Sunday, 19th August 2018  

Vijayavani

ರಣಚಂಡಿ ಮಳೆಗೆ ಕುಸಿಯುತ್ತಿದೆ ಕೊಡಗು - ಮತ್ತೆ ಜೋರಾಯ್ತು ಮಳೆ ಅಬ್ಬರ - ಮುಕ್ಕೋಡ್ಲು ಗ್ರಾಮದಲ್ಲಿ 80 ಜನರ ರಕ್ಷಣೆ        ಕ್ಷಣ ಕ್ಷಣಕ್ಕೂ ಆತಂಕ, ಬಿರುಕು ಬಿಟ್ಟ ಧರೆ - ಪ್ರವಾಹದಲ್ಲಿ ಕೊಚ್ಚಿ ಹೋಗ್ತಿದೆ ಬೆಟ್ಟ,ಗುಡ್ಡ - ಕಣ್ಮುಂದೆಯೇ ನೆಲಸಮ ವಾಗ್ತಿದೆ ಬದುಕು        ಕೊಡಗಲ್ಲಿ ಇಂದು ಸಿಎಂ ಎಚ್​ಡಿಕೆ ಪ್ರವಾಸ - ಸಂತ್ರಸ್ಥರ ನೋವು ಆಲಿಸಲಿರುವ ಬಿಎಸ್​ವೈ - ನಿರಾಶ್ರಿತರಿಗೆ ನೆರವು ಅಂದ್ರು ರೇವಣ್ಣ        ಸಂತ್ರಸ್ಥರಿಗೆ ಸ್ಯಾಂಡಲ್​ವುಡ್​​​​​​​​​ ನೆರವಿನ ಹಸ್ತ - ಅಗತ್ಯವಸ್ತುಗಳ ಪೂರೈಸಿದ ಸ್ಟಾರ್ಸ್​​​​​​​​​​​ - ಕೈಲಾದ ಸಹಾಯ ಮಾಡ್ತಿದ್ದಾರೆ ಕರುನಾಡ ಜನರು        ಕೇರಳದಲ್ಲಿ ಕಡಿಮೆಯಾಗ್ತಿಲ್ಲ ನೆರೆ ಅಬ್ಬರ - ಸಾವಿನ ಸಂಖ್ಯೆ 357ಕ್ಕೇ ಏರಿಕೆ - ದೇವರನಾಡಿಗೆ ಹರಿದು ಬರ್ತಿದೆ ನೆರವಿನ ಮಹಾಪೂರ        ಭಾರತ - ಇಂಗ್ಲೆಂಡ್​ ನಡುವಿನ 3ನೇ ಟೆಸ್ಟ್​​​​ ಪಂದ್ಯ - ಬೃಹತ್ ಮೊತ್ತದತ್ತ ಟೀಂ ಇಂಡಿಯಾ - ಶತಕದ ಗಡಿಯಲ್ಲಿ ಎಡವಿದ ಕೊಹ್ಲಿ       
Breaking News

ಆರೋಗ್ಯ ವಿಮೆ ಅನುಷ್ಠಾನವಾಗಲಿ

Thursday, 18.01.2018, 3:03 AM       No Comments

ಬೆಲೆಯೇರಿಕೆಯ ಭಾರದಲ್ಲಿ ಸಂಸಾರವನ್ನು ತೂಗಿಸಿಕೊಂಡು ಹೋಗುವುದು ಕಸರತ್ತಿನ ಸಂಗತಿಯೇ. ನಗರಪ್ರದೇಶಗಳಲ್ಲಂತೂ ದಿನಸಿ, ಬಾಡಿಗೆ, ಶಿಕ್ಷಣದ ಖರ್ಚು ಭರಿಸುವುದರಲ್ಲಿಯೇ ಸಾಕುಸಾಕಾಗಿ ಹೋಗುತ್ತದೆ. ಹೀಗಿರುವಾಗ ಆರೋಗ್ಯ ಸಮಸ್ಯೆ ಏನಾದರೂ ಉದ್ಭವಿಸಿ ವೈದ್ಯಕೀಯ ವೆಚ್ಚಗಳು ಬಂದೆರಗಿದರೆ ಆ ಕುಟುಂಬದ ಆರ್ಥಿಕ ಸ್ಥಿತಿಯೇ ಅಯೋಮಯವಾಗಿ ಬಿಡುತ್ತದೆ. ವೈದ್ಯಕೀಯ ಖರ್ಚುಗಳನ್ನು ಭರಿಸಲಾಗದೆ ಅದೆಷ್ಟೋ ಕುಟುಂಬಗಳು ಆರ್ಥಿಕವಾಗಿ ತೀವ್ರ ಸಂಕಷ್ಟಕ್ಕೆ ಸಿಲುಕಿದ ನಿದರ್ಶನಗಳೂ ಹೇರಳ.

ಈ ನಿಟ್ಟಿನಲ್ಲಿ ಕೇಂದ್ರ ಮತ್ತು ಕರ್ನಾಟಕ ರಾಜ್ಯ ಸರ್ಕಾರಗಳು ಜನರಿಗೆ ನಿರಾಳ ಒದಗಿಸುವಂಥ ಹೆಜ್ಜೆ ಇಟ್ಟಿದ್ದು, ಆರೋಗ್ಯ ವಿಮೆ ಯೋಜನೆ ಜಾರಿಗೆ ಮುಂದಾಗಿವೆ ಎಂಬುದು ಸಮಾಧಾನದ ಸಂಗತಿ. ದೇಶದ ಎಲ್ಲ ಜನತೆಗೂ ಮೂರು ಯೋಜನೆಗಳ ಅಡಿಯಲ್ಲಿ ಆರೋಗ್ಯ ವಿಮೆ ಒದಗಿಸಲು ಮುಂದಾಗಿರುವ ಕೇಂದ್ರ ಸರ್ಕಾರ, ಈ ಬಾರಿಯ ಬಜೆಟ್​ನಲ್ಲಿ ಅದನ್ನು ಘೋಷಿಸುವ ಸಾಧ್ಯತೆ ಇದೆ. ಬಡತನ ರೇಖೆಗಿಂತ ಕೆಳಗಿನ ಕುಟುಂಬಗಳಿಗಾಗಿ ‘ಕಲ್ಯಾಣ’ ಯೋಜನೆ ಆಲೋಚಿಸಲಾಗಿದ್ದು, ಇದರ ಶೇಕಡ 80 ವಿಮೆಯನ್ನು ಸರ್ಕಾರವೇ ಭರಿಸುತ್ತದೆ. ವಾರ್ಷಿಕ 2 ಲಕ್ಷ ರೂಪಾಯಿವರೆಗೆ ಆದಾಯ ಹೊಂದಿದವರಿಗಾಗಿ ‘ಸೌಭಾಗ್ಯ’ ಯೋಜನೆ ಮತ್ತು 2 ಲಕ್ಷಕ್ಕಿಂತ ಹೆಚ್ಚು ವಾರ್ಷಿಕ ಆದಾಯ ಹೊಂದಿರುವವರಿಗೆ ‘ಉದಯ್’ ಯೋಜನೆ ಜಾರಿಗೆ ಬರಲಿವೆ.

ಬಿಪಿಎಲ್ ಕುಟುಂಬಗಳಿಗಾಗಿ 2008ರಲ್ಲಿ ಕೇಂದ್ರ ಸರ್ಕಾರ ರಾಷ್ಟ್ರೀಯ ಸ್ವಾಸ್ಥ್ಯ ಬಿಮಾ ಯೋಜನೆ ಜಾರಿಗೆ ತಂದಿತ್ತು. ಬಿಪಿಎಲ್ ಕುಟುಂಬದವರು ವಾರ್ಷಿಕ 30 ರೂ. ಪಾವತಿಸಿ 30 ಸಾವಿರ ರೂ. ಆರೋಗ್ಯ ವಿಮೆ ಪಡೆಯಬಹುದಾದ ಈ ಯೋಜನೆಗೆ ಹೆಚ್ಚು ಮಂದಿ ನೋಂದಾಯಿಸಿಕೊಳ್ಳದ ಕಾರಣ, ಇದು ಹೇಳಿಕೊಳ್ಳುವಂಥ ಪರಿಣಾಮ ಬೀರಿಲ್ಲ. ಆದ್ದರಿಂದ, ರಾಷ್ಟ್ರೀಯ ಸ್ವಾಸ್ಥ್ಯ ಬಿಮಾ ಯೋಜನೆ ಹೊಸ ಯೋಜನೆಯಲ್ಲಿ ವಿಲೀನಗೊಳ್ಳಲಿದೆ.

ಹಲವು ಸಾಮಾಜಿಕ ಕಾರ್ಯಕ್ರಮ, ಯೋಜನೆಗಳನ್ನು ಈಗಾಗಲೇ ಜಾರಿಗೆ ತಂದಿರುವ ರಾಜ್ಯ ಸರ್ಕಾರ ‘ಸಾರ್ವತ್ರಿಕ ಆರೋಗ್ಯ ಯೋಜನೆ’ಯನ್ನು ಶೀಘ್ರದಲ್ಲೇ ಜಾರಿಗೆ ತರಲು ಮುಂದಾಗಿದೆ. ಬಿಪಿಎಲ್ ಕುಟುಂಬಗಳಿಗೆ ಉಚಿತ ಸೇವೆ, ಎಪಿಎಲ್ ಕುಟುಂಬಗಳಿಗೆ ಶೇ.70 ಖರ್ಚನ್ನು ಸರ್ಕಾರವೇ ಈ ಯೋಜನೆಯಡಿ ಭರಿಸಲಿರುವುದು ಗಮನಾರ್ಹ. ಸರ್ಕಾರಿ ಆಸ್ಪತ್ರೆಗಳಲ್ಲಿ ಲಭ್ಯವಿಲ್ಲದ ಚಿಕಿತ್ಸೆಗಳನ್ನು ಖಾಸಗಿ ವಲಯದಲ್ಲಿ ಪಡೆದುಕೊಳ್ಳಲು ಅವಕಾಶ ಕಲ್ಪಿಸಲಾಗಿದೆ.

ನಿಜಾರ್ಥದಲ್ಲಿ ಇವು ಉತ್ತಮ ಚಿಂತನೆ ಮತ್ತು ಜನರಿಗೆ ತುಂಬ ಪ್ರಯೋಜನವಾಗುವಂಥ ಯೋಜನೆಗಳೇ. ಆದರೆ, ಕೇಂದ್ರ ಮತ್ತು ರಾಜ್ಯ ಸರ್ಕಾರದ ಯೋಜನೆಗಳ ಅನುಷ್ಠಾನದ ಹೊತ್ತಲ್ಲಿ ಗೊಂದಲಗಳು ಉಂಟಾಗದಂತೆ ನಿಗಾ ವಹಿಸುವ ಮತ್ತು ಆರೋಗ್ಯವಿಮೆಯ ಮಹತ್ವವನ್ನು ಜನರಿಗೆ ಮನದಟ್ಟು ಮಾಡಿಕೊಡುವ ಕೆಲಸವಾಗಬೇಕಿದೆ. ಭಾರತದಂಥ ಬೃಹತ್ ದೇಶದ ಬಹುಪಾಲು ಜನಸಂಖ್ಯೆ ಆರೋಗ್ಯ ವಿಮೆಯಿಂದ ವಂಚಿತವಾಗಿದೆ. 130 ಕೋಟಿ ಜನಸಂಖ್ಯೆಯ ದೇಶದಲ್ಲಿ ಆರೋಗ್ಯ ವಿಮೆಯ ಅನುಷ್ಠಾನ ಸವಾಲೂ ಹೌದು. ಈ ಯೋಜನೆ ಕೇವಲ ‘ನಾಮ್ ಕೇ ವಾಸ್ತೆ ಆಗದೆ’ ವೈದ್ಯಕೀಯ ವೆಚ್ಚಗಳನ್ನು ಭರಿಸುವ ಸಮರ್ಥ ಯೋಜನೆಯಾಗಬೇಕು. ಹಾಗಾಗಿ, ಯೋಜನೆ ಅನುಷ್ಠಾನದ ನಿಟ್ಟಿನಲ್ಲೂ ಗಮನ ಹರಿಸಬೇಕು. ಆಗ ಮಾತ್ರ ಜನರು ಕಾಯಿಲೆಕಸಾಲೆ ಬಂದಾಗ ಬೆದರದೆ ಇಂಥ ಯೋಜನೆಗಳ ನೆರವು ಪಡೆದುಕೊಳ್ಳಲು ಸಾಧ್ಯ.

Leave a Reply

Your email address will not be published. Required fields are marked *

Back To Top