Wednesday, 28th June 2017  

Vijayavani

1. ಜಿಎಸ್​​ಟಿ ಜಾರಿಗೆ ಸಜ್ಜಾಗ್ತಿದೆ ಕೇಂದ್ರ ಸರ್ಕಾರ- ಜೂನ್​ 30ರ ಮಧ್ಯರಾತ್ರಿ ಅಧಿವೇಶನಕ್ಕೆ ಇಂದು ರಿಹರ್ಸಲ್​- ಸಂದೇಹ ನಿವಾರಣೆಗೆ ವಾರ್​ ರೂಂ 2. ಜಗತ್ತಿನಾದ್ಯಂತ ಮತ್ತೆ ಸೈಬರ್ ದಾಳಿ- ಪೆಟ್ಯಾ ರಾನ್ಸೋಮ್ವೇರ್​ಗೆ ಯುರೋಪ್ ತತ್ತರ- ಭಾರತದ ಐಟಿ ಕಂಪನಿಗಳಿಗೂ ಶುರುವಾಯ್ತು ಭೀತಿ 3. ಆರ್​ಜೆಡಿ ನಾಯಕರ ವಿರುದ್ಧ ಹೆಚ್ಚಿದ ಭ್ರಷ್ಟಾಚಾರ ಆರೋಪ- ಲಾಲು ಮೇಲೆ ನಿತೀಶ್ ಕುಮಾರ್​ ಮುನಿಸು- ಮುರಿದು ಬೀಳುತ್ತಾ ಮಹಾಘಟಬಂಧನ 4. ತೀವ್ರ ಕುತೂಹಲ ಕೆರಳಿಸಿದ ಸಂಪುಟ ವಿಸ್ತರಣೆ- ಇಂದು ಹೈ ಕಮಾಂಡ್​ ಜತೆ ಸಿಎಂ ಮಾತುಕತೆ- ಯಾರಿಗೆ ಒಲಿಯುತ್ತೆ ಗೃಹಖಾತೆ 5. ಅವನು ಅಪ್ಪಾನಾ ಇಲ್ಲಾ ಇವನು ಅಪ್ಪಾನಾ- ತಂದೆಯ ಅವಳಿ ಸೋದರನ ಕಂಡು ಮಗು ಕನ್ಪ್ಯೂಸ್- ಕಂದನ ವಿಡಿಯೋ ಸಖತ್ ವೈರಲ್
Breaking News :

ಸ್ವಾಗತಾರ್ಹ ಉಪಕ್ರಮ

Wednesday, 10.05.2017, 3:00 AM       No Comments

‘ನಾವು ಕೆಲಸ ಕೊಡಲು ಸಿದ್ಧ. ಆದರೆ ಆ ಕೆಲಸಕ್ಕೆ ತಕ್ಕ ಕೌಶಲ ಹೊಂದಿರುವವರು ಸಿಗುವುದು ದುರ್ಲಭ’- ಇದು ವಿವಿಧ ವಲಯಗಳ ಉದ್ಯಮಿಗಳಿಂದ ಹೊಮ್ಮುವ ಸಾಮಾನ್ಯ ಅಭಿಪ್ರಾಯ. ಕೆಲಮಟ್ಟಿಗೆ ಇದು ನಿಜವೂ ಹೌದು. ಶಾಲಾ ಪಠ್ಯಗಳಲ್ಲಿ ಕೇವಲ ಅಂಕಗಳಿಕೆಗೆ ಒತ್ತುಕೊಟ್ಟು ಜೀವನ ಶಿಕ್ಷಣ ಹಾಗೂ ಕೌಶಲ ನಿರ್ವಣವನ್ನು ಕಡೆಗಣಿಸಿದರೆ ಆಗುವುದು ಹೀಗೆಯೇ. ಈ ಪರಿಸ್ಥಿತಿಯನ್ನು ಸುಧಾರಿಸುವ ಉದ್ದೇಶದಿಂದ ಸರ್ಕಾರಗಳು ಆಗೀಗ ಯೋಜನೆಗಳನ್ನು ಪ್ರಕಟಿಸುವುದು ಶುಭಸೂಚನೆಯಾದರೂ, ಭಾರತದ ಉದ್ಯೋಗಪಡೆಯ ಗಾತ್ರಕ್ಕೆ ಹೋಲಿಸಿದರೆ ಸಾಗಬೇಕಾದ ದಾರಿ ಬಹು ದೂರವಿದೆ ಎಂಬುದರಲ್ಲಿ ಎರಡು ಮಾತಿಲ್ಲ. ಈ ಹಿನ್ನೆಲೆಯಲ್ಲಿ, ಕರ್ನಾಟಕ ಸರ್ಕಾರ ರೂಪಿಸಿರುವ ಯೋಜನೆಯೊಂದು ಗಮನ ಸೆಳೆಯುವಂತಿದೆ. ಸರ್ಕಾರವೇ ಕೌಶಲ ತರಬೇತಿ ನೀಡುವ ಈ ಯೋಜನೆ, ಮೇ 15ರಂದು ಚಾಲನೆ ಪಡೆಯಲಿದೆ. www.kaushalykar.com ಎಂಬ ವೆಬ್ ಪೋರ್ಟಲನ್ನು ಇದಕ್ಕಾಗಿಯೇ ವಿನ್ಯಾಸಗೊಳಿಸಿದ್ದು, ಆಸಕ್ತರು ಮೇ 15ರಿಂದ 23ರ ಅವಧಿಯಲ್ಲಿ ಇಲ್ಲಿ ನೋಂದಣಿ ಮಾಡಿಕೊಳ್ಳಬೇಕಾಗುತ್ತದೆ. ನಂತರದಲ್ಲಿ ಆಯಾ ಇಲಾಖೆಗಳೇ ಅರ್ಜಿದಾರರನ್ನು ಸಂರ್ಪಸಿ ಅಗತ್ಯ ಕೌಶಲ ತರಬೇತಿಗೆ ವ್ಯವಸ್ಥೆ ಮಾಡುತ್ತವೆ. ತರಬೇತಿ ನಂತರ ಉದ್ಯೋಗ ಮೇಳ ಆಯೋಜನೆ, ಸ್ವಉದ್ಯೋಗ ಮಾಡುವವರಿಗೆ, ವಿದೇಶಕ್ಕೆ ತೆರಳುವವರಿಗೆ ಆರ್ಥಿಕ ನೆರವು ಮುಂತಾದ ಅಂಶಗಳೂ ಈ ಯೋಜನೆಯಲ್ಲಿವೆ. ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಈ ಸಾಲಿನ ಬಜೆಟ್ ಮಂಡಿಸುವಾಗ, ರಾಜ್ಯದ 5 ಲಕ್ಷ ಯುವಜನರಿಗೆ ಕೌಶಲ ತರಬೇತಿ ನೀಡುವ ಪ್ರಸ್ತಾಪವನ್ನು ಮಾಡಿದ್ದರು. ಅದರಂಗವಾಗಿ ಈ ಯೋಜನೆ ರೂಪುಗೊಂಡಿದೆ. ರಾಜ್ಯದಲ್ಲಿ ಪ್ರತಿವರ್ಷ 6.85 ಲಕ್ಷ ವಿದ್ಯಾರ್ಥಿಗಳು ಎಸ್ಸೆಸ್ಸೆಲ್ಸಿ, 3.69 ಲಕ್ಷ ಪಿಯು ಹಾಗೂ 3.66 ಲಕ್ಷ ಮಂದಿ ಪದವಿ ಪಡೆಯುತ್ತಾರೆಂಬುದನ್ನು ಗಮನಿಸಿದರೆ, ಉದ್ಯೋಗ ಮಾರುಕಟ್ಟೆಯ ಮಹತ್ವ ಅರ್ಥವಾಗುತ್ತದೆ. ಸರ್ಕಾರದ ಈ ಯೋಜನೆ ಸೂಕ್ತ ರೀತಿಯಲ್ಲಿ ಜಾರಿಗೆ ಬಂದಲ್ಲಿ ಒಂದಷ್ಟು ಪರಿಣಾಮಗಳನ್ನು ನಿರೀಕ್ಷಿಸಬಹುದು.

2022ರೊಳಗೆ ದೇಶದ 40 ಕೋಟಿ ಜನರಿಗೆ ವಿವಿಧ ರೀತಿಯ ಕೌಶಲ ತರಬೇತಿ ನೀಡುವ ಉದ್ದೇಶದಿಂದ 2015ರ ಜುಲೈ 15ರಂದು ಕೇಂದ್ರ ಸರ್ಕಾರದ ವತಿಯಿಂದ ‘ಕೌಶಲ ಭಾರತ’ ಎಂಬ ಯೋಜನೆ ಜಾರಿಯಾಗಿದೆ. ಇದರ ಮೂಲಕ ರಾಷ್ಟ್ರೀಯ ಕೌಶಲ ಅಭಿವೃದ್ಧಿ ನಿಗಮ, ಕೌಶಲ ಅಭಿವೃದ್ಧಿ ಮತ್ತು ಉದ್ಯಮಶೀಲತೆ ನೀತಿ, ಪ್ರಧಾನಮಂತ್ರಿ ಕೌಶಲ ವಿಕಾಸ ಯೋಜನೆ ಮತ್ತು ಕೌಶಲ ಸಾಲ ಯೋಜನೆ ಮುಂತಾದವುಗಳನ್ನು ಆರಂಭಿಸಿ ಯುವ ಉದ್ಯಮಿಗಳಿಗೆ ಪ್ರೋತ್ಸಾಹ ನೀಡಲಾಗುತ್ತಿದೆ. ಜಗತ್ತಿನಾದ್ಯಂತ ಶಿಕ್ಷಣಕ್ಕೆ ಮಹತ್ವ ನೀಡುವ ಪ್ರವೃತ್ತಿ ಹೆಚ್ಚಿರುವುದರಿಂದ ಪದವೀಧರರ ದಂಡೇ ತಯಾರಾಗುತ್ತಿದೆ. ಆದರೆ ಅದಕ್ಕೆ ತಕ್ಕಂತೆ ಉದ್ಯೋಗಸೃಷ್ಟಿ ಸಾಧ್ಯವಾಗುತ್ತಿಲ್ಲ ಎಂಬುದು ಸರ್ಕಾರಗಳಿಗೆ ಸವಾಲಿನ ಸಂಗತಿಯೇ ಆಗಿದೆ. ಅದೂ ಅಲ್ಲದೆ ಸರ್ಕಾರಿ ಉದ್ಯೋಗ ಅವಕಾಶವೂ ಕಡಿಮೆ. ಆಯಾ ಕೆಲಸಕ್ಕೆ ತಕ್ಕ ಕೌಶಲವನ್ನಾದರೂ ಹೊಂದಿದ್ದರೆ ಖಾಸಗಿ ರಂಗದಲ್ಲಿ ಉದ್ಯೋಗಬೇಟೆ ನಡೆಸಬಹುದು. ಸರ್ಕಾರಗಳು ಈ ನಿಟ್ಟಿನಲ್ಲಿ ಆಸಕ್ತಿ ತೋರುವುದು ಸ್ವಾಗತಾರ್ಹ.

Leave a Reply

Your email address will not be published. Required fields are marked *

five × one =

Back To Top