Thursday, 25th May 2017  

Vijayavani

1. ಬೆಳಗಾವಿಯಲ್ಲಿ ಎಂಇಎಸ್​ ಪ್ರತಿಭಟನಾ ರ್ಯಾಲಿ ಹಿನ್ನೆಲೆ- ಡಿಸಿ ಆದೇಶಕ್ಕೆ ಹೆದರಿ ಮಹಾರಾಷ್ಟ್ರ ಸಚಿವ ವಾಪಸ್​​​​- ಕುಂದಾನಗರಿಯಲ್ಲಿ ಬಿಗಿ ​ ಬಂದೋಬಸ್ತ್​​​​ 2. ಡಿಸೆಂಬರ್​ ಆದ್ರೂ ಓಕೆ, ಮಾರ್ಚ್ ಆದ್ರೂ ಓಕೆ- ಸಿಎಂ ಯಾವಾಗ್ಬೇಕಾದ್ರೂ ಚುನಾವಣೆ ನಡೆಸ್ಲಿ- 224 ಕ್ಷೇತ್ರದಲ್ಲೂ ಸ್ಪರ್ಧೆ ಅಂದ್ರು ದೇವೇಗೌಡ 3. ವಿವಿಧ ಬೇಡಿಕೆಗೆ ಆಗ್ರಹಿಸಿ ಪೊರಕೆ ಹಿಸಿದು ಪ್ರೊಟೆಸ್ಟ್​- ಬಿಬಿಎಂಪಿ ಎದುರು ಪೌರಕಾರ್ಮಿಕರ ಧರಣಿ- ಕೂಡಲೇ ಕೆಲಸ ಖಾಯಂಗೆ ಆಗ್ರಹ 4. ಕೆಪಿಸಿಸಿ ಅಧ್ಯಕ್ಷರಾಗಿ ಪರಮೇಶ್ವರ್ ಮುಂದುವರಿಸಿ- ಕಾಂಗ್ರೆಸ್ ಉಸ್ತುವಾರಿಗೆ ನಟಿ ಭಾವನಾ ಮನವಿ- ಮರುಮಾತಾಡದ ವೇಣುಗೋಪಾಲ್ 5. ಆದಿಚುಂಚನಗಿರಿಯಲ್ಲಿ ಮಾಜಿ ಸಿಎಂ ಅಮಾವಾಸ್ಯೆ ಪೂಜೆ- ಕಾಲಭೈರವೇಶ್ವರ, ಕ್ಷೇತ್ರಾದಿ ದೇವತೆಗಳಿಗೆ ನಮನ- ಇಷ್ಟಾರ್ಥ ಸಿದ್ಧಿಗೆ ಪ್ರಾರ್ಥನೆ
Breaking News :

ಜನಪರ ಜಿಎಸ್​ಟಿ

Saturday, 20.05.2017, 3:00 AM       No Comments

ತ್ತು ಹಲವು ವಸ್ತುಗಳ ಮೇಲೆ ವಿಧಿಸಲಾಗುವ ತೆರಿಗೆ ದರವನ್ನು ಸರಕು ಮತ್ತು ಸೇವಾ ತೆರಿಗೆ (ಜಿಎಸ್​ಟಿ) ಕೌನ್ಸಿಲ್ ಸಭೆಯಲ್ಲಿ ಅಂತಿಮಗೊಳಿಸಿ, ಆಹಾರಧಾನ್ಯ, ಬೇಳೆಕಾಳೆಗಳು ಹಾಗೂ ಹಾಲನ್ನು ತೆರಿಗೆ ವ್ಯಾಪ್ತಿಯಿಂದ ಹೊರಗಿಟ್ಟಿರುವುದು ಶ್ರೀಸಾಮಾನ್ಯರ ಪಾಲಿಗೆ ಹರ್ಷವನ್ನೇ ತರಲಿದೆ. ಪ್ರಸ್ತುತ ಕೆಲ ರಾಜ್ಯಗಳು ಅಕ್ಕಿ, ಗೋಧಿಯಂಥ ಆಹಾರಧಾನ್ಯಗಳ ಮೇಲೆ ಮೌಲ್ಯವರ್ಧಿತ ತೆರಿಗೆ (ವ್ಯಾಟ್) ವಿಧಿಸುತ್ತಿದ್ದು, ಜಿಎಸ್​ಟಿ ಜಾರಿಗೆ ಬಂದ ತರುವಾಯ ಅವಕ್ಕೆ ಯಾವುದೇ ತೆರಿಗೆ ಅನ್ವಯವಾಗುವುದಿಲ್ಲ ಎಂಬುದು ಗಮನಿಸಬೇಕಾದ ಅಂಶ. ಜುಲೈ 1ರಿಂದಲೇ ಈ ಹೊಸ ತೆರಿಗೆ ಪದ್ಧತಿ ಜಾರಿಗೆ ಬರಲಿರುವುದರಿಂದ, ಅಂದಿನಿಂದಲೇ ಇವು ಅಗ್ಗವಾಗಲಿವೆ. ಮಿಕ್ಕಂತೆ, ಸೋಪ್, ಟೂತ್

ಪೇಸ್ಟ್​ನಂಥ ಸಾಮಾನ್ಯ ಬಳಕೆಯ ಉತ್ಪನ್ನಗಳಿಗೆ ಶೇ. 18ರ ತೆರಿಗೆ ನಿಗದಿಪಡಿಸಲಾಗಿದ್ದರೆ, ಚಹಾ, ಕಾಫಿ, ಸಕ್ಕರೆ, ಖಾದ್ಯತೈಲ, ಸಿಹಿತಿಂಡಿಗಳು ಶೇ. 5ರ ತೆರಿಗೆ ವ್ಯಾಪ್ತಿಯಲ್ಲಿ ಬರಲಿವೆ. ಕಾರುಗಳಿಗೆ ಶೇ. 28ರಷ್ಟು ತೆರಿಗೆಯ ಜತೆಗೆ ಅವುಗಳ ವೈವಿಧ್ಯಮಯ ಸ್ವರೂಪ ಮತ್ತು ವೈಶಿಷ್ಟ್ಯಳಿಗೆ ಅನುಸಾರವಾಗಿ ಶೇ. 1ರಿಂದ 15ರವರೆಗೆ ಸೆಸ್ ಹೇರಲು ಜಿಎಸ್​ಟಿ ಕೌನ್ಸಿಲ್ ನಿರ್ಧರಿಸಿದೆ. ಒಟ್ಟಾರೆ ಹೇಳುವುದಾದರೆ, ಈ ಕ್ರಮದಿಂದಾಗಿ ಜನಸಾಮಾನ್ಯರು ನೆಮ್ಮದಿಯ ನಿಟ್ಟುಸಿರು ಬಿಡುವಂತಾಗಿದೆ.

ವ್ಯವಸ್ಥೆಯಲ್ಲಿ ಬದಲಾವಣೆ ತರುವ ಸಂದರ್ಭದಲ್ಲಿ- ಅದು ಸಾಮಾಜಿಕ, ಶೈಕ್ಷಣಿಕ ಬದಲಾವಣೆಗಳೇ ಇರಬಹುದು ಅಥವಾ ಆರ್ಥಿಕತೆಯ ಏರುಗತಿ ಕಾಯ್ದುಕೊಳ್ಳಲೆಂದು ತರಲಾಗುವ ‘ಲೆಕ್ಕಾಚಾರ’ದ ಬದಲಾವಣೆಯೇ ಇರಬಹುದು- ಇಂಥ ಬದಲಾವಣೆಯಿಂದ ಯಾರಿಗೆ, ಎಷ್ಟು ಜನರಿಗೆ ಸದುಪಯೋಗವಾಗುತ್ತದೆ ಎಂಬುದರ ಪರಿಗಣನೆಯೂ ಮುಖ್ಯ. ರೂಢಿಗತ ವ್ಯವಸ್ಥೆಯೊಂದರಲ್ಲಿ ವಾಡಿಕೆಯಂತೆ ಬದಲಾವಣೆ ತರಬೇಕು ಎಂಬ ಉದ್ದೇಶದ ಅಥವಾ ಜನಕಲ್ಯಾಣದ ಆಶಯವಿಲ್ಲದ ಯಾವುದೇ ಕಾರ್ಯನೀತಿಯನ್ನು ಹೇರುವುದರಿಂದ ಹೇಳಿಕೊಳ್ಳುವಂಥ ಪ್ರಯೋಜನವೇನೂ ಇರುವುದಿಲ್ಲ. ಆ ಅರ್ಥದಲ್ಲಿ ನೋಡಿದಾಗ, ಇದು ‘ಜನಪರ ಜಿಎಸ್​ಟಿ’ ಎನ್ನಲಡ್ಡಿಯಿಲ್ಲ. ಅಸ್ತಿತ್ವದಲ್ಲಿದ್ದ ಬಗೆಬಗೆಯ ತೆರಿಗೆಯ ಸ್ವರೂಪವನ್ನು ಜೀರ್ಣಿಸಿಕೊಳ್ಳಲಾಗದೆ ಗೊಂದಲದಲ್ಲಿದ್ದ ಜನಸಾಮಾನ್ಯರು ಈ ಹೊಸ ತೆರಿಗೆ ಪದ್ಧತಿಗೆ ಸುಲಭವಾಗಿ ಹೊಂದಿಕೊಳ್ಳುತ್ತಾರೆ ಎಂಬುದು ಸಹಜ ನಿರೀಕ್ಷೆ. ಇದರ ಜಾರಿಯೂ ಸರಾಗವಾಗಿರುವುದರಿಂದ ಅಧಿಕಾರಿಶಾಹಿಗೆ ಕಾರ್ಯಾನುಷ್ಠಾನ ಕ್ಲಿಷ್ಟವೇನೂ ಆಗದು.

ಹಾಗೆ ನೋಡಿದರೆ, ಸರಕು ಮತ್ತು ಸೇವಾ ತೆರಿಗೆಯು ಹಣಕಾಸು ವರ್ಷದ ಆರಂಭಿಕ ದಿನವಾದ ಏಪ್ರಿಲ್ 1ರಿಂದಲೇ ಜಾರಿಗೆ ಬರಬೇಕಿತ್ತು. ಆದರೆ ಅದು ರಾಜಕೀಯ ಹಗ್ಗಜಗ್ಗಾಟದ ಬಲಿಪಶುವಾಗಿ, ಸಂಸತ್ತಿನಲ್ಲಿ ಅನುಮೋದನೆಯೂ ವಿಳಂಬಗೊಂಡ ಕಾರಣ, ಜುಲೈ 1ರಿಂದ ಅನುಷ್ಠಾನಗೊಳ್ಳುವಂತಾಗಿದೆ. ಉತ್ತಮ ಹಾಗೂ ಜನಸ್ನೇಹಿ ಉಪಕ್ರಮವೊಂದು ತಡವಾಗಿಯಾದರೂ ಅನುಷ್ಠಾನಗೊಳ್ಳುತ್ತಿರುವುದಕ್ಕೆ ಹರ್ಷಿಸೋಣ. ಔಷಧ-ಮಾತ್ರೆಗಳ ಬೆಲೆ ಮುಗಿಲುಮುಟ್ಟಿರುವುದನ್ನು, ತನ್ಮೂಲಕ ಜನರ ಜೇಬು ಸುಡುತ್ತಿರುವುದನ್ನು ಮನಗಂಡ ಕೇಂದ್ರ ಸರ್ಕಾರ, ಜೆನರಿಕ್ ಔಷಧಗಳನ್ನು ಶಿಫಾರಸು ಮಾಡುವಂತೆ ಸಂಬಂಧಪಟ್ಟವರಿಗೆ ಸೂಚನೆ ನೀಡಿರುವುದರ ಜತೆಗೆ ಆಯ್ದ ತಾಣಗಳಲ್ಲಿ ಜೆನರಿಕ್ ಔಷಧ ಮಳಿಗೆಗಳನ್ನು ತೆರೆಯುವುದಕ್ಕೆ ಮುಂದಾಗಿರುವುದು ಇಂಥ ಮತ್ತೊಂದು ಉಲ್ಲೇಖಾರ್ಹ ಮತ್ತು ಶ್ಲಾಘನಾರ್ಹ ಉಪಕ್ರಮವೇ ಸರಿ. ಇದೇ ರೀತಿಯಲ್ಲಿ, ವ್ಯವಸ್ಥೆಯ ಇನ್ನಿತರ ಕ್ಷೇತ್ರಗಳಲ್ಲೂ ಸರಳ, ಸುಲಲಿತ, ಮಿತವ್ಯಯಕಾರಿ ಯೋಜನೆಗಳ ಅನುಷ್ಠಾನಕ್ಕೆ ಮುಂದಾಗಿ, ಅಧಿಕಾರಿಶಾಹಿಯಲ್ಲಿ ಬೇರುಬಿಟ್ಟಿರುವ ‘ಕೆಂಪುಪಟ್ಟಿ’ ಕಾರ್ಯಶೈಲಿಗೆ ಮಂಗಳ ಹಾಡಿದರೆ, ಜನರು ಮೆಚ್ಚಿ ಹರಸಿಯಾರು.

Leave a Reply

Your email address will not be published. Required fields are marked *

Back To Top