಳಲ್ಲಿ ಮಾನವನನ್ನು ಕೇಂದ್ರವಾಗಿ ಇರಿಸುತ್ತವೆ. ಪ್ರಜಾಸತ್ತಾತ್ಮಕತೆಯನ್ನು ನಿರ್ವಿುಸುವ ತಮ್ಮ ಕಾರ್ಯಸೂಚಿಯಲ್ಲಿ ಇವೆರಡೂ ಸಹಿಷ್ಣುತೆಯನ್ನು ಅಗ್ರಸ್ಥಾನದಲ್ಲಿ ಇರಿಸುತ್ತವೆ. ಇವೆರಡೂ ಮಾನವ ಸಂಸ್ಕೃತಿ ಮತ್ತು ಸಮಾಜಗಳ ವೈವಿಧ್ಯವನ್ನು ಸಮಾನ ಪರಂಪರೆಯ ಅಗತ್ಯ ಅಂಶಗಳೆಂದು ಗುರುತಿಸುತ್ತವೆ’’.

(ಲೇಖಕರು ತುಮಕೂರು ರಾಮಕೃಷ್ಣ-ವಿವೇಕಾನಂದ ಆಶ್ರಮದ ಅಧ್ಯಕ್ಷರು)

Leave a Reply

Your email address will not be published. Required fields are marked *

five × 3 =

Back To Top