Friday, 21st September 2018  

Vijayavani

ಸಿಎಂ ‘ದಂಗೆ’ ಹೇಳಿಕೆ ವಿರುದ್ಧ ಕೇಸರಿ ಗುಟುರು - ಡಿಜಿಪಿ ನೀಲಮಣಿ ರಾಜುಗೆ ಬಿಜೆಪಿ ದೂರು - ಸಂಜೆ 4.30ಕ್ಕೆ ಗವರ್ನರ್ ಭೇಟಿ​​​​        ರಾಜ್ಯಾದ್ಯಂತ ಭುಗಿಲೆದ್ದ ‘ದಂಗೆ’ ಉರಿ - ಕಲಬುರಗಿ, ಮಂಡ್ಯ, ಧಾರವಾಡ, ಕೊಡಗಿನಲ್ಲಿ ದಳ್ಳುರಿ        ಬ್ರದರ್ಸ್​​ ತಂಟೆಗೆ ಹೋಗ್ಬೇಡಿ, ವಿವಾದಾತ್ಮಕ ಹೇಳಿಕೆ ಕೊಡ್ಬೇಡಿ - ಸಾಫ್ಟ್​ ಪಾಲಿಟಿಕ್ಸ್ ಬಗ್ಗೆ ಡಿಕೆಶಿಗೆ ಸಿದ್ದು ಕ್ಲಾಸ್        ಕರ್ನಾಟಕದಲ್ಲಿ ನಮಗೆ ಅಧಿಕಾರ ಬೇಕು - ಇಲ್ದಿದ್ರೆ ಲೋಕಸಭೆ ಚುನಾವಣೆಯಲ್ಲಿ ಕಷ್ಟ ಕಷ್ಟ - ಪರಿಸ್ಥಿತಿ ನಿಭಾಯಿಸಲು ಸಿದ್ದುಗೆ ಸೂಚನೆ        ಜಮ್ಮು-ಕಾಶ್ಮೀರದಲ್ಲಿ ಉಗ್ರರ ಅಟ್ಟಹಾಸ - ಅಪಹರಿಸಿದ್ದ ಮೂವರು ಪೊಲೀಸರ ಹತ್ಯೆಗೈದ ಕಿರಾತಕರು        ಓಡಿಶಾದಲ್ಲಿ ಡೆಯ್ ಚಂಡಮಾರುತದ ಅಬ್ಬರ - ಕಾಲಾಪುರಕ್ಕೆ ನುಗ್ಗಿದ ಡ್ಯಾಮ್ ನೀರು ನುಗ್ಗಿ ಪ್ರವಾಹ - ಬಿರುಗಾಳಿಗೆ ಜನರು ಕಂಗಾಲ್       
Breaking News

ಆಂಟನಿಯ ತಪ್ಪಿಗೆ ಮೋದಿ ಪ್ರಾಯಶ್ಚಿತ್ತ ಮಾಡಿಸಿದರು!

Monday, 13.08.2018, 3:05 AM       No Comments

ಹತಾಶ ಸ್ಥಿತಿಯಿಂದ ಭಾರತೀಯ ಸೇನೆಯನ್ನು ಮೇಲೆತ್ತುವ ಹೊಣೆಗಾರಿಕೆ ಹೆಗಲೇರಿದಾಗ ಪ್ರಧಾನಿ ಮೋದಿಯವರು ಜನರಲ್ ವಿ.ಕೆ. ಸಿಂಗ್​ರನ್ನು ಮಂತ್ರಿಮಂಡಲಕ್ಕೆ ಸೇರಿಸಿಕೊಂಡು, 10 ವರ್ಷಗಳಿಂದ ಸೈನ್ಯದ ಮೇಲೆ ಮೆರೆಯುತ್ತಿದ್ದ ಅಧಿಕಾರಿಗಳಿಗೆ ಸ್ಪಷ್ಟಸಂದೇಶ ನೀಡಿದರು. ರಕ್ಷಣಾ ಸಚಿವ ಮನೋಹರ್ ಪರಿಕ್ಕರ್ ಸೈನ್ಯದೊಂದಿಗೆ ನೇರಸಂಪರ್ಕ ಬೆಸೆದುಕೊಂಡರು.

ಸ್ವಾತಂತ್ರ್ಯ ಬಂದು 72 ವರ್ಷಗಳು ಕಳೆದೇಹೋದವು. ಸ್ವಾತಂತ್ರ್ಯ ಗಳಿಸಲು ಅದೆಷ್ಟು ಕಠಿಣ ಶ್ರಮ ಹಾಕಲಾಗಿತ್ತೋ ಅದಕ್ಕಿಂತಲೂ ಹೆಚ್ಚಿನ ಶ್ರಮವನ್ನು ಅದನ್ನು ಉಳಿಸಿಕೊಳ್ಳುವಲ್ಲಿ ಹಾಕಬೇಕಿದೆ. ಸೈನ್ಯ ಈ ನಿಟ್ಟಿನಲ್ಲಿ ಬಲು ಮಹತ್ವದ ಅಂಗ. ಆದರೆ ಸ್ವಾತಂತ್ರ್ಯ ಬಂದಾಗಿನಿಂದ ಆಳರಸರು ಸೈನಿಕರನ್ನು ಎರಡನೇ ದರ್ಜೆಯ ನಾಯಕರಾಗಿ ಕಂಡವರೇ. ಅವರ ಅಗತ್ಯಗಳನ್ನು ಪೂರೈಸುವಲ್ಲಿ ಸೋತವರೇ. ಸ್ವಲ್ಪ ಮಟ್ಟಿಗೆ ಶಾಸ್ತ್ರೀಜಿ ಸೈನಿಕರ ಆತ್ಮಸ್ಥೈರ್ಯ ವೃದ್ಧಿಸುವ ಪ್ರಯತ್ನ ಮಾಡಿದ್ದರು. ಅದಕ್ಕೆ ಮತ್ತೊಮ್ಮೆ ಜೀವಕಳೆ ತುಂಬಿದವರೇ ಜಾರ್ಜ್ ಫರ್ನಾಂಡಿಸ್!

ಅಟಲ್ ಬಿಹಾರಿ ವಾಜಪೇಯಿಯವರ ಅವಧಿಯಲ್ಲಿ ರಕ್ಷಣಾ ಮಂತ್ರಿಯಾಗಿ ಬಂದ ಜಾರ್ಜ್, ಸೈನಿಕರು ಮತ್ತು ಸರ್ಕಾರದ ನಡುವೆ ಇರುವ ಅಧಿಕಾರಿ ವರ್ಗದ ಧಾಷ್ಟರ್್ಯವನ್ನು ತೆಗೆದೊಗೆಯಲು ಅಪಾರ ಪ್ರಯತ್ನಪಟ್ಟರು. ನೇರವಾಗಿ ತಾವೇ ಸೈನಿಕರನ್ನು ಭೇಟಿಮಾಡಿ ಮಾತನಾಡಿಸುವ, ಅವರು ಕೆಲಸ ಮಾಡುವ ಅತ್ಯಂತ ಕಠಿಣ ಪ್ರದೇಶಗಳಿಗೆ ಹೋಗುವ ರೂಢಿ ಮಾಡಿಕೊಂಡರು. ಸೈನಿಕರೊಂದಿಗೆ ಹಿಮದ ಬೆಟ್ಟಗಳಲ್ಲಿ ಕಾಣಿಸಿಕೊಂಡವರು ಜಾರ್ಜ್. ಪದೇಪದೆ ಪತನಗೊಳ್ಳುವ ವಿಮಾನಗಳು, ಪೈಲಟ್​ಗಳ ಆತ್ಮಸ್ಥೈರ್ಯವನ್ನು ಕುಂದಿಸಿದಾಗ ಅಂಥದ್ದೇ ವಿಮಾನವೊಂದರಲ್ಲಿ ತಾವೂ ಕೂತು ಹಾರಾಟ ನಡೆಸಿ ಎಲ್ಲರೂ ಹುಬ್ಬೇರಿಸುವಂತೆ ಮಾಡಿಬಿಟ್ಟಿದ್ದರು.

ಬಹಳ ಜನರು ಮರೆತೇಹೋಗಿರುವ ಸಂಗತಿಯೊಂದಿದೆ. ಸಿಯಾಚಿನ್ ಹಿಮಬಂಡೆಗಳಲ್ಲಿ ಕೆಲಸಮಾಡುವ ಸೈನಿಕರಿಗಾಗಿ ಮಂಜಿನ ಸ್ಕೂಟರ್​ಗಳು ಬೇಕೆಂದು ಸೈನ್ಯ ಬೇಡಿಕೆ ಇಟ್ಟಿತ್ತು. ಆದರೆ ದೆಹಲಿಯ ಎ.ಸಿ. ರೂಮಿನಲ್ಲಿ ಕುಳಿತ ಅಧಿಕಾರಿವರ್ಗಕ್ಕೆ ಸಿಯಾಚಿನ್​ನ ಪರಿಸ್ಥಿತಿ ಅರ್ಥವಾಗಬೇಕಲ್ಲ. ಒಂದೂವರೆ ವರ್ಷಗಳ ಕಾಲ ಈ ಸ್ಕೂಟರ್ ಖರೀದಿಗೆ ನಾನಾ ಕಾರಣಗಳನ್ನು ಕೊಟ್ಟು ಖರೀದಿಯನ್ನು ತಡೆಹಿಡಿದಿತ್ತು. ವಿಚಾರ ಜಾರ್ಜ್ ಕಿವಿಗೆ ಬಿದ್ದೊಡನೆ ಕುಪಿತರಾಗಿ ಇದಕ್ಕೆ ಕಾರಣರಾದ ಮೂವರು ಅಧಿಕಾರಿಗಳನ್ನು ಸಿಯಾಚಿನ್​ನ ಮಂಜಿನ ಬೆಟ್ಟಗಳಿಗೆ ವರ್ಗಾಯಿಸುವ ನಿರ್ಣಯ ಕೈಗೊಂಡರು. ಅಧಿಕಾರ ವಲಯದಲ್ಲಿ ಈ ವಿಚಾರ ಆಕ್ರೋಶಕ್ಕೆ ಕಾರಣವಾಗಿತ್ತಾದರೂ ಸಿಯಾಚಿನ್​ನ ತುದಿಯಲ್ಲಿ ಕೆಲಸಮಾಡುವ ಸೈನಿಕನ ಆತ್ಮವಿಶ್ವಾಸ ನೂರು ಪಟ್ಟು ಹೆಚ್ಚಾಗಿಬಿಟ್ಟಿತ್ತು. ಸೈನಿಕರ ಕುರಿತಂತೆ ನಿರ್ಣಯ ಕೈಗೊಳ್ಳುವ ಅಧಿಕಾರಿಗಳನ್ನು, ಮೈನಸ್ 60 ಡಿಗ್ರಿ ತಾಪಮಾನದ ಸಿಯಾಚಿನ್ ಮತ್ತು ಪ್ಲಸ್ 50 ತಾಪಮಾನದ ರಾಜಸ್ಥಾನದ ಮರುಭೂಮಿಗಳಲ್ಲಿ ಒಂದೆರಡು ವರ್ಷ ಕೆಲಸಮಾಡಲು ಬಿಡಬೇಕು. ಆಗ ಅವರಿಗೆ ಆದ್ಯತೆಯ ಆಧಾರದ ಮೇಲೆ ಯಾವ ಕೆಲಸ ಮಾಡಬೇಕು ಎಂಬುದು ಅರಿವಾಗುತ್ತದೆ. 1948ರಲ್ಲಿ ಮೊದಲ ಜೀಪ್ ಸ್ಕಾ್ಯಂಡಲ್ ನಡೆದಾಗಿನಿಂದಲೂ ಸೈನ್ಯವನ್ನು ಅಧಿಕಾರಿಗಳೇ ತಮ್ಮ ತೆಕ್ಕೆಗೆ ತೆಗೆದುಕೊಂಡು ಬಿಟ್ಟಿದ್ದಾರೆ. ಅದಕ್ಕೆ ದೊಡ್ಡದೊಂದು ತಡೆಹಾಕಿದ್ದು ವಾಜಪೇಯಿ ಸರ್ಕಾರವೇ!

ಆ ಸರ್ಕಾರ ಉರುಳಿ ಮನಮೋಹನ್ ಸಿಂಗ್ ಅಧಿಕಾರಕ್ಕೆ ಬಂದೊಡನೆ ಮತ್ತೆ ಅಧಿಕಾರಿಗಳ ಧಾಷ್ಟರ್್ಯ ಮೊದಲಿನಂತೆಯೇ ಶುರುವಾಗಿಬಿಟ್ಟಿತ್ತು. ಮುಂದೆ ರಾಷ್ಟ್ರಪತಿಗಳಾದ ಪ್ರಣಬ್ ಮುಖರ್ಜಿ ರಕ್ಷಣಾ ಸಚಿವರಾಗಿದ್ದಾಗ ಅಧಿಕಾರಿಗಳು ಮತ್ತು ಸೈನ್ಯದ ನಡುವಿನ ತಿಕ್ಕಾಟ ಮತ್ತೊಮ್ಮೆ ಬಯಲಿಗೆ ಬಂದಿತ್ತು. ಆದರೆ ಎ.ಕೆ. ಆಂಟನಿ ರಕ್ಷಣಾ ಇಲಾಖೆಯ ನೇತೃತ್ವ ವಹಿಸಿದ ನಂತರ ಸೈನ್ಯ ಮತ್ತು ಸರ್ಕಾರದ ಸಂಬಂಧ ಪೂರ್ಣ ಕಳಚಿಹೋಯ್ತು. ಕಾಂಗ್ರೆಸ್​ಗೆ ತನಗಂಟಿದ ಬೊಫೋರ್ಸ್ ಕಳಂಕವನ್ನು ಕಳೆದುಕೊಳ್ಳುವ ಇಚ್ಛೆ ಬಲು ತೀವ್ರವಾಗಿತ್ತು. ದೇಶದ ಸುರಕ್ಷತೆಯನ್ನು ಬಲಿಕೊಟ್ಟಾದರೂ ಬೊಫೋರ್ಸ್​ನ ಕೊಳೆ ತೊಳೆಯಬಲ್ಲಂಥ ವ್ಯಕ್ತಿಯನ್ನು ಅದು ಅರಸುತ್ತಿತ್ತು. ಹೀಗಾಗಿಯೇ ಕೇರಳದ ಪತ್ರಿಕೆಗಳಿಂದ ‘ಮಿಸ್ಟರ್ ಕ್ಲೀನ್’ ಎಂಬ ಬಿರುದು ಪಡೆದಿದ್ದ ಆಂಟನಿಯನ್ನು ಆಕಾಶದಿಂದಿಳಿದ ನಕ್ಷತ್ರವೆಂಬಂತೆ ರಕ್ಷಣಾ ಇಲಾಖೆಗೆ ತಂದು ಕೂರಿಸಲಾಯ್ತು. ತಮ್ಮ ಇಡಿಯ ಅಧಿಕಾರಾವಧಿಯಲ್ಲಿ ಯಾವುದೇ ನಿರ್ಣಯವನ್ನು ಧೈರ್ಯವಾಗಿ ತೆಗೆದುಕೊಳ್ಳುವಲ್ಲಿ ವಿಫಲರಾದ ಆಂಟನಿ, ಧೈರ್ಯವಾಗಿ ತೆಗೆದುಕೊಳ್ಳುತ್ತಿದ್ದ ನಿರ್ಣಯ ‘ಕಚೇರಿಯಲ್ಲಿ ಸಂಜೆ ಕುಡಿಯಲು ಟೀ ಬೇಕೋ, ಕಾಫಿ ಬೇಕೋ ಎನ್ನುವಲ್ಲಿ ಮಾತ್ರ’ ಎಂದು ದೆಹಲಿಯ ಪಡಸಾಲೆಗಳಲ್ಲಿ ಜೋಕು ಹರಿದಾಡುತ್ತಿತ್ತು. ಏಳೂವರೆ ವರ್ಷಗಳ ಕಾಲ ರಕ್ಷಣಾ ಸಚಿವರಾಗಿದ್ದ ಆಂಟನಿ ಭಾರತೀಯ ಸೇನೆಯನ್ನು ನೆಹರು ಕಾಲಕ್ಕಿಂತಲೂ ಕೆಟ್ಟ ಸ್ಥಿತಿಗೊಯ್ದುಬಿಟ್ಟರು. ಸೈನ್ಯದ ಕುರಿತಂತೆ ಎಲ್ಲ ನಿರ್ಣಯಗಳನ್ನು ದೆಹಲಿಯಲ್ಲಿ ಕುಳಿತ ಅಧಿಕಾರಿವರ್ಗವೇ ತೆಗೆದುಕೊಳ್ಳುತ್ತಿತ್ತು. ತಮ್ಮ ಕ್ಲೀನ್ ಇಮೇಜ್ ಉಳಿಸಿಕೊಳ್ಳುವ ಧಾವಂತದಲ್ಲಿ ಸೈನ್ಯಕ್ಕೆ ತುರ್ತಾಗಿ ಆಗಬೇಕಾಗಿದ್ದ ಖರೀದಿಗಳು ನಿಂತೇಹೋಗಿದ್ದವು. ಭಾರತ ಉಪಯೋಗಿಸುತ್ತಿದ್ದ ಟ್ಯಾಂಕುಗಳು, ಫೈಟರ್ ಜೆಟ್​ಗಳು, ಯುದ್ಧನೌಕೆಗಳು 1980ರ ಕಾಲಘಟ್ಟದ್ದಾಗಿದ್ದವು. ಹೋವಿಡ್ಜರ್ ಅನ್ನು ನಾವು ಖರೀದಿಸಿದ್ದು 1987ರಲ್ಲೇ ಕೊನೆಯಾಗಿತ್ತು. 1999ರಿಂದ ಯುದ್ಧ ವಿಮಾನಗಳಿಗಾಗಿ ಮಂಡಿಸಿದ ಬೇಡಿಕೆ ಹಾಗೆಯೇ ಉಳಿದಿತ್ತು. ಸುಮಾರು ನೂರು ಶತಕೋಟಿ ಡಾಲರ್​ಗಳಷ್ಟು ಸೈನಿಕ ಅವಶ್ಯಕತೆಗಳ ಪಟ್ಟಿಯಿತ್ತು. ಎರಡೆರಡು ಅಧಿಕಾರಾವಧಿಯನ್ನು ಕಂಡ ಯುಪಿಎ ವ್ಯವಸ್ಥಿತವಾಗಿ ಇವುಗಳನ್ನು ಪೂರೈಸುವ ಪ್ರಯತ್ನವನ್ನು ಎಂದಿಗೂ ಮಾಡಲೇ ಇಲ್ಲ. 32 ಶಸ್ತ್ರಾಸ್ತ್ರ ಕಾರ್ಖಾನೆ, 3 ಶಿಪ್​ಯಾರ್ಡ್, ಸೈನ್ಯಕ್ಕೆ ಸಂಬಂಧಪಟ್ಟಂಥ 8 ಪಬ್ಲಿಕ್ ಸೆಕ್ಟರ್ ಯುನಿಟ್​ಗಳು, 52 ಡಿಆರ್​ಡಿಒ ಪ್ರಯೋಗಾಲಯಗಳನ್ನು ಹೊಂದಿದ್ದರೂ, ಭಾರತ ಸೈನ್ಯಕ್ಕೆ ಸಂಬಂಧಪಟ್ಟ ಒಂದು ವಿಮಾನವನ್ನು ನಿರ್ವಿುಸಿ ಪೂರೈಸುವಲ್ಲಿಯೂ ಸೋತುಹೋಯ್ತು. ಇದಕ್ಕೆ ವಿಜ್ಞಾನಿಗಳು ಖಂಡಿತ ಕಾರಣರಲ್ಲ; ಬದಲಿಗೆ ನಿರ್ಣಯ ತೆಗೆದುಕೊಂಡು ಜವಾಬ್ದಾರಿ ಕೊಡಬಲ್ಲ ಸಮರ್ಥ ನಾಯಕನದ್ದೇ ಕೊರತೆ. ಆಂಟನಿ ರಕ್ಷಣಾ ಸಚಿವರಾದಾಗ ಭಾರತ ಜಗತ್ತಿನ ಆರನೇ ದೊಡ್ಡ ಶಸ್ತ್ರಾಸ್ತ್ರ ಆಮದುರಾಷ್ಟ್ರವಾಗಿತ್ತು. ಚೀನಾ ನಂಬರ್ ಒನ್ ಸ್ಥಾನದಲ್ಲಿತ್ತು. ಹತ್ತೇ ವರ್ಷಗಳಲ್ಲಿ ಭಾರತ ಜಗತ್ತಿನ ಅತಿದೊಡ್ಡ ಶಸ್ತ್ರ ಆಮದು ರಾಷ್ಟ್ರವಾಗಿ ಬೆಳೆದು ನಿಂತರೆ ಚೀನಾ ಜಗತ್ತಿನ ಐದನೇ ದೊಡ್ಡ ಶಸ್ತ್ರಾಸ್ತ್ರ ರಫ್ತುರಾಷ್ಟ್ರವಾಗಿ ಬೆಳೆದಿದೆ. ಇದು ಮನಮೋಹನ್ ಸಿಂಗ್ ಸರ್ಕಾರ ನಮಗೆ ಕೊಟ್ಟಿರುವ ಕೊಡುಗೆ!

ಈ ಅವಧಿಯಲ್ಲೇ ಅಗಸ್ಟಾ ವೆಸ್ಟ್​ಲ್ಯಾಂಡ್​ನೊಂದಿಗೆ ಮಾಡಿಕೊಂಡ ವಿವಿಐಪಿ ಹೆಲಿಕಾಪ್ಟರ್​ಗಳ ಡೀಲನ್ನು, ಭಾರಿ ಹಗರಣ ಹೊರಬಂದಿದ್ದರಿಂದ ಭಾರತ ಮುರಿದುಕೊಂಡಿತು. ಟೆಟ್ರಾ ಟ್ರಕ್ ಖರೀದಿಯಲ್ಲಿ 14 ಕೋಟಿ ಲಂಚವನ್ನು ತನಗೆ ತೆಗೆದುಕೊಳ್ಳುವಂತೆ ಕೇಳಿಕೊಂಡಿದ್ದರೆಂದು ಜನರಲ್ ವಿ.ಕೆ. ಸಿಂಗ್ ರಕ್ಷಣಾ ಸಚಿವರಿಗೆ ಖುದ್ದು ತಿಳಿಸಿದರೂ ಪರಿಣಾಮ ಕಂಡುಬಂದಿರಲಿಲ್ಲ. ಸದನದಲ್ಲಿ ಈ ಅವ್ಯವಹಾರದ ಕುರಿತಂತೆ ಗಲಾಟೆಯಾದಾಗ ಲಿಖಿತ ದೂರು ಬಂದಿರಲಿಲ್ಲವಾದ್ದರಿಂದ ನಿರ್ಣಯ ಕೈಗೊಳ್ಳಲಿಲ್ಲವೆಂದಿದ್ದರು ಆಂಟನಿ. ಅವರ ಅವಧಿಯಲ್ಲೇ ಐಎನ್​ಎಸ್ ಸಿಂಧುರತ್ನಕ್ಕೆ ಬೇಕಾಗಿರುವ ಸ್ವದೇಶಿ ನಿರ್ವಿುತ ಬ್ಯಾಟರಿಗಳನ್ನೂ ಕೊಂಡುಕೊಳ್ಳಲಾಗದಷ್ಟು ಅಸಹಾಯಕತೆಗೆ ಸಿಲುಕಿದ ಅಡ್ಮಿರಲ್ ಜೋಷಿ ಬಲು ಖೇದದಿಂದ ರಾಜೀನಾಮೆ ಕೊಟ್ಟಿದ್ದರು. ಹಳೆಯ ಬ್ಯಾಟರಿಗಳನ್ನೇ ಬಳಸುತ್ತಿದ್ದ ಪರಿಣಾಮ ಹಡಗಿನಲ್ಲಿ ಬೆಂಕಿ ಕಾಣಿಸಿಕೊಂಡು ಇಬ್ಬರು ನೌಕಾಧಿಕಾರಿಗಳು ಮೃತಪಟ್ಟಿದ್ದು ದೇಶದಲ್ಲಿ ಬಲುದೊಡ್ಡ ಚರ್ಚೆಗೆ ಗ್ರಾಸವಾಗಿತ್ತು. ಅಡ್ಮಿರಲ್ ಜೋಷಿ ರಾಜೀನಾಮೆ ಕೊಡುವಾಗ ‘ಇಸ್ತ್ರಿ ಮಾಡಿದ ಸಮವಸ್ತ್ರ ಧರಿಸಲು ನಾನು ಸೈನ್ಯದ ಮುಖ್ಯಸ್ಥನಾಗಿಲ್ಲ. ನನ್ನ ನಂಬಿರುವ ಸೈನಿಕರಿಗಾಗಿ ನಿರ್ಣಯ ತೆಗೆದುಕೊಳ್ಳಲಾಗದಿದ್ದರೆ ಈ ಹುದ್ದೆಯೇ ಬೇಡ’ ಎಂದಿದ್ದರು. ಅವರನ್ನು ರಮಿಸಿ ರಾಜೀನಾಮೆಯನ್ನು ಮರಳಿಕೊಟ್ಟು ವ್ಯವಸ್ಥೆ ಸರಿಪಡಿಸಬೇಕಿದ್ದ ಆಂಟನಿ ತಕ್ಷಣವೇ ರಾಜೀನಾಮೆಯನ್ನು ಅಂಗೀಕರಿಸಿ ಮುಂದಿನ ಅನೇಕ ದಿನಗಳ ಕಾಲ ಆ ಹುದ್ದೆಗೆ ಯಾರನ್ನೂ ಕರೆತರದೆ ಭಾರತೀಯ ನೌಕಾಪಡೆಯನ್ನು ಅಕ್ಷರಶಃ ನಾಯಕರಹಿತವಾಗಿಸಿಬಿಟ್ಟಿದ್ದರು. ಅತ್ತ ಜನರಲ್ ವಿ.ಕೆ. ಸಿಂಗ್ ರಕ್ಷಣಾ ಇಲಾಖೆಯನ್ನು ಕೋರ್ಟಿಗೆಳೆದು ತಂದಿದ್ದರು. ಅವರ ಪ್ರಾಮಾಣಿಕತೆಯ ಮೇಲೂ ಗೂಬೆ ಕೂರಿಸುವ ಪ್ರಯತ್ನವನ್ನು ಕಾಂಗ್ರೆಸ್ ಸರ್ಕಾರ ಮಾಡಿಯೇ ಇತ್ತು. ಬಹುಶಃ ದೇಶ ಕಂಡ ಅತ್ಯಂತ ಕೆಟ್ಟ ರಕ್ಷಣಾ ಸಚಿವರೆಂಬ ಅಭಿದಾನ ಆಂಟನಿಯವರಿಗೇ ಸಿಗಬಹುದು. ಸರ್ಕಾರದೊಳಗೆ ಅಧಿಕಾರ ಕಳೆದುಕೊಳ್ಳುವ ಒಂದು ವರ್ಷಕ್ಕೂ ಮುನ್ನ ಸೈನ್ಯ ದಂಗೆಯೇಳಬಹುದೆಂಬ ಭಯವೂ ನಿರ್ವಣವಾಗಿತ್ತೆಂದು ಆಪ್ತ ವಲಯದ ಅನೇಕರು ಈಗಲೂ ಹೇಳುತ್ತಾರೆ.

ಇಂತಹ ಪರಿಸ್ಥಿತಿಯಿಂದ ಭಾರತೀಯ ಸೇನೆಯನ್ನು ಮೇಲೆತ್ತುವ ಹೊಣೆಗಾರಿಕೆ ನರೇಂದ್ರ ಮೋದಿಯವರ ಹೆಗಲಿಗೇರಿತ್ತು. ಹೀಗಾಗಿಯೇ ಅವರು ಜನರಲ್ ವಿ.ಕೆ. ಸಿಂಗ್​ರನ್ನು ಮಂತ್ರಿಮಂಡಲಕ್ಕೆ ಸೇರಿಸಿಕೊಂಡಿದ್ದು. ಇದು ಹತ್ತು ವರ್ಷಗಳಿಂದ ಸೈನ್ಯದ ಮೇಲೆ ಮೆರೆಯುತ್ತಿದ್ದ ಅಧಿಕಾರಿಗಳಿಗೆ ಮೊದಲ ಸ್ಪಷ್ಟಸಂದೇಶವಾಗಿತ್ತು. ರಕ್ಷಣಾ ಸಚಿವ ಮನೋಹರ ಪರಿಕ್ಕರ್​ರ ಸರಳತೆಯನ್ನು ಅನೇಕರು ಆಡಿಕೊಂಡರಾದರೂ ಅವರ ಪ್ರಾಮಾಣಿಕತೆಯ ವಿಚಾರದಲ್ಲಿ ಮಾತ್ರ ಯಾರಿಗೂ ಅನುಮಾನವಿರಲಿಲ್ಲ. ಗೋವಾದ ಮುಖ್ಯಮಂತ್ರಿಯಾಗಿದ್ದ ಈ ಐಐಟಿ ಪದವೀಧರನನ್ನು ಮೋದಿ ಹುಡುಕಿಯೇ ಕರೆದುಕೊಂಡು ಬಂದಿದ್ದರು. ಹಿಂದಿನ ಸರ್ಕಾರದ ದಶಕದಷ್ಟು ಹಳೆಯ ಪಾಪವನ್ನು ತೊಳೆಯುವ ಜವಾಬ್ದಾರಿಯನ್ನು ಹೊತ್ತ ಪರಿಕ್ಕರ್ ಸೈನ್ಯದೊಂದಿಗೆ ನೇರವಾದ ಸಂಪರ್ಕ ಬೆಸೆದುಕೊಂಡರು. ಕಾಶ್ಮೀರದಲ್ಲಿ ಕಾರ್ಯಾಚರಣೆಗೆ ನಿಂತಿರುವ ಸೈನಿಕರಿಗೆ ಸಂಪೂರ್ಣ ಬೆಂಬಲ ಘೊಷಿಸಿದ್ದಲ್ಲದೇ ‘ಬಂದೂಕಿನೊಂದಿಗೆ ಭಾರತದೊಳಕ್ಕೆ ನುಸುಳುವ ಭಯೋತ್ಪಾದಕನನ್ನು ಪ್ರೇಮದಿಂದ ಅಪ್ಪಿಕೊಳ್ಳಬೇಕಾದ ಅಗತ್ಯವಿಲ್ಲ. ಅಗತ್ಯಬಿದ್ದರೆ ಭಯೋತ್ಪಾದಕನನ್ನು ಭಯೋತ್ಪಾದನೆಯಿಂದಲೇ ಮುಗಿಸುತ್ತೇವೆ’ ಎಂದಿದ್ದರು. ಮ್ಯಾನ್ಮಾರಿಗೆ ನುಗ್ಗಿ ಅಲ್ಲಿ ಅಡಗಿರುವ ಉಗ್ರರನ್ನು ಕೊಲ್ಲಬೇಕೆಂಬ ಸೈನ್ಯದ ಬೇಡಿಕೆಗೆ ಪೂರ್ಣ ಸಹಮತ ವ್ಯಕ್ತಪಡಿಸಿದ ಪರಿಕ್ಕರ್ ಎಲ್ಲ ವ್ಯವಸ್ಥೆಗಳನ್ನೂ ನಿರ್ವಿುಸಿಕೊಟ್ಟಿದ್ದರು. ಪಿಒಕೆಯಲ್ಲಿ ನಡೆದ ಸರ್ಜಿಕಲ್ ಸ್ಟ್ರೈಕಿಗೂ ಸೈನಿಕರಿಗೆ ಅವರು ನೀಡಿದ ಮುಕ್ತಸ್ವಾತಂತ್ರ್ಯವೇ ಕಾರಣ. ಬಹುಶಃ ಜಾರ್ಜ್ ಫರ್ನಾಂಡಿಸ್​ರ ನಂತರ ಸೈನಿಕರ ಪರವಾಗಿ ವಾದಿಸಿದ ಸಮರ್ಥ ರಕ್ಷಣಾ ಸಚಿವ ಪರಿಕ್ಕರರೇ. ಈ ನಾಲ್ಕು ವರ್ಷಗಳಲ್ಲಿ ಭಾರತೀಯ ಸೇನೆಯ ಆತ್ಮಸ್ಥೈರ್ಯ ಅದೆಷ್ಟು ವೃದ್ಧಿಯಾಗಿದೆ ಎಂದರೆ ಮೇಜರ್ ಗೊಗೊಯ್ ಕಲ್ಲೆಸೆಯುತ್ತಿದ್ದ ಕಾಶ್ಮೀರಿ ಪುಂಡನನ್ನು ತನ್ನ ಜೀಪಿಗೆ ಕಟ್ಟಿ ಊರೆಲ್ಲ ಮೆರವಣಿಗೆ ಮಾಡಿಸಿಬಿಟ್ಟರು. ಈ ಕುರಿತಂತೆ ದೇಶದಲ್ಲೆಲ್ಲ ಬುದ್ಧಿಜೀವಿಗಳು ಆಕ್ರೋಶ ವ್ಯಕ್ತಪಡಿಸಿದಾಗ ಸೇನೆ ಮುಲಾಜು ನೋಡದೆ ಗೊಗೊಯ್ ಮಾಡಿದ್ದರಲ್ಲಿ ಯಾವ ತಪ್ಪಿಲ್ಲವೆಂದು ಘೊಷಿಸಿತು. ಈ ಆತ್ಮಶಕ್ತಿ ವೃದ್ಧಿಯಿಂದಾಗಿಯೇ ಕಾಶ್ಮೀರದಲ್ಲಿ ನಡೆಯುತ್ತಿರುವ ‘ಆಪರೇಷನ್ ಆಲ್-ಔಟ್’ ಯಶಸ್ವಿಯಾಗಿರೋದು. ಮೋದಿ ಅಧಿಕಾರಕ್ಕೆ ಬಂದ ನಂತರವೇ ಸೈನಿಕರ ಬಹುಕಾಲದ ಬೇಡಿಕೆಯಾಗಿದ್ದ ‘ಒನ್ ರ್ಯಾಂಕ್ ಒನ್ ಪೆನ್ಷನ್’ಗೆ (ಒಆರ್​ಒಪಿ) ಹಸಿರುನಿಶಾನೆ ದೊರೆತಿದ್ದು. ಅವರು ತೆಗೆದುಕೊಂಡ ಕಠಿಣ ಆರ್ಥಿಕ ನೀತಿಯಿಂದಾಗಿಯೇ ಕಾಶ್ಮೀರದಲ್ಲಿ ಕಲ್ಲೆಸೆಯುತ್ತಿದ್ದ ತರುಣರಿಗೆ ಬಲುದೊಡ್ಡ ಪ್ರಮಾಣದಲ್ಲಿ ಆರ್ಥಿಕ ಸಹಾಯ ನಿಂತುಹೋಗಿದ್ದು. ಅಷ್ಟೇ ಅಲ್ಲ, ಈ ಅವಧಿಯಲ್ಲೇ 50,000 ಬುಲೆಟ್ ಪೂ›ಫ್ ಜಾಕೆಟ್​ಗಳ ಖರೀದಿಗೂ ಅನುಮತಿ ದೊರೆತಿದ್ದು; ಮೂರ್ನಾಲ್ಕು ವರ್ಷಗಳಿಂದ ಚೌಕಾಸಿಯಲ್ಲೇ ಕಳೆದಿದ್ದ ರಫೇಲ್ ಡೀಲ್ ಪೂರ್ಣಗೊಂಡು ಪೂರೈಕೆಯಾಗುವಂಥ ಹಂತಕ್ಕೆ ಬಂದು ನಿಂತದ್ದು. ಮೇಕ್ ಇನ್ ಇಂಡಿಯಾದ ಮೂಲಕ ಶಸ್ತ್ರಾಸ್ತ್ರಗಳ ಶೇ. 60ರಷ್ಟು ಬಿಡಿಭಾಗವನ್ನು ಭಾರತದಲ್ಲೇ ತಯಾರಿಸಿ ಅಷ್ಟು ಪ್ರಮಾಣದ ಆಮದನ್ನು ಕಡಿತಗೊಳಿಸಿದ್ದು ಈ ನಾಲ್ಕು ವರ್ಷಗಳ ಅವಧಿಯಲ್ಲೇ. ಆಂಟನಿಯ ಕಾಲಕ್ಕೆ ಸರಿಯಾದ ಯೋಜನೆಯನ್ನು ರೂಪಿಸದೇ ಯದ್ವಾತದ್ವಾ ಖರೀದಿಗೆ ಮಾಡಿದ್ದ ಆಲೋಚನೆಯನ್ನು ಕೂಲಂಕಷವಾಗಿ ಅಧ್ಯಯನ ನಡೆಸಿ ವ್ಯವಸ್ಥಿತಗೊಳಿಸಿದ್ದರ ಪರಿಣಾಮ ಮಿಸೈಲ್ ಖರೀದಿಯೊಂದರಲ್ಲೇ ಭಾರತ 48 ಸಾವಿರ ಕೋಟಿ ರೂಪಾಯಿ ಉಳಿಸಿತು. ಶಸ್ತ್ರಾಸ್ತ್ರ ಖರೀದಿಗೆಂದು ಅಮೆರಿಕದ ಖಾತೆಯೊಳಗೆ 20,000 ಸಾವಿರ ಕೋಟಿ ರೂಪಾಯಿಯನ್ನು ಹಾಕಿ ರಕ್ಷಣಾ ಇಲಾಖೆ ಮರೆತೇಬಿಟ್ಟಿತ್ತು. ಹಳೆಯ ಕಡತಗಳನ್ನೆಲ್ಲ ತೆಗೆಸಿ ಅಧ್ಯಯನ ಮಾಡುವಾಗ ಈ ವಿವರ ಪಡೆದ ಪರಿಕ್ಕರ್ ಆ ಹಣವನ್ನು ಮರಳಿ ತರಿಸಿಕೊಂಡು ರಕ್ಷಣಾ ಇಲಾಖೆಯ ಶಕ್ತಿಯನ್ನು ಹೆಚ್ಚಿಸಿದರು.

ಈಗ ಮತ್ತೊಬ್ಬ ಸಮರ್ಥ ನಾಯಕಿ ನಿರ್ಮಲಾ ಸೀತಾರಾಮನ್ ಆ ಸ್ಥಾನಕ್ಕೆ ಬಂದಿದ್ದಾರೆ. ಅಧಿಕಾರ ಸ್ವೀಕರಿಸಿದ ಮೊದಲ ದಿನವೇ ಭಾರತವನ್ನು ಸದಾ ಯುದ್ಧಸನ್ನದ್ಧವಾಗಿಡಬೇಕೆಂಬುದೇ ತನ್ನ ಗುರಿ ಎಂಬ ಮಾತನ್ನು ಬಲು ಸ್ಪಷ್ಟವಾಗಿ ಹೇಳುವ ಮೂಲಕ ಆಕೆ ನೆಹರು ಕಾಲದ ಸೈನಿಕ ಚಿಂತನೆಗಳನ್ನು ಮೂಲೆಗುಂಪು ಮಾಡಿದ್ದಾರೆ. ಮೋದಿಯ ಆಯ್ಕೆ ಸಾಮಾನ್ಯವಾದ್ದಲ್ಲ. ನಿರ್ಮಲಾ ಸೀತಾರಾಮನ್ ಪ್ರಾಮಾಣಿಕತೆಯ ವಿಚಾರದಲ್ಲಿ ಆಂಟನಿಯಷ್ಟೇ ಗೌರವಕ್ಕೆ ಪಾತ್ರರು. ಆದರೆ ನಿರ್ಣಯಗಳನ್ನು ಕೈಗೊಳ್ಳುವ ವಿಚಾರದಲ್ಲಿ ಆಂಟನಿಗಿಂತ ಸಾವಿರ ಪಾಲು ಸಮರ್ಥರು. ಕಷ್ಟಪಟ್ಟು ಗಳಿಸಿದ ಸ್ವಾತಂತ್ರ್ಯವನ್ನು ಇವರೆಲ್ಲರೂ ಸೇರಿ ಉಳಿಸಿ ಕೊಡಬಲ್ಲರೆಂಬ ಭರವಸೆ ಈಗ ನಿಶ್ಚಯವಾಗಿ ಭಾರತೀಯರಲ್ಲಿ ಮನೆ ಮಾಡಿದೆ.

ಅಂದಹಾಗೆ 72ನೇ ಸ್ವಾತಂತ್ರ್ಯೋತ್ಸವದ ಶುಭಾಶಯಗಳು.

(ಲೇಖಕರು ಖ್ಯಾತ ವಾಗ್ಮಿ ಹಾಗೂ ಚಿಂತಕರು)

Leave a Reply

Your email address will not be published. Required fields are marked *

Back To Top