Wednesday, 19th September 2018  

Vijayavani

ಗೌಡರ ಫ್ಯಾಮಿಲಿ ವಿರುದ್ಧ ಮತ್ತೆ ಸಿಡಿದೆದ್ದ ಮಂಜು- ಡಿಸಿ, ಕಂದಾಯ ಸಚಿವರಿಗೆ ನಾಳೆ  ದೂರು ನೀಡಲಿರುವ ಎ.ಮಂಜು        ಎದುರಾಳಿ ಇಲ್ದೇ ಚೆಸ್ ಆಡೋದೇಗೆ - ಡಿಕೆಶಿ ದರ್ಪದ ಮಾತಿಗೆ ಬಿಎಸ್​ವೈ ತಿರುಗೇಟು - ಇತ್ತ ಅಪ್ಪ-ಮಕ್ಕಳ ವಿರುದ್ಧವೂ ವಾಗ್ದಾಳಿ        ಬಿಜೆಪಿಗೆ ಹೋದ್ರೆ ಬೆಳೆಯಕ್ಕಾಗಲ್ಲ, ಪಕ್ಷದಲ್ಲಿದ್ರೆ ಹೆಚ್ಚು ಲಾಭ - ಬಂಡೆದ್ದಿದ್ದ ಬ್ರದರ್ಸ್ ಕೂಲ್ ಮಾಡಿದ್ದೇ ಸಹೋದರ ಲಖನ್        ದಿಲ್ಲಿಯಲ್ಲಿ ಸಂಪುಟ ವಿಸ್ತರಣೆ ಸರ್ಕಸ್ - ಖಾಲಿ ಇರೋ 6 ಸ್ಥಾನಗಳಿಗೆ ಲಾಬಿ ಜೋರು - ಭಿನ್ನಮತಕ್ಕೆ ರಾಹುಲ್ ಹಾಡ್ತಾರಾ ಇತಿಶ್ರೀ..?        ತ್ರಿವಳಿ ತಲಾಖ್ ಸುಗ್ರೀವಾಜ್ಞೆಗೆ ಅಸ್ತು - ಕೇಂದ್ರ ಸಚಿವ ಸಂಪುಟದಿಂದ ಒಪ್ಪಿಗೆ - ಮುಸ್ಲಿಂ ಮಹಿಳೆಯರಿಗೆ ಕೊನೆಗೂ ಸಿಕ್ತು ನ್ಯಾಯ       
Breaking News

ಕೇರಳ-ಕರ್ನಾಟಕ ಅಂತಾರಾಜ್ಯ ಹೆದ್ದಾರಿ ಬಂದ್

Thursday, 14.06.2018, 5:25 AM       No Comments

ವಿರಾಜಪೇಟೆ: ಕೊಡಗು ಕೇರಳ ಗಡಿಪ್ರದೇಶದ ಪೆರುಂಬಾಡಿ ಸಮೀಪ ಮರಗಳು ಬಿದ್ದ ಪರಿಣಾಮವಾಗಿ ಕೊಡಗು ಕೇರಳ ಅಂತರ್ ರಾಜ್ಯ ರಸ್ತೆ ಸಂಪರ್ಕ ಬಂದ್ ಆಗಿದೆ.

ಏಳು ದಿನಗಳಿಂದಲೂ ಗಡಿಭಾಗವಾದ ಮಾಕುಟ್ಟ ಪ್ರದೇಶದಲ್ಲಿ ನಿರಂತರ ಭಾರೀ ಮಳೆಯಾಗುತ್ತಿದ್ದು, ಪೆರುಂಬಾಡಿಯಿಂದ ಮಾಕುಟ್ಟಕ್ಕೆ ತೆರಳುವ ರಸ್ತೆಗೆ ಬೇರು ಸಮೇತ ಮರಗಳು ಬಿದ್ದಿದ್ದು, ರಸ್ತ್ತೆ ಸಂಚಾರಕ್ಕೆ ಅಡಚಣೆಯುಂಟಾಗಿದೆ. ಮರ ಬಿದ್ದ ಸುಮಾರು ಮೂರು ಕಿ.ಮೀ ದೂರದಲ್ಲಿ ಸೇತುವೆಯೊಂದರ ಒಂದು ಭಾಗ ಕುಸಿದ ಪರಿಣಾಮವಾಗಿ ಮಳೆ ನೀರು ರಸ್ತೆ ಮೇಲೆ ಹರಿಯುತ್ತಿರುವುದರಿಂದ ರಸ್ತೆ ಸಂಚಾರಕ್ಕೆ ಅಡಚಣೆಯಾಗಿದೆ. ಸೇತುವೆ ಪಕ್ಕದ ಮಲೆಯಾಳಿ ಅಂಬು ಹೊಟೇಲ್‌ಗೂ ನೀರು ನುಗ್ಗಿದ್ದು ಹೊಟೇಲ್ ವ್ಯವಹಾರ ಸ್ಥಗಿತಗೊಂಡಿದೆ. ಅಂಬು ಹೊಟೇಲ್ ಪಕ್ಕದಲ್ಲಿರುವ ಸೇತುವೆಯ ಮೇಲೆ ಮರಗಳು ಉರುಳಿದ್ದು ರಸ್ತೆ ಬಂದ್ ಆಗಿದೆ. ವಿರಾಜಪೇಟೆ ಶಾಸಕ ಕೆ.ಜಿ ಬೋಪಯ್ಯ ಸ್ಥಳಕ್ಕೆ ತೆರಳಿ ಪರಿಶೀಲನೆ ನಡೆಸಿದರು.

ಅಂತರರಾಜ್ಯ ಹೆದ್ದಾರಿಯಲ್ಲಿ ಮರಗಳು ಉರುಳಿದೆ ಎಂದು ಸುದ್ದಿ ತಿಳಿಯುತ್ತಲೆ ತಾಲೂಕು ತಹಸಿಲ್ದಾರ್ ಆರ್.ಗೋವಿಂದರಾಜು, ಲೋಕೋಪಯೋಗಿ ಇಲಾಖೆಯ ಎಇ ಎಂ.ಕೆ.ಸುರೇಶ್ ಹಾಗೂ ಸಿಬ್ಬಂದಿ ಸ್ಥಳಕ್ಕೆ ತೆರಳಿ ರಸ್ತೆ ತೆರವಿಗೆ ಜೆ.ಸಿ.ಬಿ.ಯಂತ್ರ ಬಳಸಿ ತುರ್ತು ಪರಿಹಾರ ಕ್ರಮ ಕೈಗೊಂಡಿದ್ದಾರೆ.

ಗಡಿ ಭಾಗದಲ್ಲಿ ಭಾರೀ ಮಳೆಯ ಪರಿಣಾಮವಾಗಿ ಮಾಕುಟ್ಟದ ಎಡ ಪಾರ್ಶ್ವದಲ್ಲಿರುವ ಕೂಟುಪೊಳೆ ಉಕ್ಕಿ ಹರಿಯುತ್ತಿರುವ ಕಾರಣ ರಸ್ತೆಯ ಮೇಲೆ ನೀರು ಹರಿಯುತ್ತಿದೆ. ಅಂತರರಾಜ್ಯ ರಸ್ತೆ ಸಂಚಾರ ಬಂದ್ ಹಿನ್ನೆಲೆಯಲ್ಲಿ ಸುಮಾರು 600 ರಿಂದ 700 ಅಂತರ ರಾಜ್ಯ ವಾಹನಗಳು ಹಿಂತಿರುಗಿ ಕೇರಳದ ಮಟ್ಟನೂರು ಮಾರ್ಗವಾಗಿ ಮಾನಂದವಾಡಿ ಮೂಲಕ ಮೈಸೂರು, ಬೆಂಗಳೂರು, ಹಾಸನ ಇತರ ಊರುಗಳಿಗೆ ತೆರಳಬೇಕಾಯಿತು.

ಕೇರಳ ಶಾಸಕರ ಭೇಟಿ: ಕೇರಳ ರಾಜ್ಯದ ಕಣ್ಣಾನೂರಿನ ಶಾಸಕ ಸನ್ನಿಜೋಸೆಫ್ ಬುಧವಾರ ಬೆಳಗ್ಗೆ ಮಾಕುಟ್ಟಕ್ಕೆ ಭೇಟಿ ನೀಡಿ ಕೊಡಗು-ಕೇರಳ ಅಂತರಾಜ್ಯ ರಸ್ತೆ ಪರಿಶೀಲಿಸಿದರು. ಸೇತುವೆ ಮೇಲೆ ಬಿದ್ದಿದ್ದ ಮರಗಳನ್ನು ಕ್ರೈನ್ ಬಳಸಿ ಎತ್ತುವಂತೆ ಸೂಚಿಸಿದರಲ್ಲದೆ ಕೇರಳದಿಂದ ತಕ್ಷಣ ಕ್ರೈನ್ ತರಿಸಿ ರಕ್ಷಣಾ ಕಾರ್ಯಕ್ಕೆ ಮುಂದಾದರು. ತುರ್ತು ಪರಿಹಾರಕ್ಕೆ ಕೇರಳ ಸರ್ಕಾರ ಸ್ಪಂದಿಸಲಿದೆ. ಪ್ರಕೃತಿ ವಿಕೋಪಕ್ಕೆ ಏನೂ ಮಾಡಲು ಸಾಧ್ಯವಿಲ್ಲ. ಕರ್ನಾಟಕ ರಾಜ್ಯದ ಸಂಬಂಧಿಸಿದ ಸಚಿವರು, ಉನ್ನತಾಧಿಕಾರಿಗಳೊಂದಿಗೆ ಸಂಪರ್ಕಿಸಿ ಮುಂದಿನ ಕ್ರಮ ಕೈಗೊಳ್ಳುವುದಾಗಿ ತಿಳಿಸಿದರು.

Leave a Reply

Your email address will not be published. Required fields are marked *

Back To Top