Friday, 19th October 2018  

Vijayavani

ಮೈಸೂರು ರಾಜವಂಶದಲ್ಲಿ ಒಂದೇ ದಿನ ಎರಡು ಸಾವು-ಪ್ರಮೋದಾದೇವಿ ನಾದಿನಿ ವಿಧಿವಶ        ವಿಲನ್ ಚಿತ್ರದಲ್ಲಿ ಶಿವಣ್ಣರನ್ನ ಕಡೆಗಣನೆ ಎಂದು ಆಕ್ರೋಶ - ಥಿಯೆಟರ್‌ ಮುಂದೆ ಅಭಿಮಾನಿಗಳ ಪ್ರತಿಭಟನೆ        ಒಕ್ಕಲಿಗರ ಸಂಘದಲ್ಲಿ ಮೂಗು ತೂರಿಸಲ್ಲ - ಜಾತಿ, ಧರ್ಮದಲ್ಲಿ ಹಸ್ತಕ್ಷೇಪ ಮಾಡಲ್ಲ - ಎಕ್ಸ್‌ಕ್ಲೂಸಿವ್‌ ಸಂದರ್ಶನದಲ್ಲಿ ಡಿಕೆಶಿ ಮಾತು        ಅದ್ದೂರಿ ಜಂಬೂ ಸವಾರಿ - ಅಂಬಾರಿ ಹೊತ್ತು ಅರ್ಜುನ ಗಾಂಭೀರ್ಯ ನಡಿಗೆ - ಬನ್ನಿಮಂಟಪದತ್ತ ವಿಜಯದಶಮಿ ಮೆರವಣೆಗೆ        ದಸರಾ ಮೆರವಣಿಗೆಯಲ್ಲಿ ನಾಡಿನ ಶ್ರೀಮಂತ ಕಲೆ ಅನಾವರಣ - ಗಮನ ಸೆಳೆದ ವಿವಿಧ ಜಿಲ್ಲೆಗಳ ಸ್ತಬ್ಧಚಿತ್ರಗಳ ಚಿತ್ರಣ        ದೆಹಲಿಯಲ್ಲಿ ವಿಜಯದಶಮಿ ಸಂಭ್ರಮ-ರಾಮಲೀಲ ಮೈದಾನದಲ್ಲಿ ರಾವಣನ ಸಂಹಾರ - ಕಾರ್ಯಕ್ರಮದಲ್ಲಿ ರಾಷ್ಟ್ರಪತಿ, ಪ್ರಧಾನಿ ಭಾಗಿ       
Breaking News

ಸ್ಮರಣಶಕ್ತಿ ಗೆದ್ದ ವೈದೃತಿ

Saturday, 08.07.2017, 3:00 AM       No Comments

| ಶಿವಾನಂದ ಹಿರೇಮಠ ಗದಗ

ಇವಳಿಗಿನ್ನೂ ನಾಲ್ಕು ವರ್ಷ ವಯಸ್ಸು. ಚೆಂದದ ಚೆಲುವು, ಚಿಟಪಟ ಮಾತು, ಚಾಲಾಕಿ ಬುದ್ಧಿ ಒಲಿದಿದೆ. ಇವಳ ಸ್ಮರಣಶಕ್ತಿಯನ್ನು ಕಂಡವರು ಒಂದು ಕ್ಷಣ ಬೆರಗಾಗುತ್ತಾರೆ. ಅಂದಹಾಗೆ ಈ ಪುಟಾಣಿ ಹೆಸರು ವೈದೃತಿ ಕೋರಿಶೆಟ್ಟರ.

ವೈದೃತಿ ಅಂದರೆ ‘ಜಗತ್ತನ್ನೇ ಗೆದ್ದವಳು’ ಎಂದರ್ಥ. ಕೇಳಿದ ಪ್ರಶ್ನೆಗೆ ಪಟಪಟನೆ ಉತ್ತರಿಸುವ ಇವಳು ಈಗ ಗದಗ ಜಿಲ್ಲೆಯಲ್ಲಿ ಹೆಸರುವಾಸಿಯಾಗಿದ್ದಾಳೆ. ರಾಜಕೀಯ, ಅರ್ಥಶಾಸ್ತ್ರ, ಇತಿಹಾಸ, ಕನ್ನಡ ಸೇರಿ ಪ್ರಾದೇಶಿಕ, ರಾಷ್ಟ್ರೀಯ ಹಾಗೂ ಅಂತಾರಾಷ್ಟ್ರೀಯ ವಿಷಯಕ್ಕೆ ಸಂಬಂಧಿಸಿದ ಸಾವಿರಕ್ಕೂ ಹೆಚ್ಚು ಪ್ರಶ್ನೆಗಳಿಗೆ ಸಲೀಸಾಗಿ ಉತ್ತರಿಸುತ್ತಾಳೆ.

ಕನ್ನಡದ ಮೊದಲ ಪತ್ರಿಕೆ, ವಿಆರ್​ಎಲ್ ಸಮೂಹ ಸಂಸ್ಥೆ ಅಧ್ಯಕ್ಷರು, ಸಚಿವ ಸಂಪುಟ ಸಚಿವರ ಹೆಸರು, ರಾಷ್ಟ್ರೀಯ ಪಕ್ಷಿ, ಪ್ರಾಣಿ, ಅಂತಾರಾಷ್ಟ್ರೀಯ ಕೋರ್ಟ್, ಕದಂಬರ, ರಾಷ್ಟ್ರಕೂಟ ಸೇರಿ ಇತರೆ ರಾಜ ಮನೆತನಗಳ ರಾಜಧಾನಿ, ನಿಂಬೆ ಹಣ್ಣಿನಲ್ಲಿರುವ ವಿಟಮಿನ್, ದೇಶದ ಅತಿದೊಡ್ಡ ಮಸೀದಿ, ಸಂಪೂರ್ಣ ಸಾಕ್ಷರತೆ ಸಾಧಿಸಿದ ರಾಜ್ಯ, ಕವಿಗಳ ಹೆಸರು… ಅಬ್ಬಬ್ಬಾ ಒಂದಾ ಎರಡಾ… ಇಂತಹ ಸಾವಿರಕ್ಕೂ ಹೆಚ್ಚು ಪ್ರಶ್ನೆಗಳಿಗೆ ಉತ್ತರಿಸುವ ಈಕೆ ಗದಗ ಜಿಲ್ಲೆಯ ಸೆಲೆಬ್ರಿಟಿಯಾಗಿದ್ದಾಳೆ.

ಅರಳು ಹುರಿದಂತೆ ಮಾತನಾಡುವ ವೈದೃತಿ ಮೂಲತಃ ಬಳ್ಳಾರಿ ಜಿಲ್ಲೆ ಹಗರಿಬೊಮ್ಮನಹಳ್ಳಿಯವಳು. ವೈದೃತಿ ತಾಯಿ ಭಾರತಿ ನರಗುಂದದಲ್ಲಿ ಸರ್ಕಾರಿ ಇಲಾಖೆಯೊಂದರ ಉದ್ಯೋಗಿ, ತಂದೆ ನಾಗರಾಜ ನರಗುಂದದಲ್ಲಿ ಖಾಸಗಿ ವೃತ್ತಿಯಲ್ಲಿದ್ದಾರೆ. ಸದ್ಯ ಈ ಕುಟುಂಬ ನರಗುಂದದಲ್ಲಿ ನೆಲೆಸಿದೆ.

ಪ್ರತಿಭೆ ಅನಾವರಣಕ್ಕೆ ವೇದಿಕೆ

ವೈದೃತಿ ಒಂದೂವರೆ ವರ್ಷದವಳಿದ್ದಾಗ ವಿವಿಧ ವಿಷಯಗಳಿಗೆ ಸಂಬಂಧಿಸಿದ ಮುನ್ನೂರಕ್ಕೂ ಹೆಚ್ಚು ಪದಗಳನ್ನು ಹೇಳುತ್ತಿದ್ದಳಂತೆ. ಇವಳ ಜ್ಞಾಪಕ ಶಕ್ತಿ ಅರಿತ ಪಾಲಕರು ದಿನನಿತ್ಯ ಪ್ರಶ್ನೆಗಳನ್ನು ಮತ್ತು ಅವುಗಳಿಗೆ ಉತ್ತರಗಳನ್ನು ಕಂಠಪಾಠ ಮಾಡಿಸುತ್ತ ಬಂದಿದ್ದಾರೆ. ಒಂದೇ ಬಾರಿ ಹೇಳಿದರೆ ಸಾಕು ಅಚ್ಚು ಹೊಡೆದಂತೆ ನೆನಪಿನಲ್ಲಿಟ್ಟುಕೊಳ್ಳುವ ವೈದೃತಿ ಸ್ಥಳೀಯರ ಅಚ್ಚುಮೆಚ್ಚು. ಗದಗ ಜಿಲ್ಲೆಯ ಅನೇಕ ಕಾರ್ಯಕ್ರಮಗಳಲ್ಲಿ ಇವಳ ಪ್ರತಿಭೆ ಅನಾವರಣಗೊಳ್ಳುತ್ತಿದೆ. ಸಂಘ-ಸಂಸ್ಥೆಗಳ, ಜಾತ್ರಾ ಮಹೋತ್ಸವ, ಶಾಲಾ ಕಾಲೇಜು ಕಾರ್ಯಕ್ರಮ ಸೇರಿ ಹಲವು ಕಾರ್ಯಕ್ರಮಗಳಲ್ಲಿ ವೈದೃತಿ ಪ್ರತಿಭೆಗೆ ವೇದಿಕೆ ನಿರ್ವಿುಸಿಕೊಡಲಾಗುತ್ತಿದ್ದು, ದಾನಿಗಳು ಪ್ರೋತ್ಸಾಹಧನ ನೀಡುತ್ತಿದ್ದಾರೆ. ವೇದಿಕೆ ಮೇಲೆ ಸಾವಿರಾರು ಜನರ ಎದುರು ಯಾವುದೇ ಆತಂಕವಿಲ್ಲದೆ ಮಾತನಾಡುವ ಆತ್ಮವಿಶ್ವಾಸ ಕೂಡ ಈ ಬಾಲಕಿಯಲ್ಲಿದೆ. ಪುಟ್ಟ ಬಾಲಕಿಯ ಪ್ರತಿಭೆಗೆ ಮೆಚ್ಚಿ ಹಲವು ಸಂಘ-ಸಂಸ್ಥೆಗಳು ಸನ್ಮಾನಿಸಿವೆ.

ವೈದೃತಿ ಒಂದೂವರೆ ವರ್ಷದವಳಿದ್ದಾಗಲೇ ಅವಳ ಸ್ಮರಣಶಕ್ತಿ ಅರಿತೆವು. ಆಗಿನಿಂದಲೇ ತರಬೇತಿ ನೀಡಲಾಗುತ್ತಿದ್ದು, ಯುಪಿಎಸ್ಸಿ ಪರೀಕ್ಷೆ ತೇರ್ಗಡೆ ಹೊಂದುವ ರೀತಿಯಲ್ಲಿ ಅವಳನ್ನು ಸಿದ್ಧಗೊಳಿಸಬೇಕು ಎಂದು ನಿರ್ಧರಿಸಿದ್ದೇವೆ.

| ನಾಗರಾಜ ಕೋರಿಶೆಟ್ಟರ, ವೈದೃತಿ ತಂದೆ

ಸಾಧಕರಿಗೊಂದು ವೇದಿಕೆ

ನಿಮ್ಮನೆ, ನಿಮ್ಮೂರಲ್ಲೂ ಅಸಾಮಾನ್ಯ ಪ್ರತಿಭೆಗಳಿದ್ದರೆ ನಮಗೆ ಮಾಹಿತಿ ನೀಡಿ. ವಿಜಯವಾಣಿ ಪುಟಾಣಿ ಪುರವಣಿಯಲ್ಲಿ ಪ್ರಕಟಿಸುತ್ತೇವೆ. ನೆನಪಿರಲಿ ಪುಟಾಣಿ ವಯಸ್ಸು 12 ವರ್ಷ ಮೀರಿರಬಾರದು.

ಸಂಪಾದಕರು, ಭಲೇ ಪುಟಾಣಿ ವಿಭಾಗ ಪುಟಾಣಿ ಪುರವಣಿ, ವಿಜಯವಾಣಿ, ನಂ.24, ಸಾಯಿರಾಂ ಟವರ್ಸ್, 5ನೇ ಮುಖ್ಯರಸ್ತೆ, ಚಾಮರಾಜಪೇಟೆ, ಬೆಂಗಳೂರು-18. ಇ-ಮೇಲ್ ವಿಳಾಸ: [email protected]

 

Leave a Reply

Your email address will not be published. Required fields are marked *

Back To Top