Tuesday, 16th October 2018  

Vijayavani

ಉಪ ಮಹಾಸಂಗ್ರಾಮದ ಅಖಾಡ ಫೈನಲ್-ಕೊನೆದಿನ ಉಗ್ರಪ್ಪ, ಶಾಂತಾ, ಮಧು ನಾಮಪತ್ರ- ಎಲೆಕ್ಷನ್ ಗೆಲ್ಲಲು ತಂತ್ರ, ಪ್ರತಿತಂತ್ರ        ರಣಕಣದಲ್ಲಿ ಆರಂಭವಾಯ್ತಾ ಜಾತಿ ಮೇಲಾಟ?-ಡಿಕೆಗೆ ಪೋಸ್ ಲೀಡರ್ ಅಂತಾ ಜಾರಕಿಹೊಳಿ ಟಾಂಗ್- ಇನ್ನೂ ಆರದ ಕೈ ದಳ್ಳುರಿ.!        ನಾಮಿನೇಷನ್ ಆಯ್ತು ಈಗ ಯುದ್ಧ ಸ್ಟಾರ್ಟ್​- ಉಪಚುನಾವಣೆಯಲ್ಲಿ ಯಾರ ಪರ ಇದೆ ಜನಮತ- ದಿಗ್ವಿಜಯ ಗ್ರೌಂಡ್​ ರಿಪೋರ್ಟ್​        ನಾಳೆ ಶಬರಿಮಲೈ ದೇವಸ್ಥಾನ ಬಾಗಿಲು ಓಪನ್- ಪ್ರವೇಶಕ್ಕೆ ಕೆಲ ನಾರಿಯರ ಕಾತರ- ಮಹಿಳಾ ಎಂಟ್ರಿ ವಿರುದ್ಧ ಭುಗಿಲೆದ್ದ ಹೋರಾಟ        ಬಿಹಾರ ಲೋಕಗುರಿ ತಲುಪಲು ನಿತೀಶ್ ಹೊಸಬಾಣ- ಪ್ರಶಾಂತ್​ ಕಿಶೋರ್​​ ಗೆ ಪಕ್ಷದಲ್ಲಿ ಜವಾಬ್ದಾರಿ        ಮೈಸೂರು ದಸರಾದಲ್ಲಿ ಮತ್ತಷ್ಟು ವೈಭವ -2000 ಬೊಂಬೆಗಳ ಪ್ರದರ್ಶನ-ಆನೆಗಳಿಗೆ ಅಂತಿಮ ತಾಲೀಮು, ಕಳೆಗಟ್ಟಿದ ಪುಷ್ಪಲೋಕ       
Breaking News

ಕಿರಿಯರ ವಿಶ್ವಕಪ್ ಎಂಬ ಚಿಮ್ಮುಹಲಗೆ

Wednesday, 07.02.2018, 3:05 AM       No Comments

ಮೊನ್ನೆ ನ್ಯೂಜಿಲೆಂಡ್​ನಲ್ಲಿ ಭಾರತದ ಹುಡುಗರು ದಾಖಲೆ 4ನೇ ಬಾರಿಗೆ ಕಿರಿಯರ ವಿಶ್ವಕಪ್ ಚಾಂಪಿಯನ್ ಪಟ್ಟಕ್ಕೇರಿದ ಬಳಿಕ ಕೋಚ್ ರಾಹುಲ್ ದ್ರಾವಿಡ್ ಒಂದು ಮಾತು ಹೇಳಿದರು. ‘ಈ ಕಿರೀಟ ನಮ್ಮ ಹುಡುಗರ ಸಾಧನೆಯ ಉತ್ತುಂಗವಲ್ಲ, ಇದಿನ್ನೂ ಆರಂಭ. ಅಂತಾರಾಷ್ಟ್ರೀಯ ಕ್ರಿಕೆಟ್​ನ ದುರ್ಗಮ ಪಯಣ ಅವರ ಪಾಲಿಗೆ ಈಗಷ್ಟೇ ಆರಂಭಗೊಂಡಿದೆ…’

19 ವಯೋಮಿತಿ ಕ್ರಿಕೆಟಿಗರಿಗಾಗಿ ನಡೆಯುವ ವಿಶ್ವಕಪ್​ನ ಮೂಲ ಉದ್ದೇಶವೇ ಅದು. ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ಸೂಪರ್​ಸ್ಟಾರ್​ಗಳಾಗುವ ಕನಸು ಕಾಣುವವರಿಗೆ ಈ ವಿಶ್ವಕಪ್ ಒಂದು ಚಿಮ್ಮುಹಲಗೆ. ಈ ಟೂರ್ನಿಯಲ್ಲಿ ಆಡುವುದರಿಂದ ಸಿಗುವ ಅನುಭವ, ಗೆದ್ದಾಗ ದೊರಕುವ ಆತ್ಮವಿಶ್ವಾಸ ಮುಂದಿನ ವೃತ್ತಿಜೀವನದುದ್ದಕ್ಕೂ ಕೈಹಿಡಿದು ಮುನ್ನಡೆಸುತ್ತದೆ.

ಸ್ವರೂಪ-ಮಾದರಿ ಯಾವುದೇ ಇರಲಿ, ವಿಶ್ವಕಪ್ ಎಂದ ಮೇಲೆ ಅದಕ್ಕಿರುವ ಮಹತ್ವ, ಪ್ರಭಾವಳಿ ಕಡಿಮೆ ಆಗುವುದಿಲ್ಲ. ಆದರೂ, ಏಕದಿನ ಅಥವಾ ಟಿ20 ವಿಶ್ವಕಪ್ ಗೆಲ್ಲುವುದಕ್ಕೂ ಕಿರಿಯರ ವಿಶ್ವಕಪ್ ಗೆಲ್ಲುವುದಕ್ಕೂ ಅಗಾಧ ವ್ಯತ್ಯಾಸವಿದೆ. ಏಕದಿನ ವಿಶ್ವಕಪ್ ಗೆದ್ದ ಮೇಲೆ ಸಂತೃಪ್ತಿಯಿಂದ ನಿವೃತ್ತರಾಗಬಹುದು ಅಥವಾ ಒಂದೂ ಪಂದ್ಯ ಆಡುವ ಅವಕಾಶ ಮತ್ತೆ ಸಿಗದಿದ್ದರೂ, ಬೇಸರಿಸದೆ ನೇಪಥ್ಯಕ್ಕೆ ಸರಿದುಬಿಡಬಹುದು. ಏಕೆಂದರೆ, ವಿಶ್ವಚಾಂಪಿಯನ್ ತಂಡದ ಸದಸ್ಯ ಎಂಬ ಮಹೋನ್ನತ ಗೌರವ ಅವರಿಗಾಗಲೇ ಸಂದಿರುತ್ತದೆ. ಆದರೆ, ಕಿರಿಯರ ವಿಶ್ವಕಪ್ ಗೆಲುವು ಹಾಗಲ್ಲ. ಅದೊಂದು ದೊಡ್ಡ ಮಟ್ಟದ ಸಾಧನೆಗೆ ಚಿಮ್ಮುಹಲಗೆಯೇ ಹೊರತು, ಸಿಂಹಾಸನವಲ್ಲ. ಈ ಟೂರ್ನಿಯಲ್ಲಿ ಪಾಲ್ಗೊಳ್ಳುವ, ಮಿಂಚುವ ಆಟಗಾರರ ಮೇಲೆ ಇಡೀ ಕ್ರಿಕೆಟ್ ಜಗತ್ತು ಗಮನವಿರಿಸಿರುತ್ತದೆ. ಭವಿಷ್ಯದಲ್ಲಿ ಅವರು ಯಾವ ಮಟ್ಟಕ್ಕೆ ಏರಬಹುದೆಂಬ ಕುತೂಹಲವಿರುತ್ತದೆ. ದ್ರಾವಿಡ್ ಹೇಳಿದ್ದೂ ಅದನ್ನೇ.

ಭಾರತ 2012ರಲ್ಲೂ ಆಸ್ಟ್ರೇಲಿಯಾದಲ್ಲಿ ನಡೆದ ಕಿರಿಯರ ವಿಶ್ವಕಪ್​ನಲ್ಲಿ ಚಾಂಪಿಯನ್ ಪಟ್ಟಕ್ಕೇರಿತ್ತು. ಫೈನಲ್​ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಭರ್ಜರಿ ಶತಕ ಬಾರಿಸುವ ಮೂಲಕ ನಾಯಕ ಉನ್ಮುಕ್ತ್ ಚಾಂದ್ ಟೂರ್ನಿಯ ಹೀರೋ ಆಗಿ ಹೊರಹೊಮ್ಮಿದ್ದರು. ಆದರೆ, ಆ ಚಾಂಪಿಯನ್ ತಂಡದ ‘ಚಾಂಪಿಯನ್’ ಆಟಗಾರರು ನಂತರದ ವರ್ಷಗಳಲ್ಲಿ ಕಳೆದೇ ಹೋದರು. ಆ ತಂಡದಲ್ಲಿದ್ದ ವೇಗಿ ಸಂದೀಪ್ ಶರ್ಮ ಹೊರತುಪಡಿಸಿದರೆ ಬೇರೆ ಯಾರೂ ಭಾರತ ತಂಡದ ಸದಸ್ಯರಾಗುವ ಮಟ್ಟಿಗೆ ಬೆಳೆಯಲಿಲ್ಲ. ಅದಕ್ಕೆ ಪ್ರತಿಯಾಗಿ ಫೈನಲ್​ನಲ್ಲಿ ಸೋತಿದ್ದ ಆಸ್ಟ್ರೇಲಿಯಾದ 5-6 ಕಿರಿಯ ಆಟಗಾರರು ನಂತರದ ದಿನಗಳಲ್ಲಿ ರಾಷ್ಟ್ರೀಯ ತಂಡ ಪ್ರತಿನಿಧಿಸಿದರು. ಈ ಲೆಕ್ಕಾಚಾರದಲ್ಲಿ ನೋಡಿದರೆ, 2012ರ ಟೂರ್ನಿಯಲ್ಲಿ ನಿಜವಾದ ಚಾಂಪಿಯನ್ ನಾವಲ್ಲ, ಆಸ್ಟ್ರೇಲಿಯಾ ಎನ್ನುವುದು ದ್ರಾವಿಡ್ ಅಭಿಪ್ರಾಯ.

ಹಾಗೆಂದು ಕಿರಿಯರ ವಿಶ್ವಕಪ್ ಟೂರ್ನಿಗಳು ಅಷ್ಟೇನೂ ಮಹತ್ವದ್ದಲ್ಲ ಎನ್ನಲಾಗದು. ಸದ್ಯ ವಿಶ್ವ ನಂ.1 ಆಟಗಾರ, ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ 2008ರಲ್ಲಿ ಭಾರತ ಮಲೇಶಿಯಾದಲ್ಲಿ ಕಿರಿಯರ ಕಿರೀಟ ಗೆದ್ದಾಗ ತಂಡದ ನಾಯಕರಾಗಿದ್ದರು. ಕನ್ನಡಿಗ ಮನೀಶ್ ಪಾಂಡೆಯೂ ಆ ತಂಡದಲ್ಲಿದ್ದರು. ಅಷ್ಟೇ ಏಕೆ, ಭಾರತದ ಅಗ್ರಮಾನ್ಯ ಕ್ರಿಕೆಟಿಗರಾದ ಯುವರಾಜ್ ಸಿಂಗ್, ಮೊಹಮ್ಮದ್ ಕೈಫ್, ವೀರೇಂದ್ರ ಸೆಹ್ವಾಗ್, ಹರ್ಭಜನ್ ಸಿಂಗ್, ರಾಬಿನ್ ಉತ್ತಪ್ಪ ಮೊದಲಾದವರೆಲ್ಲ ಕಿರಿಯರ ವಿಶ್ವಕಪ್ ಆಡಿ ಹಿರಿಯರ ತಂಡಕ್ಕೆ ಬಡ್ತಿ ಪಡೆದವರು. 2000ದಲ್ಲಿ ಭಾರತ ಚೊಚ್ಚಲ ಬಾರಿ ಪ್ರಶಸ್ತಿ ಗೆದ್ದಾಗ ಮೊಹಮ್ಮದ್ ಕೈಫ್ ನಾಯಕರಾಗಿದ್ದರು. 90ರ ದಶಕದ ಹೀರೋಗಳಾದ ಪ್ರವೀಣ್ ಆಮ್ರೆ, ನರೇಂದ್ರ ಹಿರ್ವಾನಿ, ವೆಂಕಟಪತಿ ರಾಜು, ವಿಕೆಟ್ ಕೀಪರ್ ನಯನ್ ಮೋಂಗಿಯಾ 1988ರಲ್ಲಿ ನಡೆದ ಚೊಚ್ಚಲ 19 ವಯೋಮಿತಿ ವಿಶ್ವಕಪ್​ನಲ್ಲಿ ಆಡಿದ್ದವರು.

ಭಾರತದ ಮಟ್ಟಿಗೆ ಕಿರಿಯರ ವಿಶ್ವಕಪ್ ಸಾಗಿ ಬಂದ ಹಾದಿಯನ್ನು ಗಮನಿಸುವಾಗ ಈ ಹಿಂದಿನ ತಂಡಗಳಿಗೂ ಈ ತಂಡಕ್ಕೂ ಮಹತ್ತರ ವ್ಯತ್ಯಾಸವನ್ನು ಕಾಣಬಹುದು. ಅದು ರಾಹುಲ್ ದ್ರಾವಿಡ್​ರ ತರಬೇತಿ. ಹಿಂದೆಲ್ಲ ಕಿರಿಯರ ವಿವಿಧ ಹಂತಗಳಲ್ಲಿ ಗಮನ ಸೆಳೆಯುವ ಆಟಗಾರರನ್ನು ವಿಶ್ವಕಪ್​ಗಳಿಗೆ ಕಳಿಸಲಾಗುತ್ತಿತ್ತು. ಅವರಿಗೆ ವಿಶೇಷ ತರಬೇತಿ ಶಿಬಿರಗಳು, ನಿರ್ದಿಷ್ಟ ತರಬೇತಿ ಅವಕಾಶಗಳು ಸೀಮಿತವಾಗಿರುತ್ತಿತ್ತು. ಆದರೆ, ಈಗ ಹಾಗಿಲ್ಲ.

ರಾಹುಲ್ ದ್ರಾವಿಡ್ ಅಂತಾರಾಷ್ಟ್ರೀಯ ಕ್ರಿಕೆಟ್​ನಿಂದ ನಿವೃತ್ತರಾಗಿ ತರಬೇತುದಾರರಾಗುವ ಅವಕಾಶ ದೊರೆತಾಗ ಆಯ್ಕೆ ಮಾಡಿಕೊಂಡಿದ್ದು ಕಿರಿಯರ ತಂಡವನ್ನು. ಅವರು ಬಯಸಿದ್ದರೆ ಯಾವತ್ತೋ ಟೀಮ್ ಇಂಡಿಯಾ ಕೋಚ್ ಆಗಬಹುದಿತ್ತು. ಆದರೆ, ಉದ್ದೇಶಪೂರ್ವಕವಾಗಿ ಅವರು ಕಿರಿಯರು ಹಾಗೂ ಭಾರತ ‘ಎ’ ತಂಡದ ತರಬೇತಿ ಅವಕಾಶವನ್ನು ಕೇಳಿ ಪಡೆದುಕೊಂಡರು. 2016ರ ಜೂ. ವಿಶ್ವಕಪ್ ಬಾಂಗ್ಲಾ ದೇಶದಲ್ಲಿ ನಡೆದಾಗ ದ್ರಾವಿಡ್ ಮಾರ್ಗದರ್ಶನದ ತಂಡ ಉತ್ತಮ ಪ್ರದರ್ಶನ ನೀಡಿ ಫೈನಲ್​ನಲ್ಲಿ ವೆಸ್ಟ್ ಇಂಡೀಸ್​ಗೆ ಶರಣಾಗಿತ್ತು. ಆದರೆ, ಈ ಬಾರಿಯ ತಂಡ ಪೂರ್ಣ ಪ್ರಮಾಣದಲ್ಲಿ ದ್ರಾವಿಡ್ ಕಟ್ಟಿ ಬೆಳೆಸಿದ ‘ಡ್ರೀಮ್ ಟೀಮ್ ಆಗಿತ್ತು. ಟೂರ್ನಿಗೆ ವರ್ಷ ಮೊದಲೇ ದ್ರಾವಿಡ್ 30 ಪ್ರತಿಭಾವಂತರನ್ನು ಆಯ್ಕೆ ಮಾಡಿ ನಿರ್ದಿಷ್ಟ ತರಬೇತಿ ನೀಡಿದ್ದರು. ಆ ಆಟಗಾರರಿಗೆ ದೇಶದಲ್ಲಿ ಹಾಗೂ ವಿದೇಶದಲ್ಲಿ ಹಲವು ದ್ವಿಪಕ್ಷೀಯ ಸರಣಿಗಳ ಮೂಲಕ ತರಬೇತಿ ಕೊಡಿಸಲಾಗಿತ್ತು. ಟೂರ್ನಿಗೆ ತಿಂಗಳಿರುವಾಗ ಬೆಂಗಳೂರಿನಲ್ಲಿ ನ್ಯೂಜಿಲೆಂಡ್ ಮಾದರಿಯ ಪಿಚ್​ಗಳನ್ನು ಸಿದ್ಧಪಡಿಸಿ ವಿಶೇಷ ತರಬೇತಿ ನೀಡಲಾಗಿತ್ತು. ಟೂರ್ನಿಗೆ ಹದಿನೈದು ದಿನ ಮೊದಲೇ ತಂಡವನ್ನು ನ್ಯೂಜಿಲೆಂಡ್​ಗೆ ಕರೆದುಕೊಂಡು ಹೋಗಿ ಅಲ್ಲಿನ ವಾತಾವರಣ, ಪಿಚ್​ಗಳಿಗೆ ಹೊಂದಿಕೊಳ್ಳುವ ಅವಕಾಶ ಕಲ್ಪಿಸಲಾಗಿತ್ತು.

ಇವೆಲ್ಲಕ್ಕಿಂತ ಮುಖ್ಯವಾಗಿ ದ್ರಾವಿಡ್ ತರಬೇತಿ ವಿಧಾನ ಸಹ ಆಟಗಾರರನ್ನು ‘ಗುಣಮಟ್ಟದ ಕ್ರಿಕೆಟಿಗ’ರನ್ನಾಗಿಸುವಲ್ಲಿ ಮಹತ್ವದ ಪಾತ್ರ ವಹಿಸಿತ್ತು. ಓರ್ವ ಆಟಗಾರನಾಗಿ ವೃತ್ತಿಜೀವನದಲ್ಲಿ ತಾವು ಅಳವಡಿಸಿಕೊಂಡಿದ್ದ ಎಲ್ಲ ಅನುಕರಣೀಯ ಗುಣವಿಶೇಷಗಳನ್ನು ಅವರು ಯುವ ಆಟಗಾರರಿಗೆ ಧಾರೆ ಎರೆದಿದ್ದರು. ಕ್ರಿಕೆಟಿಗರಿಗೆ ಅತಿಮುಖ್ಯವಾದ ಶಿಸ್ತು, ವೃತ್ತಿಪರತೆ, ಏಕಾಗ್ರತೆ, ಪ್ರತಿಕೂಲ ಸನ್ನಿವೇಶಗಳಲ್ಲೂ ಧೃತಿಗೆಡದೆ ಆಡುವ ರೀತಿ, ಪಂದ್ಯದ ಸನ್ನಿವೇಶಕ್ಕೆ ತಕ್ಕಂತೆ ಆಟದಲ್ಲಿ ಮಾರ್ಪಾಡು ಮಾಡಿಕೊಳ್ಳುವ ತಾಂತ್ರಿಕ ಜಾಣ್ಮೆ, ಎಲ್ಲಕ್ಕಿಂತ ಮುಖ್ಯವಾಗಿ ಯಾವುದೇ ಕಾರಣಕ್ಕೂ ಎದುರಾಳಿಗಳಿಗೆ ಮೇಲುಗೈ ಬಿಟ್ಟುಕೊಡಬಾರದೆಂಬ ಗಟ್ಟಿತನವನ್ನು ಅವರು ಹುಡುಗರ ಆಟದಲ್ಲಿ, ಮನಸ್ಸಿನಲ್ಲಿ ತುಂಬಿದ್ದರು.

ಪಾಕಿಸ್ತಾನ ವಿರುದ್ಧದ ಸೆಮಿಫೈನಲ್ ಟೂರ್ನಿಯ ಅತ್ಯುತ್ತಮ ಸೆಣಸಾಟದ ಪಂದ್ಯ ಆಗಬಹುದೆಂಬ ನಿರೀಕ್ಷೆ ಎಲ್ಲರಲ್ಲಿತ್ತು. ಆದರೆ, ಭಾರತೀಯರ ಬೌಲಿಂಗ್, ಬ್ಯಾಟಿಂಗ್ ಮುಂದೆ ಪಾಕಿಗಳು ದಂಗಾಗಿ ಹೋಗಿದ್ದರು. ‘ಆ ದಿನ ಅದೇನಾಯಿತೋ ಗೊತ್ತಿಲ್ಲ. ನಮ್ಮ ಆಟಗಾರರು ಮಂಕುಬೂದಿ ತಿಂದವರಂತೆ ಹೆಣಗಾಡಿದರು. ಭಾರತದ ಬೌಲರ್​ಗಳ ವಿರುದ್ಧ ಯಾವ ರೀತಿ ರನ್ ಗಳಿಸಬೇಕೆನ್ನುವುದೇ ನಮ್ಮವರಿಗೆ ಗೊತ್ತಾಗಲಿಲ್ಲ. ರಾಹುಲ್ ದ್ರಾವಿಡ್​ರಂಥ ಕೋಚ್​ಗಳಿಂದ ಮಾತ್ರ ಅಂಥ ತಂಡ ರೂಪಿಸುವುದು ಸಾಧ್ಯ’ ಎಂದು ಪಾಕಿಸ್ತಾನದ ಮ್ಯಾನೇಜರ್ ನದೀಂ ಖಾನ್ ಹೊಗಳಿದ್ದು ಅದೇ ಕಾರಣಕ್ಕೆ. ಟೂರ್ನಿಯಲ್ಲಿ ಪಾಕಿಸ್ತಾನ ಸೆಮಿಫೈನಲ್ ಹಂತದಲ್ಲಿ ನಿರ್ಗಮಿಸಿದರೂ, ತಂಡದ ಯುವ ವೇಗಿ ಶಹೀನ್ ಅಫ್ರಿದಿ ಗಮನ ಸೆಳೆದಿದ್ದರು. ಸೆಮಿಫೈನಲ್ ಪಂದ್ಯದ ಬಳಿಕ ದ್ರಾವಿಡ್ ಪಾಕ್ ಡ್ರೆಸ್ಸಿಂಗ್ ರೂಂಗೆ ತೆರಳಿ ಅಫ್ರಿದಿಯನ್ನು ಅಭಿನಂದಿಸಿದ್ದರು. ಪ್ರತಿಭೆ ಗುರುತಿಸುವ, ಮಾರ್ಗದರ್ಶನ ನೀಡುವ ದ್ರಾವಿಡ್​ರ ಇಂಥ ಗುಣ ಪ್ರಶಂಸಾರ್ಹ.

ಟೂರ್ನಿಯ ಬಳಿಕ ವಿಜೇತ ಭಾರತ ತಂಡದ ಐವರು ಸದಸ್ಯರು ಐಸಿಸಿಯ ವಿಶ್ವ ಇಲೆವೆನ್​ನಲ್ಲಿ ಸ್ಥಾನ ಪಡೆದರು. ಈ ಎಲ್ಲ ಆಟಗಾರರು ಮುಂದಿನ ದಿನಗಳಲ್ಲಿ ಭಾರತ ತಂಡದಲ್ಲೂ ಸ್ಥಾನ ಪಡೆಯುವಂತಾದರೆ ದ್ರಾವಿಡ್ ಯಾವ ದೂರದೃಷ್ಟಿಯಿಂದ ತರಬೇತಿ ನೀಡುತ್ತಿರುವರೋ ಆ ಉದ್ದೇಶ ಸಾರ್ಥಕವಾಗುತ್ತದೆ.

ಕಿರಿಯರ ಟೂರ್ನಿಯ ಇನ್ನೊಂದು ಪ್ರಸಂಗವೂ ಸ್ವಾರಸ್ಯಕರವಾಗಿದೆ. ಟೂರ್ನಿ ಅಂತಿಮ ಘಟ್ಟದಲ್ಲಿರುವಾಗ ಭಾರತದಲ್ಲಿ ಇಂಡಿಯನ್ ಪ್ರೀಮಿಯರ್ ಲೀಗ್​ಗಾಗಿ ಆಟಗಾರರ ಹರಾಜು ಪ್ರಕ್ರಿಯೆ ನಡೆಯುತ್ತಿತ್ತು. ಹಾಗಾಗಿ ಕಿರಿಯ ಆಟಗಾರರ ಗಮನವೆಲ್ಲ ಭಾರತದ ಕಡೆಗಿತ್ತು. ಆದರೆ, ಕಾಲಮಾನದ ವ್ಯತ್ಯಾಸದಿಂದಾಗಿ ಆಟಗಾರರು ನಿದ್ರೆಗೆಟ್ಟು ರಾತ್ರಿಯೆಲ್ಲ ಐಪಿಎಲ್ ಹರಾಜಿನ ಲೈವ್ ವೆಬ್​ಕ್ಯಾಸ್ಟ್ ವೀಕ್ಷಿಸುತ್ತಿದ್ದ ಕಾರಣ ದ್ರಾವಿಡ್ ಚಿಂತಿತರಾಗಿದ್ದರು. ‘ಐಪಿಎಲ್ ಹರಾಜು ಮುಂದಿನ ವರ್ಷವೂ ಇರುತ್ತದೆ. ಆದರೆ, ಕಿರಿಯರ ವಿಶ್ವಕಪ್ ಫೈನಲ್ ಪಂದ್ಯ ನಿಮ್ಮ ಜೀವನದಲ್ಲಿ ಮತ್ತೊಮ್ಮೆ ಸಿಗುವುದಿಲ್ಲ’ ಎಂಬ ದ್ರಾವಿಡ್​ರ ಒಂದು ಮಾತು ಆಟಗಾರರನ್ನು ಎಚ್ಚರಿಸಿತ್ತು. ಮುಂದಿನದ್ದೆಲ್ಲವೂ ಇತಿಹಾಸ.

ಅಂದ ಹಾಗೆ ವಿಶ್ವಕಪ್ ವಿಜೇತ ಭಾರತ ತಂಡದ ನಾಯಕ ಪೃಥ್ವಿ ಶಾ ಐಪಿಎಲ್​ನಲ್ಲಿ ಡೆಲ್ಲಿ ಡೇರ್​ಡೆವಿಲ್ಸ್ ತಂಡಕ್ಕೆ 1.2 ಕೋಟಿ ರೂ. ಮೌಲ್ಯಕ್ಕೆ ಆಯ್ಕೆಯಾಗಿದ್ದಾರೆ. ಈ ಪೃಥ್ವಿ ಶಾ 2013ರಲ್ಲಿ ಮುಂಬೈನ ಶಾಲಾ ಕ್ರಿಕೆಟ್ ಪಂದ್ಯದಲ್ಲಿ 546 ರನ್ ಬಾರಿಸಿ ದಾಖಲೆ ಮಾಡಿದ್ದ ಅಸಾಧಾರಣ ಪ್ರತಿಭೆ (ಇವರ ದಾಖಲೆಯನ್ನು 2016ರಲ್ಲಿ ಪ್ರಣವ್ ಧನವಾಡೆ ಅಜೇಯ 1009 ರನ್ ಬಾರಿಸುವ ಮೂಲಕ ಮುರಿದರು). ಇಂಥ ಅನೇಕ ಕಿರಿಯರಿಗೆ ಮುಂದಿನ ದಿನಗಳಲ್ಲಿ ಭರಪೂರ ಅವಕಾಶಗಳಂತೂ ಸಿಗಲಿವೆ. ಆದರೆ, ಸಾಫಲ್ಯ ಮಾತ್ರ ದ್ರಾವಿಡ್ ಗುರು ಕಲಿಸಿದ ಪಾಠವನ್ನು ಎಷ್ಟರ ಮಟ್ಟಿಗೆ ಅನುಸರಿಸುತ್ತಾರೆ ಎನ್ನುವುದನ್ನು ಅವಲಂಬಿಸಿರುತ್ತದೆ.

(ಲೇಖಕರು ‘ವಿಜಯವಾಣಿ’ ಡೆಪ್ಯೂಟಿ ಎಡಿಟರ್)

Leave a Reply

Your email address will not be published. Required fields are marked *

Back To Top