Saturday, 16th December 2017  

Vijayavani

1. ಭಯೋತ್ಪಾದನೆಗೆ ಒತ್ತಡ ಆರೋಪ ವಿಚಾರ- ಆತ್ಮಹತ್ಯೆಗೆ ಯತ್ನಿಸಿದ ಯುವಕನ ಸ್ಥಿತಿ ಗಂಭೀರ- ಬಾಗಲಕೋಟೆ ಆಸ್ಪತ್ರೆಯಲ್ಲಿ ಮುಂದುವರಿದ ಚಿಕಿತ್ಸೆ 2. ಎಐಸಿಸಿ ಅಧ್ಯಕ್ಷರಾಗಿ ಇಂದು ರಾಹುಲ್​​​ ಅಧಿಕಾರ- ದೆಹಲಿ ಕಚೇರಿಯಲ್ಲಿ ಪದಗ್ರಹಣ ಕಾರ್ಯಕ್ರಮ- ರಾಹುಲ್​​​​ ಮುಂದಿದೆ ನೂರಾರು ಸವಾಲು 3. ಸುನಿಲ್​​ ಹೆಗ್ಗರವಳ್ಳಿ ಕೊಲೆಗೆ ಸುಪಾರಿ ಪ್ರಕರಣ- ಇಂದು ಬೆಳಗೆರೆ ಜಾಮೀನು ಅರ್ಜಿ ವಿಚಾರಣೆ- ಇತ್ತ ಜಯದೇವದಲ್ಲಿ ಮುಂದುವರಿದ ಚಿಕಿತ್ಸೆ 4. ಕಲಬುರಗಿಯತ್ತ ಸಾಗಿದ ಸಿಎಂ ಸಾಧನ ಸಂಭ್ರಮ- ಜೇವರ್ಗಿಯಲ್ಲಿ ಹಲವು ಕಾಮಗಾರಿಗೆ ಚಾಲನೆ- ಸಿಎಂಗೆ ಹಲವು ಸಚಿವರಿಂದ ಸಾಥ್​​​ 5. ಸನ್ನಿ ನೈಟ್​​ಗೆ ಸರ್ಕಾರದ ಬ್ರೇಕ್​- ನಿರ್ಧಾರದ ವಿರುದ್ಧ ಪರ-ವಿರುದ್ಧ ಚರ್ಚೆ- ಸಚಿವರ ಕ್ರಮಕ್ಕೆ ಕೆಂಡಕಾರಿದ ಅಭಿಮಾನಿಗಳು
Breaking News :

ಸಕಾಲಿಕ ಕ್ರಮ

Tuesday, 03.10.2017, 3:00 AM       No Comments

ದೇಶದ ತೆರಿಗೆ ವ್ಯವಸ್ಥೆಯಲ್ಲಿ ಕ್ರಾಂತಿಕಾರಕ ಬದಲಾವಣೆ ತರಲಿದೆ ಎಂದು ಪರಿಭಾವಿಸಲಾಗಿರುವ ಸರಕು ಮತ್ತು ಸೇವಾ ತೆರಿಗೆ (ಜಿಎಸ್​ಟಿ) ಪದ್ಧತಿ ಜಾರಿಯಾಗಿ ಸಾಕಷ್ಟು ದಿನಗಳಾಗಿವೆ. ಸುದೀರ್ಘ ಕಾಲಾವಧಿವರೆಗೆ ಚಿಂತನ-ಮಂಥನದ ತರುವಾಯ ಜಾರಿಯಾಗಿರುವ ಮತ್ತು ಅರ್ಥಿಕ ಸುಧಾರಣೆಯ ನಿಟ್ಟಿನಲ್ಲಿ ಮಹತ್ವದ ಮೈಲಿಗಲ್ಲು ಎಂಬ ಹೆಗ್ಗಳಿಕೆ ಹೊತ್ತಿರುವ ಜಿಎಸ್​ಟಿ ಕುರಿತು ಕೆಲವೊಂದು ವಲಯಗಳಿಂದ ಭಿನ್ನದನಿ ಅಥವಾ ಅಸಮಾಧಾನ ಹೊಮ್ಮಿರುವ ಹಿನ್ನೆಲೆಯಲ್ಲಿ ಕೇಂದ್ರ ವಿತ್ತ ಸಚಿವ ಅರುಣ್ ಜೇಟ್ಲಿ ಜಿಎಸ್​ಟಿ ದರ ಇಳಿಕೆಯ ಸೂಚನೆ ನೀಡಿದ್ದಾರೆ.

ಜಿಎಸ್​ಟಿ ಅನುಸಾರ ಪ್ರಸ್ತುತ ಶೇ. 5, 12, 18 ಮತ್ತು ಶೇ. 28ರಂತೆ ನಾಲ್ಕು ಸ್ತರಗಳ ತೆರಿಗೆ ವಿಂಗಡಣೆ

ಯಾದದ್ದೇನೋ ದಿಟ. ಆದರೆ ಕೆಲವೊಂದು ವ್ಯಾವಹಾರಿಕ ವಲಯಗಳು ಈ ಹೊಸ ತೆರಿಗೆ ಪದ್ಧತಿಯಿಂದ ಸೊರಗುತ್ತಿದ್ದು ವ್ಯತಿರಿಕ್ತ ಪರಿಣಾಮಕ್ಕೆ ಒಳಗಾಗಿವೆ ಎಂಬ ಕಳವಳ ವ್ಯಕ್ತವಾಯಿತು. ಜತೆಗೆ ತೆರಿಗೆ ಸಲ್ಲಿಕೆಯ ವಿಧಿ-ವಿಧಾನಗಳಲ್ಲೂ ಕೆಲವೊಂದು ತೊಡಕುಗಳು ಕಂಡುಬಂದಿರುವುದರಿಂದ ಈ ಸಮಗ್ರ ವ್ಯವಸ್ಥೆಯನ್ನು ಮತ್ತಷ್ಟು ಪರಿಷ್ಕರಿಸಬೇಕಾದ ಹಾಗೂ ನ್ಯೂನತೆ-ರಹಿತವಾಗಿಸಬೇಕಾದ ಅಗತ್ಯದ ಕುರಿತೂ ಮಾತುಗಳು ಕೇಳಿಬಂದವೆನ್ನಬೇಕು. ಜಿಎಸ್​ಟಿ ಜಾರಿಯಾಗಿ ಮೂರು ತಿಂಗಳಷ್ಟೇ ಸಂದಿವೆ. ಆದ್ದರಿಂದ ಇದರ ಸಾಧಕ-ಬಾಧಕಗಳ ಕುರಿತಾಗಿ ‘ಇದಮಿತ್ಥಂ’ ಎಂಬ ತೀರ್ವನಕ್ಕೆ ಈಗಲೇ ಬರಲಾಗದು. ಯಾವುದೇ ವ್ಯವಸ್ಥೆ ಹೊಸದಾಗಿ ಜಾರಿಯಾದಾಗ ಇಂಥ ತೊಡಕುಗಳು ಸಹಜ; ಆದರೆ ಈ ಸಂಬಂಧವಾಗಿ ಸೂಕ್ತ ಹಿಮ್ಮಾಹಿತಿಗಳನ್ನು ಪಡೆದುಕೊಂಡು, ಸಮಸ್ಯೆಗಳನ್ನು ಅಥವಾ ತೊಡಕುಗಳನ್ನು ಕಾಲಕಾಲಕ್ಕೆ ನಿವಾರಿಸಿಕೊಂಡಲ್ಲಿ ದೂರಗಾಮಿ ಪ್ರಯೋಜನಗಳಿವೆ ಎಂಬುದನ್ನು ಅಲ್ಲಗಳೆಯಲಾಗದು. ಈ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರ ಜಿಎಸ್​ಟಿ ದರ ಇಳಿಕೆಗೆ ಚಿಂತನೆ ನಡೆಸಿರುವುದು ನಿಜಕ್ಕೂ ಸಕಾಲಿಕ ಮತ್ತು ಸೂಕ್ತ ಕ್ರಮ ಎನ್ನಲಡ್ಡಿಯಿಲ್ಲ. ಕಾರಣ, ಸಣ್ಣ ತೆರಿಗೆ ಪಾವತಿಸುವ ಜನಸಾಮಾನ್ಯರ ಹಿತದೃಷ್ಟಿ ಇದರ ಹಿಂದಡಗಿದೆ. ಈ ಮಾತಿಗೆ ಪುಷ್ಟಿ ನೀಡುವಂತೆ, ತೆರಿಗೆ ಪಾವತಿಸಲು ಅಶಕ್ತರಾದವರಿಂದ ಬಲವಂತವಾಗಿ ವಸೂಲಿ ಮಾಡುವ, ತನ್ಮೂಲಕ ಭಯಹುಟ್ಟಿಸುವ ಕ್ರಮಗಳು ಬೇಡ ಎಂಬ ಸಲಹೆಯನ್ನು ಜೇಟ್ಲಿಯವರು ಅಧಿಕಾರಿಗಳಿಗೆ ನೀಡಿರುವುದು ಶ್ಲಾಘನೀಯ ಎನ್ನಲಡ್ಡಿಯಿಲ್ಲ. ದೇಶದ ಸರ್ವಾಂಗೀಣ ಅಭಿವೃದ್ಧಿಯಾಗಬೇಕಾದರೆ, ವಿವಿಧ ಸೇವೆ, ಮಾರಾಟ-ಖರೀದಿ ವ್ಯವಹಾರಗಳಂಥ ಬಾಬತ್ತುಗಳಿಂದ ಸಂಗ್ರಹವಾಗುವ ತೆರಿಗೆಯೇ ಮೂಲಾಧಾರವಾಗುತ್ತದೆ. ಆದ್ದರಿಂದ ಅನ್ವಯವಾಗುವ ತೆರಿಗೆಯನ್ನು ಪಾವತಿಸಬೇಕಾದ್ದು ವ್ಯವಹಾರಸ್ಥರ ಮತ್ತು ಸಾರ್ವಜನಿಕರ ಆದ್ಯ ಕರ್ತವ್ಯವಾಗಬೇಕು. ಆದರೆ, ಶ್ರೀಮಂತರಂತೆ ನೇರತೆರಿಗೆಯ ವ್ಯಾಪ್ತಿಗೆ ಬರದ ದುರ್ಬಲ ವರ್ಗದವರು ಮತ್ತು ಜನಸಾಮಾನ್ಯರು ಪರೋಕ್ಷ ತೆರಿಗೆಯ ಭಾರವನ್ನೂ ಹೊರಬೇಕಾಗಿ ಬರುವುದರಿಂದ ದೈನಂದಿನ ಬದುಕೇ ದುಸ್ತರ ಎನ್ನುವಂಥ ಸನ್ನಿವೇಶ ನಿರ್ವಣವಾಗಬಹುದು. ಆದ್ದರಿಂದ ಶ್ರೀಸಾಮಾನ್ಯರು ಹೆಚ್ಚಾಗಿ ಬಳಸುವ ವಸ್ತು/ಸಾಮಗ್ರಿಗಳ ತೆರಿಗೆ ದರವನ್ನು ಕಡಿತಗೊಳಿಸುವುದು ಸ್ವಾಗತಾರ್ಹ ಕ್ರಮವಾಗುತ್ತದೆ ಎಂಬುದರಲ್ಲಿ ಎರಡು ಮಾತಿಲ್ಲ. ಇಂಥ ಉಪಕ್ರಮ ಮಾತ್ರವಲ್ಲದೆ, ಜಿಎಸ್​ಟಿ ಪದ್ಧತಿಯ ಸಮಗ್ರ ಪರಿಶೀಲನೆ ಹಾಗೂ ಇನ್ನೂ ಉಳಿದಿರಬಹುದಾದ ಕುಂದುಕೊರತೆಗಳ ನಿವಾರಣೆಯ ನಿಟ್ಟಿನಲ್ಲೂ ಸರ್ಕಾರ ಆದ್ಯ ಗಮನ ಹರಿಸುವಂತಾಗಲಿ.

Leave a Reply

Your email address will not be published. Required fields are marked *

Back To Top