ಮುಂಬೈ: ಕಳೆದ ವರ್ಷ ಬಿಡುಗಡೆಯಾದ ‘ಸಿಂಬ’ ನಂತರ ನಟ ರಣವೀರ್ ಸಿಂಗ್ ಮತ್ತು ನಿರ್ದೇಶಕ ರೋಹಿತ್ ಶೆಟ್ಟಿ ಇನ್ನೊಂದು ಹೊಸ ಚಿತ್ರದಲ್ಲಿ ಮತ್ತೆ ಜತೆಯಾಗಿ ಕೆಲಸ ಮಾಡುತ್ತಾರೆ ಎಂಬ ಸುದ್ದಿ ಕೇಳಿ ಬಂದಿತ್ತು. ಈ ಬಾರಿ ಆಕ್ಷನ್ ಅಲ್ಲ, ಪಕ್ಕಾ ಕಾಮಿಡಿ ಎಂದು ಹೇಳಲಾಗಿತ್ತು.
ಇದನ್ನೂ ಓದಿ: ಲಾಕ್ಡೌನ್ ನಂತರ ಗರಿಗೆದರಿದ ಬಾಲಿವುಡ್ …
ಈಗ ಆ ಚಿತ್ರದಿಂದ ಎರಡು ಅಪ್ಡೇಟ್ಗಳು ಬಂದಿವೆ. ಪ್ರಮುಖವಾಗಿ, ಅದು ಸಂಜೀವ್ ಕುಮಾರ್ ಅಭಿನಯದ ‘ಅಂಗೂರ್’ ಚಿತ್ರದ ರೀಮೇಕ್ ಆಗಿದ್ದು, ಈ ಚಿತ್ರದಲ್ಲಿ ರಣವೀರ್ ಸಿಂಗ್ಗೆ ನಾಯಕಿಯರಾಗಿ ಜಾಕ್ವೆಲೀನ್ ಫರ್ನಾಂಡಿಸ್ ಮತ್ತು ಪೂಜಾ ಹೆಗ್ಡೆ ಇಬ್ಬರೂ ನಟಿಸುತ್ತಿದ್ದಾರೆ.
‘ಅಂಗೂರ್’ ಬಾಲಿವುಡ್ನ ಕ್ಲಾಸಿಕ್ ಚಿತ್ರ. ಶೇಕ್ಸ್ಪಿಯರ್ನ ‘ಕಾಮಿಡಿ ಆಫ್ ಎರರ್ಸ್’ ನಾಟಕವನ್ನು ಆಧರಿಸಿ ಗುಲ್ಜಾರ್ ನಿರ್ದೇಶನ ಮಾಡಿದ್ದರು. ಇನ್ನು ಸಂಜೀವ್ ಕುಮಾರ್ ಮತ್ತು ದೇವನ್ ವರ್ಮಾ ಈ ಚಿತ್ರದಲ್ಲಿ ದ್ವಿಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದರು. ಆ ನಂತರ ಅದೇ ನಾಟಕವನ್ನಾಧರಿಸಿ, ಕನ್ನಡದಲ್ಲಿ ರಮೇಶ್ ಅರವಿಂದ್ ಅಭಿನಯದಲ್ಲಿ ‘ಉಲ್ಟಾ ಪಲ್ಟಾ’ ಚಿತ್ರ ನಿರ್ಮಾಣವಾಗಿತ್ತು. ಈಗ ಅದೇ ‘ಅಂಗೂರ್’ ಚಿತ್ರವು ಬಾಲಿವುಡ್ನಲ್ಲಿ ಇನ್ನೊಮ್ಮೆ ರೀಮೇಕ್ ಆಗುವುದಕ್ಕೆ ಸಜ್ಜಾಗಿದೆ.
ಇದನ್ನೂ ಓದಿ: ಇನ್ನೂ ಹಾಸಿಗೆ ಹಿಡಿದಿಲ್ಲ; ಏನೇನೋ ಬರೀಬೇಡಿ: ಸಂಜಯ್ ದತ್
ರೋಹಿತ್ ಶೆಟ್ಟಿ ಇತ್ತೀಚಿನ ದಿನಗಳಲ್ಲಿ ಬ್ಯಾಕ್ ಟು ಬ್ಯಾಕ್ ಆಕ್ಷನ್ ಚಿತ್ರಗಳನ್ನು ನಿರ್ದೇಶನ ಮಾಡಿದ್ದರು. ‘ಸಿಂಬಾ’, ‘ಸೂರ್ಯವಂಶಿ’ ನಂತರ ಮುಂದೇನು ಎಂದು ಅವರು ಯೋಚಿಸುತ್ತಿದ್ದಾಗ, ‘ಅಂಗೂರ್’ ಚಿತ್ರವನ್ನು ರೀಮೇಕ್ ಮಾಡುವ ಯೋಚನೆ ಹೊಳೆಯಿತಂತೆ. ಸದ್ಯಕ್ಕೆ ಕೆಲಸಗಳು ಪ್ರಾರಂಭವಾಗಿದ್ದು, ಮುಂದಿನ ವರ್ಷ ಚಿತ್ರ ಸೆಟ್ಟೇರುವ ಸಾಧ್ಯತೆ ಇದೆ.