Sunday, 24th June 2018  

Vijayavani

ಆಪ್ತರ ಜತೆ ಮಾಜಿ ಸಿಎಂ ಸಭೆ ಹಿನ್ನೆಲೆ - ಸಿದ್ದರಾಮಯ್ಯ ಭೇಟಿಗೆ ತೆರಳಿದ ಪರಂ - ರಾಜಕೀಯ ವಿಚಾರಗಳ ಬಗ್ಗೆ ನಾಯಕರ ಚರ್ಚೆ ಸಾಧ್ಯತೆ        ಪ್ರಕೃತಿ ಚಿಕಿತ್ಸಾಲಯದಿಂದ ಹೊರ ಬಂದ ಸಿದ್ದು - ಅಭಿಮಾನಿಗಳ ಜತೆ ಮಾಜಿ ಸಿಎಂ ಚರ್ಚೆ - ಕೈ ಕಾರ್ಯಕರ್ತರ ಜತೆ ಸೆಲ್ಫಿಗೆ ಫೋಸ್​​        ಶಿವಮೊಗ್ಗದಲ್ಲಿ ಮತ್ತೆ ಝಳಪಿಸಿದ ಮಾರಕಾಸ್ತ್ರ - ರೌಡಿ ಶೀಟರ್​​​ ಹಬೀಬ್​ ಬರ್ಬರ ಹತ್ಯೆ - ತುಂಗಾನಗರ ಠಾಣೆಯಲ್ಲಿ ಪ್ರಕರಣ        ಖಾತೆ ಹಂಚಿಕೆಯಾಯ್ತು, ಈಗ ಬಂಗಲೆ ಸರದಿ - ಒಂದೊಂದು ಬಂಗಲೆಗೆ ಮೂವರ ಪೈಪೋಟಿ - ಸಿಎಂ ಕುಮಾರಸ್ವಾಮಿಗೆ ಬಂಗಲೆ ಕೊಡೋದೇ ಚಿಂತೆ        ಹಿಟ್​​ಲಿಸ್ಟ್​​ನಲ್ಲಿದ್ದ 20 ಉಗ್ರರ ಪೈಕಿ ಇಬ್ಬರು ಫಿನಿಶ್ - ಕುಲ್ಗಾಮದಲ್ಲಿ ಇಬ್ಬರು ಎಲ್​​ಇಟಿ ಉಗ್ರರು ಉಡೀಸ್​ - ಶಸ್ತ್ರ ಸಹಿತ ಒಬ್ಬ ಟೆರರ್​ ಸರೆಂಡರ್        ಮನೆಗಾಗಿ ಕಣ್ಣೀರಿಟ್ಟ ವೃದ್ಧೆಗೆ ಶಾಸಕರ ಸಹಾಯ - 20 ಸಾವಿರ ಹಣ ನೀಡಿದ ಡಾ.ರಂಗನಾಥ - ದಿಗ್ವಿಜಯ ನ್ಯೂಸ್​ ವರದಿಗೆ ಸ್ಪಂದಿಸಿದ ಕುಣಿಗಲ್​ ಶಾಸಕ       
Breaking News

ಸದಾಶಯಕ್ಕೆ ಧಕ್ಕೆಯಾಗದಿರಲಿ

Monday, 04.06.2018, 3:03 AM       No Comments

ಸಂಪನ್ಮೂಲ ಕ್ರೋಡೀಕರಿಸುವ ಸದಾಶಯದ ಒಂದು ಭಾಗವಾಗಿ ಅನಗತ್ಯ ವೆಚ್ಚಗಳಿಗೆ ಲಗಾಮು ಹಾಕಲು ಮುಖ್ಯಮಂತ್ರಿಗಳು ಮುಂದಾಗಿದ್ದಾರೆ. ತುರ್ತು ಸಂದರ್ಭ ಹೊರತುಪಡಿಸಿ ವಿಶೇಷ ವಿಮಾನ ಪ್ರಯಾಣಕ್ಕೆ ಮುಂದಾಗದಿರುವುದು, ಸಚಿವರು ಮತ್ತು ಶಾಸಕರ ಕೊಠಡಿ-ಕಚೇರಿ ನವೀಕರಣಕ್ಕೆ ತಡೆ, ಹೊಸಕಾರು ಖರೀದಿಗೆ ನಿರ್ಬಂಧ- ಹೀಗೆ ಮಿತವ್ಯಯ ಸಾಧಿಸುವ ನಿಟ್ಟಿನಲ್ಲಿ ಹಮ್ಮಿಕೊಳ್ಳಲಾಗಿರುವ ಉಪಕ್ರಮಗಳು ನಿಜಕ್ಕೂ ಶ್ಲಾಘನೀಯವೇ. ಮುಖ್ಯಮಂತ್ರಿಗಳ ಕಳಕಳಿಯನ್ನು ಸಂಶಯಿಸಬೇಕಾದ್ದಿಲ್ಲ. ಆದರೆ ‘ದೀಪದ ಕೆಳಗಿನ ಕತ್ತಲು’ ಢಾಳಾಗೇ ಇರುವ ಕಹಿವಾಸ್ತವಕ್ಕೆ ಏನನ್ನುವುದು?

ಈ ಅಭಿಪ್ರಾಯಕ್ಕೆ ಕಾರಣಗಳು ಇಲ್ಲದಿಲ್ಲ. ಒಂದೆಡೆ ವೆಚ್ಚ ಕಡಿತದ ತಹತಹ ಹೊಮ್ಮಿದ್ದರೆ, ಇನ್ನೊಂದೆಡೆ ನೂತನ ಸಚಿವರಿಗಾಗಿ ಈಗಾಗಲೇ 20 ಇನ್ನೋವಾ ಕಾರುಗಳ ಖರೀದಿಯಾಗಿರುವ, ವಿಧಾನಸೌಧದ ಸಾಕಷ್ಟು ಕೊಠಡಿಗಳ ಮತ್ತು ಸಚಿವರ ಅಧಿಕೃತ ನಿವಾಸಗಳ ನವೀಕರಣ ಈಗಾಗಲೇ ಮುಗಿದಿರುವ ಬೆಳವಣಿಗೆಯೂ ಕಂಡುಬಂದಿದೆ. ಮುಖ್ಯಮಂತ್ರಿಗಳ ಕಚೇರಿಯಲ್ಲಿ ಅವಶ್ಯಕತೆಗಿಂತ ಹೆಚ್ಚಿರುವ ಸಿಬ್ಬಂದಿಗೆ ಗೇಟ್​ಪಾಸ್ ಕೊಡುವ ಚಿಂತನೆ ಒಂದೆಡೆ ಹೊಮ್ಮಿದ್ದರೆ, ಸಚಿವಾಲಯದಲ್ಲಿ 92 ಹುದ್ದೆಗೆ ಅರ್ಜಿ ಆಹ್ವಾನಿಸಿ 250ಕ್ಕೂ ಹೆಚ್ಚು ಗುಮಾಸ್ತರು ಹಾಗೂ ದಲಾಯತ್ ಹುದ್ದೆಗಳನ್ನು ಈಗಾಗಲೇ ಭರ್ತಿಮಾಡಲಾಗಿದೆ. ಇಷ್ಟು ಸಾಲದೆಂಬಂತೆ, ಈಗಾಗಲೇ ಹಿಂಬಡ್ತಿ ಪಡೆದು ವರ್ಗಾವಣೆಗೊಂಡಿರುವ ಮತ್ತು ಅಲ್ಲಿ ಕರ್ತವ್ಯಕ್ಕೆ ಹಾಜರಾಗಬೇಕಿರುವ ಲೋಕೋಪಯೋಗಿ ಇಲಾಖೆಯ ಕೆಲ ಅಧಿಕಾರಿಗಳು ವಿಧಾನಸೌಧದಲ್ಲೇ ನೆಲೆಗೊಂಡು, ಬೇಕಾಬಿಟ್ಟಿಯಾಗಿ ಟೆಂಡರ್ ಕರೆದಿರುವಂಥ ಘಟನೆಯೂ ಜರುಗಿದೆ. ಈ ಎಲ್ಲ ಬೆಳವಣಿಗೆಗಳು ನಿಜಕ್ಕೂ ಮುಖ್ಯಮಂತ್ರಿಗಳ ಗಮನಕ್ಕೆ ಬಂದಿಲ್ಲವೇ? ಸಾರ್ವಜನಿಕರ ಕೆಲಸ ಕಾರ್ಯಗಳು ಮತ್ತು ಅಭಿವೃದ್ಧಿ ಚಟುವಟಿಕೆಗಳು ಸುಲಲಿತವಾಗಿ ನಡೆಯಬೇಕೆಂದರೆ, ಅಧಿಕಾರಸ್ಥಾನದಲ್ಲಿ ಆಸೀನರಾಗಿರುವವರಿಗೆ ಒಂದಷ್ಟು ಹೆಚ್ಚುವರಿ ಸೌಲಭ್ಯ-ಸೌಕರ್ಯಗಳು ಬೇಕಾಗುತ್ತವೆ ಎಂಬುದೇನೋ ದಿಟ. ಆದರೆ ಅದಕ್ಕೊಂದು ಇತಿಮಿತಿ, ಮೇಲ್ಪಂಕ್ತಿ, ಶಿಸ್ತು ಮತ್ತು ಸ್ವಯಂ-ನಿಯಂತ್ರಣ ಇರಬೇಕಲ್ಲವೇ? ಇಂಥ ಯಾವುದೇ ದುಂದುವೆಚ್ಚಕ್ಕೆ ಬಳಕೆಯಾಗುವುದು ಸಾರ್ವಜನಿಕರ ತೆರಿಗೆ ಹಣ ಎಂಬ ವಾಸ್ತವದ ಅರಿವಿಲ್ಲದಾಗ ಮತ್ತು ತೆರಿಗೆದಾರರಿಗೆ ತಾವು ಉತ್ತರದಾಯಿಗಳಾಗಬೇಕು ಎಂಬ ಬದ್ಧತೆ ಜನಪ್ರತಿನಿಧಿಗಳಲ್ಲೂ ಅವರಿಗೆ ಪೂರಕವಾಗಿ ಕಾರ್ಯನಿರ್ವಹಿಸುವ ಉನ್ನತಾಧಿಕಾರಿಗಳಲ್ಲೂ ರೂಪುಗೊಳ್ಳದಿದ್ದಾಗ ಇಂಥ ಅಪಸವ್ಯಗಳು ಸಂಭವಿಸುತ್ತವೆ ಎನ್ನಲೇಬೇಕಾಗಿದೆ. ಹೀಗಾಗಿಯೇ ‘ಅಧಿಕಾರ ಇರುವುದು ಜನಸೇವೆಗೆ’ ಎಂಬ ಗ್ರಹಿಕೆಗೆ ಬದಲಾಗಿ ‘ಅಧಿಕಾರವಿರುವುದು ಅನುಭವಿಸುವುದಕ್ಕಾಗಿ’ ಎಂಬ ಠೇಂಕಾರ ಸಂಬಂಧಪಟ್ಟವರಲ್ಲಿ ಸ್ಪುರಿಸುವಂತಾಗಿದೆ.

ಕುಮಾರಸ್ವಾಮಿಯವರು ಅಧಿಕಾರ ವಹಿಸಿಕೊಂಡು ಕೆಲವೇ ದಿನಗಳಾಗಿರಬಹುದು; ಆದರೆ ‘ಶಕ್ತಿಕೇಂದ್ರ’ಕ್ಕೆ ಅವರು ಹೊಸಬರೇನಲ್ಲ. ಹೀಗಾಗಿ, ಆಯಕಟ್ಟಿನ ಜಾಗಗಳನ್ನು ಅವರು ಬಿಗಿಮಾಡಬೇಕಿದೆ. ವೆಚ್ಚಕಡಿತಕ್ಕೆಂದು ಮೇಲುಮೇಲಿನ ಕ್ರಮಗಳಿಗೆ ಮುಂದಾಗುವುದರ ಬದಲು, ಈಗಾಗಲೇ ಬಿಲ ತೋಡಿ ಆಶ್ರಯ ಕಂಡುಕೊಂಡಿರುವ ಹೆಗ್ಗಣಗಳನ್ನು ಹೆಡೆಮುರಿ ಕಟ್ಟಬೇಕಿದೆ. ಸರ್ಕಾರಿ ಬೊಕ್ಕಸಕ್ಕೆ ಒಂದಲ್ಲ ಒಂದು ರೀತಿಯಲ್ಲಿ ಹೊರೆಯಾಗಿ ಪರಿಣಮಿಸಿರುವ ವೈವಿಧ್ಯಮಯ ಬಾಬತ್ತುಗಳಿಗೆ ಮತ್ತು ಅದಕ್ಕೆ ಕಾರಣರಾಗಿರುವವರಿಗೆ ನಿಜಾರ್ಥದಲ್ಲಿ ಕಡಿವಾಣ ಹಾಕಬೇಕಿದೆ. ಹೇಳಿಕೇಳಿ ಇದು ಸಮ್ಮಿಶ್ರ ಸರ್ಕಾರವಾಗಿರುವುದರಿಂದ, ಮುಖ್ಯಮಂತ್ರಿಗಳ ಆದೇಶಕ್ಕೆ ಸರ್ಕಾರದ ಸಹಭಾಗಿಗಳಿಂದ ಯಾವ ಮಟ್ಟಿಗಿನ ಸ್ಪಂದನೆ ದೊರೆಯಲಿದೆ ಎಂಬುದನ್ನೂ ಕಾದು ನೋಡುವಂತಾಗಿದೆ. ಒಟ್ಟಾರೆ ಹೇಳುವುದಾದರೆ, ಮಿತವ್ಯಯದ ಸೂತ್ರ ನಿಜಾರ್ಥದಲ್ಲಿ ಅನುಷ್ಠಾನಗೊಳ್ಳಬೇಕು; ಇಲ್ಲವಾದಲ್ಲಿ ಶ್ರೀಸಾಮಾನ್ಯರು ಅವರ ನಡೆಯನ್ನೇ ಸಂಶಯದ ಕಣ್ಣುಗಳಿಂದ ನೋಡುವ ಸಾಧ್ಯತೆಯಿದೆ.

Leave a Reply

Your email address will not be published. Required fields are marked *

Back To Top