ಈ ಹಿಂದೆ ಪ್ರತಿಯೊಂದು ಸರ್ಕಾರಿ ಹುದ್ದೆಯ ನೇಮಕಾತಿ ವೇಳೆ ಮೌಖಿಕ ಪರೀಕ್ಷೆ ಕಡ್ಡಾಯವಾಗಿತ್ತು. ಅದರಿಂದಾಗಿ ಲಿಖಿತ ಪರೀಕ್ಷೆಯಲ್ಲಿ ಶೇಕಡ 70 ಅಂಕಗಳಿಸಿದರೂ ಇಂಟರ್ವ್ಯೂನಲ್ಲಿ ಫೇಲ್ ಆಗುತ್ತಿದ್ದರು. ಅವರೆಲ್ಲ ಇಡೀ ವರುಷ ಓದಿ ಪರೀಕ್ಷೆಯಲ್ಲಿ ಹೆಚ್ಚಿನ ಅಂಕ ಗಳಿಸಿದವರು. ಆದರೆ ಇಂಟರ್ವ್ಯೂನಲ್ಲಿ ಹಣ ಅಥವಾ ದೊಡ್ಡ ವ್ಯಕ್ತಿಗಳ ಪ್ರಭಾವದ ಹೊರತು ಅಭ್ಯರ್ಥಿಗಳ ನಿಯುಕ್ತಿಯಾಗುತ್ತಿರಲಿಲ್ಲ. ಸಾಮಾನ್ಯ ಪ್ರತಿಭಾವಂತರನ್ನು ಕಡೆಗಣಿಸುತ್ತಿದ್ದರು. ಒಂದು ವೇಳೆ ಅಂತಹ ಪ್ರತಿಭಾವಂತರು ಕೆಪಿಎಸ್ಸಿ ಪರೀಕ್ಷೆಯನ್ನು ಎದುರಿಸಿದರೆ ಕ್ಲಾಸ್-1, ಕ್ಲಾಸ್-2 ಹುದ್ದೆಗಳ ನೇಮಕದಲ್ಲಿ ಬಾರಾ ಭಾನಗಡಿ ನಡೆಯುತ್ತಲೇ ಇತ್ತು. ನಾನು ಕೂಡ 1976ರಿಂದ 1985ರವರೆಗೆ ನಾಲ್ಕು ಬಾರಿ ಹೆಚ್ಚಿನ ಅಂಕಗಳಿಸಿ ವರ್ಗ-1 ಮತ್ತು ವರ್ಗ-2 ಪರೀಕ್ಷೆಯಲ್ಲಿ ತೇರ್ಗಡೆಯಾಗಿದ್ದೆ.
ಆದರೆ ನನಗೆ ಹಣ ಅಥವಾ ಪ್ರಭಾವ ಬಳಸುವ ಸಾಮರ್ಥ್ಯ ವಿಲ್ಲದ್ದರಿಂದ ವರ್ಗ-1 ಅಥವಾ 2ರಲ್ಲಿರುವ ಎ.ಸಿ ಅಥವಾ ಡಿವೈಎಸ್ಪಿ ಹೋಗಲಿ ತಹಶೀಲ್ದಾರ್ ಹುದ್ದೆ ಕೂಡ ಸಿಗಲಿಲ್ಲ. ನನಗೆ ಸಿಕ್ಕ ಹುದ್ದೆ ಸರ್ಕಾರಿ ಪ್ರೌಢಶಾಲೆಯ ಹೆಡ್ವಾಸ್ಟರ್. ಆ ಪೋಸ್ಟಿಂಗ್ ಕೂಡ ಬೀದರ್ಗೆ. ಆವಾಗಲೇ ಪ್ರತಿಷ್ಠಿತ ಕಾಲೇಜ್ನಲ್ಲಿ ಉಪನ್ಯಾಸಕ ಹುದ್ದೆ ದೊರೆತು ಕಾಯಂ ಆಗಿದ್ದರಿಂದ ನಾನು ಅಲ್ಲಿಗೆ ಹೋಗಲಿಲ್ಲ. ಮೌಖಿಕ ಪರಿಕ್ಷೆಯ ರದ್ದತಿಯಿಂದ ಕೆಪಿಎಸ್ಸಿ ಕರ್ಮಕಾಂಡಕ್ಕೆ ಬ್ರೇಕ್ ಬಿದ್ದಿದೆ.
ಈ ಪದ್ಧತಿ ಯಾವಾಗಲೋ ಬರಬೇಕಿತ್ತು. ಈಗಾದರೂ ಬಂದಿದೆ ಎಂಬುದು ಸಮಾಧಾನಕರ. ಈ ಹಿಂದೆ ‘ಸಿ’ ದರ್ಜೆ ಹುದ್ದೆಗಳಿಗೆ ಮಾತ್ರ ಸೀಮಿತವಾಗಿದ್ದ ಈ ‘ನೋ ಇಂಟರ್ವ್ಯೂ’ ಪದ್ಧತಿ ಕ್ಲಾಸ್ -1, ಕ್ಲಾಸ್-2 ಮತ್ತು ಇಂಜಿನಿಯರ್, ವೈದ್ಯರ ಆಯ್ಕೆಗೂ ಅನ್ವಯಿಸಿರುವುದು ಸ್ವಾಗತಾರ್ಹ. ಇದರಿಂದಾಗಿ ಭ್ರಷ್ಟಾಚ್ಚಾರ ಇನ್ನಷ್ಟು ಕಡಿಮೆಯಾಗಲಿದೆ. ಸರ್ಕಾರಿ ಆಡಳಿತದ ಭಾರ ಪ್ರತಿಭಾನ್ವಿತ, ಪ್ರಾಮಾಣಿಕ, ಕರ್ತವ್ಯಪ್ರಜ್ಞೆಯುಳ್ಳ ಜನರ ಕೈಗೆ ಹೋಗುವುದರಿಂದ ಅನವಶ್ಯಕ ವಿಳಂಬ, ಕಾಲಹರಣ ತಪ್ಪಲಿದೆ.
| ಡಾ. ಎಸ್.ಡಿ. ನಾಯ್ಕ ಕಾರವಾರ