Monday, 11th December 2017  

Vijayavani

1. ಮತ್ತಷ್ಟು ಹದಗೆಟ್ಟ ರವಿ ಬೆಳಗೆರೆ ಆರೋಗ್ಯ – ಕಾಲು ನೋವು, ನಿಶ್ಯಕ್ತಿಯಿಂದ ಪತ್ರಕರ್ತನ ನರಳಾಟ – ವಿಕ್ಟೋರಿಯಾ ಆಸ್ಪತ್ರೆಯಲ್ಲಿ ವೈದ್ಯಕೀಯ ಪರೀಕ್ಷೆ 2. ಮಧ್ಯಾಹ್ನ 12ಕ್ಕೆ ಕೋರ್ಟ್​ಗೆ ಹಾಜರ್ – ರವಿ ಬೆಳಗೆರೆ ವಿರುದ್ಧ ಮತ್ತೊಂದು ಕೇಸ್‌ – ಪತ್ರಕರ್ತನಿಗೆ ಜೈಲಾ..? ಬೇಲಾ..? 3. ಬಳ್ಳಾರಿಯಲ್ಲಿ ಗಣಿಗಾರಿಕೆ ವಿರುದ್ಧ ಕೂಗು – ಕುಮಾರಸ್ವಾಮಿ ಬೆಟ್ಟ ಉಳಿವಿಗೆ ಸಂಡೂರು ಬಂದ್ – ಅಂಗಡಿ, ಮುಂಗಟ್ಟುಗಳಿಗೆ ಬೀಗ, ಶಾಲಾ-ಕಾಲೇಜಿಗೆ ರಜೆ 4. ರಾಜ್ಯ ಸರ್ಕಾರದಿಂದ ಬಿಜೆಪಿ ಹತ್ತಿಕ್ಕುವ ಕೆಲಸ – ರ‍್ಯಾಲಿಯಲ್ಲಿ ಭಾಗಿಯಾದವ್ರ ವಿರುದ್ಧ ಟ್ರಾಫಿಕ್‌ ಪೊಲೀಸ್‌ ಕೇಸ್ – ಕಲಬುರಗಿಯಲ್ಲಿ ಖಾಕಿ, ಕೇಸರಿ ಕದನ 5. ಪ್ರಧಾನಿ ಮೋದಿ ರ‍್ಯಾಲಿಗೆ ಅವಕಾಶವಿಲ್ಲ – ಮೆಗಾ ರೋಡ್​ ಶೋಗೆ ಅನುಮತಿ ನಿರಾಕರಣೆ – ರಾಹುಲ್ ಸಮಾವೇಶಕ್ಕೂ ಗುಜರಾತ್ ಪೊಲೀಸರ ತಡೆ
Breaking News :

ಮಳೆಗಾಲಕ್ಕೆ ಸಜ್ಜಾಗಿ

Tuesday, 16.05.2017, 3:00 AM       No Comments

ಬಿರುಬೇಸಿಗೆಯಲ್ಲಿ ಬೆಂದವರಿಗೆ ತಂಪೆರೆಯವ ಸುದ್ದಿ ಬಂದಿದೆ. ವಾಡಿಕೆಯಂತೆ ಜೂನ್ ಮೊದಲ ವಾರದಲ್ಲಿ ಆಗಮಿಸಬೇಕಿದ್ದ ಮುಂಗಾರು ಮಳೆ, ಅವಧಿಪೂರ್ವದಲ್ಲೇ ಸುರಿಯುವ ಲಕ್ಷಣಗಳು ತೋರಿವೆ. ಜಲಕ್ಷಾಮದ ಭಯದ ಸುಳಿಯಲ್ಲಿ ಸಿಕ್ಕವರಿಗೆ, ಅದರಲ್ಲೂ ಕೃಷಿಕರ ಪಾಲಿಗೆ ನಿರಾಳತೆ ಒದಗಿಸಬಲ್ಲ ಆಶಾದಾಯಕ ಬೆಳವಣಿಗೆಯಿದು. ಹಾಗಂತ ಸಂಭ್ರಮಕ್ಕೇ ಸಂಪೂರ್ಣ ಮೈಒಡ್ಡುವಂತಿಲ್ಲ; ಸಂರಕ್ಷಣೆಯ ಎಚ್ಚರವೂ ಇಲ್ಲಿ ಅಗತ್ಯವಾಗಿದೆ. ಕಾರಣ ಬೆಂಗಳೂರು, ಬಾಗಲಕೋಟೆ, ಬಳ್ಳಾರಿ, ಗದಗ ಮತ್ತು ವಿಜಯಪುರ ಸೇರಿದಂತೆ ರಾಜ್ಯದ ಹಲವೆಡೆ ಬಿರುಗಾಳಿ ಸಹಿತ ಸುರಿದ ಭಾರಿ ಮಳೆಯಿಂದಾಗಿ ಜನಜೀವನ ಅಸ್ತವ್ಯಸ್ತಗೊಂಡಿದೆ. ಕೆಲವೆಡೆ ಸಿಡಿಲು ಬಡಿದು ನಾಲ್ವರು ಮೃತಪಟ್ಟಿರುವ ವರದಿಗಳೂ ಬಂದಿವೆ. ಹವಾಮಾನ ಇಲಾಖೆಯ ಮುನ್ಸೂಚನೆಯಂತೆ ಮುಂದಿನ ಐದು ದಿನಗಳ ಕಾಲ ಭಾರಿ ಮಳೆಯಾಗುವ ಸಾಧ್ಯತೆಗಳಿವೆ. ಹೀಗಾಗಿ ಮಳೆನೀರು ನಿರ್ವಹಣೆ ಹಾಗೂ ಪ್ರವಾಹದಂಥ ಪರಿಸ್ಥಿತಿಗಳನ್ನು ನಿಭಾಯಿಸಲು ಸಮರೋಪಾದಿಯಲ್ಲಿ ತೊಡಗಿಸಿಕೊಳ್ಳಬೇಕಿದೆ.

ಕಳೆದ ಕೆಲ ವರ್ಷಗಳಿಂದ ರಾಜ್ಯವು ಕ್ಷಾಮದ ಸುಳಿಗೆ ಸಿಲುಕಿದ್ದು ಗೊತ್ತಿರುವ ಸಂಗತಿಯೇ. ತತ್ಪರಿಣಾಮವಾಗಿ ವಿದ್ಯುತ್ ಕಣ್ಣಾಮುಚ್ಚಾಲೆಯೂ ರಾಜ್ಯವನ್ನು ಬಹಳಷ್ಟು ಬಾಧಿಸಿತೆನ್ನಬೇಕು. ಜಲವಿದ್ಯುತ್ ಯೋಜನೆಗಳನ್ನೇ ಹೆಚ್ಚಾಗಿ ನೆಚ್ಚಿರುವೆಡೆ ಇದು ಅನಿವಾರ್ಯ ಸಮಸ್ಯೆ. ಹಾಗಂತ ಭರಪೂರ ಮಳೆಯಾಗುವ ಮುನ್ಸೂಚನೆ ಸಿಕ್ಕಾಗಲೂ ಜಲಸಂರಕ್ಷಣೆಯ ಉಪಕ್ರಮಗಳಲ್ಲಿ ತೊಡಗಿಸಿಕೊಳ್ಳದಿರುವುದು ವಿವೇಚನೆಯಿಲ್ಲದ ನಡೆಯಾಗುತ್ತದೆ. ಕೆರೆಗಳಲ್ಲಿನ ಹೂಳು ತೆಗೆಸಿ ಅವುಗಳ ಸಂಗ್ರಹಣಾ ಸಾಮರ್ಥ್ಯವನ್ನು ಹೆಚ್ಚಿಸುವುದು, ಜಲಬಿಕ್ಕಟ್ಟಿನ ಸಮಯದಲ್ಲಿ ನೀರನ್ನು ಬಳಸುವುದಕ್ಕೆ ಅನುವಾಗಿಸುವುದು ಇಂಥ ಉಪಕ್ರಮಗಳಲ್ಲೊಂದು. ಇನ್ನು ಅತಿವೃಷ್ಟಿಯಿಂದ ಉಂಟಾಗಬಹುದಾದ ಅಸ್ತವ್ಯಸ್ತತೆಯ ನಿರ್ವಹಣೆಗೂ ಮುಂದಾಗಬೇಕಾದ ಅಗತ್ಯವಿದೆ. ಅತಿವೃಷ್ಟಿಯಿಂದಾಗಿ ಊರೂರುಗಳ ನಡುವಿನ ಸಂಪರ್ಕಸೌಲಭ್ಯವೇ ಕಡಿತಗೊಳ್ಳುವುದು ರಾಜ್ಯದ ಕೆಲ ಭಾಗಗಳಲ್ಲಿ ಕಾಣಬರುವ ವಿದ್ಯಮಾನ. ನದೀತಟದ ಗ್ರಾಮೀಣ ಪ್ರದೇಶಗಳು ಹೀಗೆ ಪ್ರವಾಹದ ಹೊಡೆತಕ್ಕೆ ಸಿಲುಕದಂತಾಗಲು ಅಗತ್ಯ ಕ್ರಮಗಳಿಗೆ ಮುಂದಾಗಬೇಕಿದೆ. ನಿನ್ನೆಯ ಮಳೆಯಿಂದಾಗಿ ವಿಜಯಪುರ ಜಿಲ್ಲೆಯ ತಾಳೀಕೋಟೆ ಪಟ್ಟಣ ಹಾಗೂ ಸುತ್ತಮುತ್ತಲ ಪ್ರದೇಶಗಳು ಜಲಾವೃತಗೊಂಡಿದ್ದರೆ, ಮೈಲೇಶ್ವರ ಎಂಬ ಗ್ರಾಮದೊಳಗೆ ನೀರು ನುಗ್ಗಿ ಜನ ರಾತ್ರಿಯಿಡೀ ಜಾಗರಣೆ ಮಾಡುವಂತಾದ ವರದಿಗಳು ಬಂದಿರುವುದು ಈ ಮಾತಿಗೆ ಸಾಕ್ಷಿ. ಇನ್ನು ಬಹಳಷ್ಟು ಪಟ್ಟಣ ಮತ್ತು ನಗರಪ್ರದೇಶಗಳಲ್ಲಿ ಮಳೆನೀರಿನ ಹರಿವಿಗೆ ಸಮರ್ಪಕ ವ್ಯವಸ್ಥೆಗಳಿಲ್ಲದ ಕಾರಣ, ಕೆಲ ಬಡಾವಣೆಗಳು ಅಕ್ಷರಶಃ ದ್ವೀಪಗಳಾಗಿ ಪರಿಣಮಿಸುವ, ಕಾರು-ಬಸ್ಸುಗಳು ಮುಳಗುವಷ್ಟರ ಮಟ್ಟಿಗೆ ರಸ್ತೆಯಲ್ಲಿ ಮಳೆನೀರು ಕಟ್ಟಿಕೊಳ್ಳುವ ದೃಶ್ಯಗಳು ಬಹುತೇಕರಿಗೆ ಚಿರಪರಿಚಿತ. ಬೆಂಗಳೂರಿನಲ್ಲಿ ಇದು ಪ್ರತಿವರ್ಷದ ವಿದ್ಯಮಾನವೇ ಸರಿ. ಇದು ಪುನರಾವರ್ತನೆಯಾಗಬಾರದೆಂದರೆ, ಒಳಚರಂಡಿ ಮತ್ತು ನೀರಿನ ಕಾಲುವೆಗಳ ಸಮರ್ಪಕ ನಿರ್ವಹಣೆ ಅತ್ಯಗತ್ಯ.

ಅನಾವೃಷ್ಟಿಯಿಂದ ಹುಟ್ಟಿಕೊಳ್ಳುವ ಬರದ ಬೇಗುದಿ, ಅತಿವೃಷ್ಟಿಯು ಸೃಷ್ಟಿಸುವ ಪ್ರವಾಹ ಅಥವಾ ಮುಳುಗಡೆಯ ಭಯ ಈ ಎರಡರ ನಿರ್ವಹಣೆಯೂ ಸವಾಲಿನ ವಿಷಯವೇ. ರಾಜ್ಯ ಸರ್ಕಾರ ನಾಲ್ಕು ವರ್ಷಗಳನ್ನು ಪೂರ್ಣಗೊಳಿಸಿದ ಸಂಭ್ರಮದಲ್ಲಿದ್ದರೆ, ಬಿಜೆಪಿ ಮತ್ತು ಜೆಡಿಎಸ್​ನಂಥ ಮತ್ತೆರಡು ಪಕ್ಷಗಳು ಸಹಜವಾಗಿಯೇ ಮುಂಬರುವ ವಿಧಾನಸಭಾ ಚುನಾವಣಾ ತಯಾರಿಯಲ್ಲಿವೆ. ಇದು ತಪ್ಪೇನಲ್ಲ. ಆದರೆ, ರಾಜಕೀಯ ಕಾರ್ಯಾಚರಣೆಯ ಜತೆಜತೆಗೆ, ರಕ್ಷಣಾ ಕಾರ್ಯಾಚರಣೆಯ ಕುರಿತೂ ಸರ್ಕಾರ, ಜನಪ್ರತಿನಿಧಿಗಳು/ರಾಜಕೀಯ ಪಕ್ಷಗಳು ಗಮನಹರಿಸುವುದು ಒಳಿತು.

Leave a Reply

Your email address will not be published. Required fields are marked *

Back To Top