Friday, 19th October 2018  

Vijayavani

ನಾಡಿನೆಲ್ಲೆಡೆ ವಿಜಯದಶಮಿ ಸಡಗರ-ಐತಿಹಾಸಿಕ ಜಂಬೂಸವಾರಿಗೆ ಕ್ಷಣಗಣನೆ-ಸಾಂಸ್ಕೃತಿಕ ನಗರಿಯತ್ತ ಜನಸ್ತೋಮ        ತೂಕ ಹೆಚ್ಚಿಸಿಕೊಂಡ ಅರ್ಜುನ & ಟೀಂ-ಅಂಬಾರಿ ಹೊರಲು ಕ್ಯಾಪ್ಟನ್ ಗ್ರೀನ್‌ ಸಿಗ್ನಲ್-ಮೈಸೂರು ನಗರಿಗೆ ಬಿಗಿ ಬಂದೋಬಸ್ತ್​​​        ಡಿಕೆಶಿ ತಪ್ಪೊಪ್ಪಿಗೆಗೆ ಕಾಂಗ್ರೆಸ್​​​​​​ನಲ್ಲಿ ಭಿನ್ನಮತ-ಕನಕಪುರ ನಾಯಕನ ವಿರುದ್ಧ ದಿಗ್ಗಜರ ಆಕ್ರೋಶ        ಶಬರಿಮಲೆ ಸುತ್ತ ನಿಲ್ಲದ ಪ್ರತಿಭಟನೆ-ಸುಪ್ರೀಂಗೆ ಅರ್ಜಿ ಸಲ್ಲಿಸಲು ಮತ್ತೊಮ್ಮೆ ಸಭೆ-ಅಯ್ಯಪ್ಪನ ಪೂಜೆಗೆ ಕರ್ನಾಟಕದ ಅರ್ಚಕ ನೇಮಕ        ಅಮೆರಿಕ ಅಧ್ಯಕ್ಷನಿಂದ ಮತ್ತೊಂದು ಶಾಕ್​-ಎಚ್​​1 ಬಿ ವೀಸಾ ನಿಯಮ ಮತ್ತಷ್ಟು ಬಿಗಿ ಮಾಡಲು ಸಿದ್ಧತೆ-ಅನಿವಾಸಿ ಭಾರತೀಯರಿಗೆ ಶಾಕ್​        ಕಲೆಕ್ಷನ್​​​​​​ನಲ್ಲಿ ಧೂಳೆಬ್ಬಿಸುತ್ತಿದ್ಧಾನೆ ವಿಲನ್​-ಮೊದಲ ದಿನವೇ ಇಪ್ಪತ್ತುವರೆ ಕೋಟಿ ಸಂಗ್ರಹ​-ಸ್ಯಾಂಡಲ್​​​ವುಡ್​​​​ ದಾಖಲೆಗಳೆಲ್ಲ ಪೀಸ್​ ​​       
Breaking News

ಜನಸ್ನೇಹಿ ಕ್ರಮಗಳು

Friday, 20.04.2018, 3:05 AM       No Comments

ಸಾರ್ವಜನಿಕ ಸಾರಿಗೆ ಕ್ಷೇತ್ರಕ್ಕೆ ಸಂಬಂಧಿಸಿದಂತೆ ಇದೀಗ ಹಲವು ಮಹತ್ವದ ನಿರ್ಣಯಗಳು ಹೊರಹೊಮ್ಮಿದ್ದು, ಇವು ಸಾರಿಗೆ ವ್ಯವಸ್ಥೆಯ ಲೋಪದೋಷಗಳನ್ನು ಸರಿಪಡಿಸಲು ಮತ್ತು ಸಾರ್ವಜನಿಕರಿಗೆ ಇನ್ನಷ್ಟು ಉತ್ತರದಾಯಿತ್ವ ಆಗಲು ಪೂರಕವಾಗಿವೆ ಎನ್ನಬಹುದು. ಲಘು ಮೋಟಾರು ವಾಹನ(ಎಲ್​ಎಂವಿ) ವಿಭಾಗದ ಟ್ಯಾಕ್ಸಿ, ಆಟೋ, ಇ-ರಿಕ್ಷಾ, ಇ-ಕಾರ್ಟ್ ಮತ್ತು ಗೂಡ್ಸ್ ರಿಕ್ಷಾ ಓಡಿಸಲು ಇನ್ನು ಸಾರಿಗೆ ವಾಹನ ಚಾಲನೆ(ಟ್ರಾನ್ಸ್​ಪೋರ್ಟ್) ಲೈಸೆನ್ಸ್ ಅಗತ್ಯವಿಲ್ಲ ಎಂದು ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯ ಹೇಳಿದ್ದು, ಎಲ್​ಎಂವಿ ಲೈಸೆನ್ಸ್ ಇದ್ದವರೂ ಈ ವಾಹನಗಳನ್ನು ಓಡಿಸಬಹುದು ಎಂದಿದೆ. ಎಲ್​ಎಂವಿ ಲೈಸೆನ್ಸ್ ಪಡೆದ ಚಾಲಕರೂ ಟ್ಯಾಕ್ಸಿ ಓಡಿಸಲು ಅರ್ಹರಾಗುವ ಪರಿಣಾಮ ಟ್ಯಾಕ್ಸಿ ಮತ್ತು ಆಟೋಗಳ ಸಂಖ್ಯೆ ಹೆಚ್ಚಿ ಚಾಲನಾರಂಗದಲ್ಲಿ ಉದ್ಯೋಗಾವಕಾಶಗಳು ಹೆಚ್ಚಲಿವೆ. ಸುಪ್ರೀಂ ಕೋರ್ಟ್ ತೀರ್ಪಿಗೆ ಅನುಗುಣವಾಗಿ ಕೇಂದ್ರ ಸರ್ಕಾರ ಈ ಕುರಿತು ಎಲ್ಲ ರಾಜ್ಯಗಳಿಗೆ ಸೂಚನೆ ನೀಡಿದೆ.

ಮತ್ತೊಂದು ಪ್ರಮುಖ ವಿದ್ಯಮಾನ ವಿಮಾನಯಾನ ಕ್ಷೇತ್ರಕ್ಕೆ ಸಂಬಂಧಿಸಿದ್ದು. ಅದೆಷ್ಟೋ ಬಾರಿ ದಿಢೀರನೆ ವಿಮಾನಯಾನ ರದ್ದಾಗಿ ಪ್ರಯಾಣಿಕರು ಪಡುವ ಪಡಿಪಾಟಿಲು ಅಷ್ಟಿಷ್ಟಲ್ಲ. ಇನ್ನುಮುಂದೆ ವಿಮಾನಯಾನ ಕಂಪನಿಗಳು ಏನೋ ಸಬೂಬು ಹೇಳಿ ಸುಮ್ಮನಾಗಲಾಗದು. ಕೇಂದ್ರ ನಾಗರಿಕ ವಿಮಾನಯಾನ ಸಚಿವಾಲಯವು ಹೊಸ ಕರಡು ನೀತಿ ಪ್ರಕಟಿಸಿದ್ದು, ಪೂರ್ವ ನಿಗದಿತ ವಿಮಾನಯಾನ ರದ್ದು ಅಥವಾ ವಿಳಂಬದಿಂದ ಮುಂದಿನ ವಿಮಾನ ತಪ್ಪಿದರೆ ಪ್ರಯಾಣಿಕರಿಗೆ 20 ಸಾವಿರ ರೂ. ಪರಿಹಾರ ಮೊತ್ತ ನೀಡುವ ನಿಯಮ ತರಲು ಚಿಂತನೆ ನಡೆಸಲಾಗಿದೆ. ಅಲ್ಲದೆ, ವಿಮಾನ ವಿಳಂಬ, ರನ್-ವೇನಲ್ಲಿನ ವಿಳಂಬ, ಬ್ಯಾಗೇಜ್ ನಾಪತ್ತೆ ಹಾಗೂ ಬೋರ್ಡಿಂಗ್​ಗೆ ನಿರಾಕರಣೆ ಕುರಿತು ಹೊಸ ನಿಯಮ ಮಾಡಲಾಗಿದೆ. ಈ ಕ್ರಮಗಳಿಗೆ ವಿಮಾನಯಾನ ಕಂಪನಿಗಳು ವಿರೋಧ ತೋರಿವೆಯಾದರೂ, ಪ್ರಯಾಣಿಕರ ಹಿತ ಗಮನಿಸಿ ನಿರ್ಧಾರ ಕೈಗೊಳ್ಳಲಾಗುವುದು ಎಂದು ವಿಮಾನಯಾನ ಇಲಾಖೆ ಪುನರುಚ್ಚರಿಸಿರುವುದರಿಂದ ಒತ್ತಡಕ್ಕೆ ಮಣಿಯುವ ಸಾಧ್ಯತೆ ಕಡಿಮೆ.

ಇನ್ನು, ಜನರು ಸಂಚಾರಕ್ಕೆ ಸಾರ್ವಜನಿಕ ಸಾರಿಗೆಯನ್ನು ಹೆಚ್ಚೆಚ್ಚು ಬಳಸಬೇಕು ಎಂದು ಪ್ರಚಾರವನ್ನೇನೋ ಮಾಡಲಾಗುತ್ತದೆ. ಆದರೆ, ಸುರಕ್ಷೆಯ ಪ್ರಶ್ನೆ ಬಂದಾಗ ಜನಸಾಮಾನ್ಯರು ಯೋಚಿಸಲೇ ಬೇಕಾದ ಸನ್ನಿವೇಶವಿದೆ. ಇದಕ್ಕೂ ಪರಿಹಾರ ಕಂಡುಕೊಳ್ಳಲು ಮುಂದಾಗಿರುವ ಸರ್ಕಾರ ಸಾರ್ವಜನಿಕ ಸಾರಿಗೆ ವಾಹನಗಳಲ್ಲಿ ಪ್ಯಾನಿಕ್ ಬಟನ್ ಅಳವಡಿಕೆ ಕಡ್ಡಾಯಗೊಳಿಸಿದೆ. ಹೆಚ್ಚುತ್ತಿರುವ ಅತ್ಯಾಚಾರ ಮತ್ತು ಇತರೆ ಅಪರಾಧ ಪ್ರಕರಣಗಳ ಹಿನ್ನೆಲೆಯಲ್ಲಿ ಸುರಕ್ಷೆ ನಿಟ್ಟಿನಲ್ಲಿ ಕ್ರಮ ಕೈಗೊಳ್ಳಬೇಕು ಎಂಬ ಜನಾಗ್ರಹ ಕೇಳಿಬರುತ್ತಲೇ ಇತ್ತು. ಟ್ಯಾಕ್ಸಿ ಮತ್ತು ಬಸ್ ಪ್ರಯಾಣ ಸಂದರ್ಭ ಆಕಸ್ಮಿಕವಾಗಿ ಅಪಾಯದ ಸನ್ನಿವೇಶ ಎದುರಾದರೆ ಈ ಸ್ವಿಚ್ ಒತ್ತಿದರೆ ಸ್ಥಳೀಯ ಪೊಲೀಸ್ ಠಾಣೆಗೆ ಸಂದೇಶ ರವಾನೆಯಾಗುತ್ತದೆ. ವಾಹನ ಸಂಚರಿಸುತ್ತಿರುವ ಸ್ಥಳ ಪೊಲೀಸರಿಗೆ ತಿಳಿಯುತ್ತದೆ. ಜತೆಗೆ ಅಪಾಯ ಗಂಟೆ ಜೋರಾಗಿ ಸದ್ದು ಮಾಡುವುದರಿಂದ ವಾಹನವಿರುವ ಪ್ರದೇಶದಲ್ಲಿನ ಸ್ಥಳೀಯರ ನೆರವನ್ನು ಪಡೆಯಲು ಕೂಡ ಅನುಕೂಲವಾಗಲಿದೆ ಎಂಬುದು ಗಮನಾರ್ಹ. ಈ ಎಲ್ಲ ಉಪಕ್ರಮಗಳು ಜನಸ್ನೇಹಿಯೆಂಬುದು ಖರೆ. ಆದರೆ, ಇವುಗಳ ದುರುಪಯೋಗವಾಗದಂತೆ, ಪ್ರಯಾಣಿಕರಿಗೆ ಕಿರಿಕಿರಿ ಆಗದಂತೆ ಹೊಸ ನಿಯಮಗಳನ್ನು ಪರಿಣಾಮಕಾರಿಯಾಗಿ, ಸಮರ್ಪಕವಾಗಿ ಅನುಷ್ಠಾನಗೊಳಿಸುವುದು ಕೂಡ ಅಷ್ಟೇ ಮುಖ್ಯ.

Leave a Reply

Your email address will not be published. Required fields are marked *

Back To Top