Friday, 21st September 2018  

Vijayavani

ಸಿಎಂ ‘ದಂಗೆ’ ಹೇಳಿಕೆ ವಿರುದ್ಧ ಕೇಸರಿ ಗುಟುರು - ಡಿಜಿಪಿ ನೀಲಮಣಿ ರಾಜುಗೆ ಬಿಜೆಪಿ ದೂರು - ಸಂಜೆ 4.30ಕ್ಕೆ ಗವರ್ನರ್ ಭೇಟಿ​​​​        ರಾಜ್ಯಾದ್ಯಂತ ಭುಗಿಲೆದ್ದ ‘ದಂಗೆ’ ಉರಿ - ಕಲಬುರಗಿ, ಮಂಡ್ಯ, ಧಾರವಾಡ, ಕೊಡಗಿನಲ್ಲಿ ದಳ್ಳುರಿ        ಬ್ರದರ್ಸ್​​ ತಂಟೆಗೆ ಹೋಗ್ಬೇಡಿ, ವಿವಾದಾತ್ಮಕ ಹೇಳಿಕೆ ಕೊಡ್ಬೇಡಿ - ಸಾಫ್ಟ್​ ಪಾಲಿಟಿಕ್ಸ್ ಬಗ್ಗೆ ಡಿಕೆಶಿಗೆ ಸಿದ್ದು ಕ್ಲಾಸ್        ಕರ್ನಾಟಕದಲ್ಲಿ ನಮಗೆ ಅಧಿಕಾರ ಬೇಕು - ಇಲ್ದಿದ್ರೆ ಲೋಕಸಭೆ ಚುನಾವಣೆಯಲ್ಲಿ ಕಷ್ಟ ಕಷ್ಟ - ಪರಿಸ್ಥಿತಿ ನಿಭಾಯಿಸಲು ಸಿದ್ದುಗೆ ಸೂಚನೆ        ಜಮ್ಮು-ಕಾಶ್ಮೀರದಲ್ಲಿ ಉಗ್ರರ ಅಟ್ಟಹಾಸ - ಅಪಹರಿಸಿದ್ದ ಮೂವರು ಪೊಲೀಸರ ಹತ್ಯೆಗೈದ ಕಿರಾತಕರು        ಓಡಿಶಾದಲ್ಲಿ ಡೆಯ್ ಚಂಡಮಾರುತದ ಅಬ್ಬರ - ಕಾಲಾಪುರಕ್ಕೆ ನುಗ್ಗಿದ ಡ್ಯಾಮ್ ನೀರು ನುಗ್ಗಿ ಪ್ರವಾಹ - ಬಿರುಗಾಳಿಗೆ ಜನರು ಕಂಗಾಲ್       
Breaking News

ದೋಸ್ತಿಗೆ ಅಗ್ನಿಪರೀಕ್ಷೆ

Thursday, 13.09.2018, 2:08 AM       No Comments

ಬೆಂಗಳೂರು: ಮೈತ್ರಿ ಸರ್ಕಾರದ ಬುಡ ಅಲುಗಾಡಿಸುವ ಮಟ್ಟಿಗೆ ರ್ಚವಿತಚರ್ವಣ ಸುದ್ದಿ-ಗದ್ದಲಗಳಿಗೆ ಕಾರಣವಾಗಿರುವ ಅತೃಪ್ತ ಶಾಸಕರ ‘ಬಂಡಾಯ’ ಶಮನ ಕಸರತ್ತಿನಲ್ಲಿರುವ ಸಮ್ಮಿಶ್ರ ಸರ್ಕಾರಕ್ಕೆ ವಿಧಾನಸಭೆಯಿಂದ ವಿಧಾನಪರಿಷತ್​ನ ಮೂರು ಸ್ಥಾನಗಳಿಗೆ ಎದುರಾಗಿರುವ ಉಪಚುನಾವಣೆ ಮತ್ತೊಂದು ಅಗ್ನಿಪರೀಕ್ಷೆ ತಂದೊಡ್ಡಿದೆ.

ದೋಸ್ತಿ ಪಕ್ಷಗಳ ಕನಿಷ್ಠ 18 ಶಾಸಕರು ರಾಜೀನಾಮೆ ಕೊಡಲಿದ್ದು, ಆ ನಂತರ ಬಿಜೆಪಿ ಸರ್ಕಾರ ರಚಿಸಲಿದೆ ಎಂಬ ಊಹಾಪೋಹಗಳು ಒಂದೆಡೆ ಬಲವಾಗುತ್ತಿದ್ದರೆ, ಮೇಲ್ಮನೆ ಉಪಚುನಾವಣೆಯ ಎಲ್ಲ ಮೂರು ಸ್ಥಾನ ಬಾಚಿಕೊಂಡು ಮೈತ್ರಿ ಪಕ್ಷಗಳ ಶಾಸಕರು ಅಚಲವಾಗಿದ್ದಾರೆ ಎಂಬುದನ್ನು ಸಾಬೀತು ಪಡಿಸುವ ಸವಾಲು ಸರ್ಕಾರದ ಮುಂದಿದೆ.

ಬಹುತೇಕ ನಾಲ್ಕು ವರ್ಷಗಳ ಅವಕಾಶ ಇರುವ 1 ಸ್ಥಾನ ಜೆಡಿಎಸ್​ಗೆ, ಎರಡು ವರ್ಷದ ಕಾಲಾವಕಾಶ ಇರುವ 2 ಸ್ಥಾನ ಕಾಂಗ್ರೆಸ್​ಗೆ ದೊರೆಯುವ ಸಾಧ್ಯತೆಗಳಿರುವುದಾಗಿ ಉಭಯ ಪಕ್ಷಗಳ ಉನ್ನತ ಮೂಲಗಳು ಖಚಿತಪಡಿಸಿವೆ.

ಅಧಿಸೂಚನೆ ಅಸ್ತ್ರ: ಆಯೋಗ ಹೊರಡಿಸಿರುವ ಪ್ರತ್ಯೇಕ ಅಧಿಸೂಚನೆಗಳು ದೋಸ್ತಿ ಪಕ್ಷಗಳಿಗೆ ವರವಾಗಿ ಪರಿಣಮಿಸಿದೆ. ಡಿಸಿಎಂ ಜಿ.ಪರಮೇಶ್ವರ್, ಬಿಜೆಪಿಯ ಕೆ.ಎಸ್. ಈಶ್ವರಪ್ಪ ಅಧಿಕಾರ ಅವಧಿ 2020ರ ಜೂ. 30ರ ತನಕ ಇತ್ತು. ಬಿಜೆಪಿಯ ವಿ.ಸೋಮಣ್ಣ ಅವಧಿ 2022ರ ಜೂ. 14ರವರೆಗಿತ್ತು. ಪರಮೇಶ್ವರ್ ಹಾಗೂ ಈಶ್ವರಪ್ಪ ಸ್ಥಾನಗಳಿಗೆ ಒಂದೇ ಅಧಿಸೂಚನೆಯಲ್ಲಿ ಚುನಾವಣೆ ನಡೆದಿತ್ತು. ಇದರ ಪ್ರಕಾರ ಈಗಲೂ ಒಂದೇ ಅಧಿಸೂಚನೆ ಹೊರಬೀಳಬೇಕಿತ್ತು. ಸೋಮಣ್ಣರಿಂದ ಖಾಲಿಯಾದ ಸ್ಥಾನಕ್ಕೆ ಪ್ರತ್ಯೇಕ ಅಧಿಸೂಚನೆ ಹೊರಬಿದ್ದಿದ್ದರೆ ಅದಕ್ಕೆ ಪ್ರತ್ಯೇಕ ಮತಪತ್ರ ಇರಬೇಕಿತ್ತು. ಎರಡು ಅಧಿಸೂಚನೆ ಹೊರಬಿದ್ದಿದ್ದರೆ ಸಂಖ್ಯಾಬಲದ ಆಧಾರದಲ್ಲಿ ಮೂರು ಪಕ್ಷಗಳಿಗೂ ತಲಾ 1 ಸ್ಥಾನ ಸಿಗುತ್ತಿತ್ತು. ಪ್ರತ್ಯೇಕತೆಯಿಂದ ಬಿಜೆಪಿಗೆ ಸಂಖ್ಯಾ ಬಲದ ಕೊರತೆ ಇದೆ. ಆದ್ದರಿಂದ ಆಡಳಿತ ಪಕ್ಷಗಳಿಗೆ 2 ಸ್ಥಾನ ಪಡೆಯುವ ಅವಕಾಶ ಹೆಚ್ಚಿದೆ. ಎರಡೂ ಪಕ್ಷಗಳು ಮೂರು ಸ್ಥಾನ ಪಡೆದಲ್ಲಿ ಸರ್ಕಾರಕ್ಕೆ ಯಾವುದೇ ಗಂಡಾಂತರ ಇಲ್ಲ ಎಂಬುದು ಸಾಬೀತಾದಂತಾಗುತ್ತದೆ. ಒಂದು ವೇಳೆ 3ರಲ್ಲಿ ಒಂದು ಸ್ಥಾನ ಕಳೆದುಕೊಂಡರೂ ಅದು ಸರ್ಕಾರದ ಪಾಲಿಗೆ ಸಂಕಷ್ಟದ ದಿನ ಆರಂಭವಾದಂತೆಯೇ ಎಂದು ಹೇಳಲಾಗುತ್ತಿದೆ.

ಆಂಗ್ಲೋ ಇಂಡಿಯನ್ ನೇಮಕ: ವಿಧಾನಸಭೆಗೆ ನೇಮಕವಾಗುವ ಆಂಗ್ಲೋ ಇಂಡಿಯನ್ ಸದಸ್ಯರಿಗೆ ರಾಜ್ಯಸಭೆಯಲ್ಲಿ ಇಲ್ಲದಿದ್ದರೂ ವಿಧಾನಪರಿಷತ್ ಚುನಾವಣೆಯಲ್ಲಿ ಮತದಾನದ ಹಕ್ಕಿದೆ. ಆದ್ದರಿಂದಲೇ ಅ.3ಕ್ಕೆ ಮುನ್ನವೇ ನಾಮ ನಿರ್ದೇಶನ ಮಾಡುವ ಮೂಲಕ ಸಂಖ್ಯಾಬಲ ಹೆಚ್ಚಿಸಿಕೊಳ್ಳಲು ದೋಸ್ತಿ ಪಕ್ಷಗಳು ಚಿಂತಿಸಿವೆ. ಆಂಗ್ಲೋ ಇಂಡಿಯನ್ ಅವಕಾಶವನ್ನು ಕಾಂಗ್ರೆಸ್​ಗೆ ಬಿಟ್ಟುಕೊಡುವ ಬಗ್ಗೆ ನಿರ್ಧಾರವಾಗಿದೆ.

ಆಯೋಗಕ್ಕೆ ಮನವಿ: ಮೂರು ಪ್ರತ್ಯೇಕ ಅಧಿಸೂಚನೆ ಹೊರಬಿದ್ದಿರುವುದರಿಂದ ಬಿಜೆಪಿ ಆಯೋಗಕ್ಕೆ ದೂರು ಸಲ್ಲಿಸಲು ನಿರ್ಧರಿಸಿದೆ. ಪರಮೇಶ್ವರ್ ಹಾಗೂ ಈಶ್ವರಪ್ಪ ಅವರಿಂದ ಖಾಲಿಯಾದ ಸ್ಥಾನಗಳಿಗೆ ಒಂದೇ ಅಧಿಸೂಚನೆ ಹೊರಡಿಸುವಂತೆ ಕೋರಲಿದೆ.

 

ಬಿಜೆಪಿ ಲೆಕ್ಕಾಚಾರ ಏನು?

ಬಿಜೆಪಿ ಪರಿಷತ್ ಚುನಾವಣೆ ಗೆಲ್ಲಲು ಆಪರೇಷನ್​ಗೆ ಕೈಹಾಕಲಿದೆ ಎಂಬುದು ದೋಸ್ತಿಗಳ ಆತಂಕಕ್ಕೆ ಕಾರಣ. ದೋಸ್ತಿ ಪಕ್ಷಗಳ 10 ಜನರನ್ನು ಸೆಳೆದುಕೊಂಡಲ್ಲಿ ಮೂರು ಸ್ಥಾನಗಳನ್ನೂ ಗೆಲ್ಲಬಹುದೆಂಬುದು ಬಿಜೆಪಿ ಲೆಕ್ಕಾಚಾರ. ರಾಷ್ಟ್ರೀಯ ಪಕ್ಷವಾಗಿ ಈ ಅವಕಾಶ ಬಳಸಿಕೊಂಡರೂ ಅಚ್ಚರಿ ಇಲ್ಲ ಎಂಬುದು ರಾಜಕೀಯ ವಾದ.

ಅಗ್ನಿಪರೀಕ್ಷೆ ಹೇಗೆ?

ಪ್ರತೀ ಸ್ಥಾನ ಗೆಲ್ಲಲು 112 ಸದಸ್ಯರ ಅಗತ್ಯವಿದೆ. ಬಿಜೆಪಿ ಬಳಿ ಸದ್ಯ 104 ಸದಸ್ಯರಿದ್ದು, 8 ಮತಗಳ ಕೊರತೆ ಇದೆ. ದೋಸ್ತಿಗಳ ಬಳಿ ಸ್ಪೀಕರ್ ಸೇರಿ 118 ಜನರಿದ್ದಾರೆ. ಈ ಸಂಖ್ಯೆಗಳಲ್ಲಿ ವ್ಯತ್ಯಾಸವಾಗದಂತೆ ಕಾಯ್ದುಕೊಳ್ಳುವುದು ಎರಡೂ ಪಕ್ಷಗಳಿಗೀಗ ಸವಾಲಿನ ಕೆಲಸ.

 

ಅತೃಪ್ತರಿಗೆ ಅವಕಾಶ

ಸರ್ಕಾರದ ಎರಡು ಅಂಗಪಕ್ಷಗಳಲ್ಲೂ ನಾಯಕತ್ವದ ವಿರುದ್ಧ ಮುನಿಸಿರುವ ಶಾಸಕರಿದ್ದಾರೆ. ಮುಖ್ಯಮಂತ್ರಿ ಕುಮಾರಸ್ವಾಮಿ ತಮಗ್ಯಾರಿಗೂ ಸಮಯ ನೀಡುತ್ತಿಲ್ಲ ಎಂಬುದು ಇವರೆಲ್ಲರ ಪ್ರಮುಖ ಆರೋಪ. ಹೀಗಾಗಿಯೇ ಪರಿಷತ್ ಚುನಾವಣೆ ಅವಕಾಶ ಬಳಸಿಕೊಂಡು ರಾಜಕೀಯ ಬೇಳೆ ಬೇಯಿಸಿಕೊಳ್ಳಬೇಕೆಂಬ ದೊಡ್ಡ ಪಡೆಯೇ ಅವಕಾಶಕ್ಕಾಗಿ ಎದುರು ನೋಡುತ್ತಿದೆ. ಇದಕ್ಕಾಗಿಯೇ ಕೆಲವರು ತಮಗೆ ಬಿಜೆಪಿಯಿಂದ ಆಹ್ವಾನವಿದೆ ಎಂಬರ್ಥದ ಸಂದೇಶಗಳನ್ನು ವರಿಷ್ಠರಿಗೆ ಕಳುಹಿಸುತ್ತಿದ್ದಾರೆ.

ಚುನಾವಣಾ ಆಯೋಗ ಹೊರಡಿಸಿದ ಅಧಿಸೂಚನೆಯಲ್ಲಿ ತಾಂತ್ರಿಕ ಲೋಪವಿದೆ. ಬಿಜೆಪಿ ರಾಜ್ಯ ಘಟಕದಿಂದ ಚುನಾವಣಾ ಆಯೋಗಕ್ಕೆ ವಿವರಸಹಿತ ದೂರು ಸಲ್ಲಿಸಲಾಗುವುದು.

| ಡಿ.ಎಚ್.ಶಂಕರಮೂರ್ತಿ, ವಿಧಾನ ಪರಿಷತ್ ಮಾಜಿ ಸಭಾಪತಿ

Leave a Reply

Your email address will not be published. Required fields are marked *

Back To Top