Monday, 22nd October 2018  

Vijayavani

ರಾಮನಗರ ಅಖಾಡ ಜಯಿಸಲು ರಣತಂತ್ರ - ದೋಸ್ತಿಗಳ ಮಿಡ್​​​ನೈಟ್​​​ ಮೀಟಿಂಗ್​ - ಸಿಎಂ ಎಚ್​ಡಿಕೆ, ಡಿಕೆಶಿ ನೇತೃತ್ವದಲ್ಲಿ ರಣತಂತ್ರ        ಮಲೆನಾಡ ರಣಕಣದಲ್ಲಿ ಬಿಜೆಪಿ ಅಬ್ಬರ-ಮಧು ಬಂಗಾರಪ್ಪ ಪರ ದಿಗ್ಗಜರ ಪ್ರಚಾರ - ಮಂಡ್ಯದಲ್ಲಿ ಕೈಗೆ ತಲ್ಲಣ ತಂದಿಟ್ಟ ಪರಾಜಿತರು        ಗಣಿನಾಡಿನಲ್ಲಿಂದು ‘ಕೈ’ ದಿಗ್ಗಜರ ದಂಡು - ಸಿದ್ದು, ಡಿಕೆಶಿ, ಜಾರಕಿಹೊಳಿ ಬ್ರದರ್ಸ್​​​​​​ ಕ್ಯಾಂಪೇನ್​ - ಮಾತನಾಡ್ತಾರಾ ನಾಯಕರು..?        ಆದೇಶವಿದ್ರೂ ಮುಚ್ಚಲಿಲ್ಲ ಘಟಕಗಳು - ಹೈಕೋರ್ಟ್​​​​ ಆದೇಶ ಮೀರಿ ನಡೆಯುತ್ತಿವೆ  ಶುದ್ಧ ನೀರಿನ ಘಟಕದ ಹೆಸರಲ್ಲಿ ದಂಧೆ        ವಾಣಿವಿಲಾಸ್​ ಆಸ್ಪತ್ರೆಯಲ್ಲಿ ಲೇಡಿ ಡಾನ್ಸ್​ - ಹಣ ಕೊಟ್ರೆ ಮಾತ್ರ ಒಳಗೆ ಪರ್ಮಿಷನ್​ - ಲಂಚ ಕೊಡದಿದ್ರೆ ಇಲ್ಲಿ ಏನೂ ನಡಿಯಲ್ಲ..!        20 ಜನರ ಉಳಿಸಿ, ಜೀವ ತೊರೆದ ಯೋಧ - ಹುತಾತ್ಮ ಉಮೇಶ್​ ದೇಹ ಇಂದು ರಾಜ್ಯಕ್ಕೆ - ಗೋಕಾಕ್​ ಪಟ್ಟಣದಲ್ಲಿ ಅಂತ್ಯಕ್ರಿಯೆ       
Breaking News

ಸಕಾರಾತ್ಮಕ ಬೆಳವಣಿಗೆ

Saturday, 16.12.2017, 3:02 AM       No Comments

ಮುಸ್ಲಿಂ ಸಮುದಾಯದಲ್ಲಿ ಆಚರಣೆಯಲ್ಲಿರುವ ‘ತ್ರಿವಳಿ ತಲಾಕ್’ ಪದ್ಧತಿಯನ್ನು ಅಂತ್ಯಗೊಳಿಸುವ ನಿಟ್ಟಿನಲ್ಲಿ ಮುಸ್ಲಿಂ ಮಹಿಳಾ (ವೈವಾಹಿಕ ಹಕ್ಕುಗಳ ರಕ್ಷಣೆ) ಕರಡು ಮಸೂದೆಗೆ ಕೇಂದ್ರ ಸಚಿವ ಸಂಪುಟ ಸಭೆಯಲ್ಲಿ ಅನುಮೋದನೆ ನೀಡಲಾಗಿದ್ದು, ಈ ಬಾರಿಯ ಅಧಿವೇಶನದಲ್ಲಿ ಅದು ಮಂಡನೆಯಾಗಲಿದೆ. ಮೌಖಿಕ, ಲಿಖಿತ ಮತ್ತು ಯಾವುದೇ ಇಲೆಕ್ಟ್ರಾನಿಕ್ ಮಾಧ್ಯಮಗಳ ಮೂಲಕ ನೀಡುವ ತಲಾಕ್ ಅಸಾಂವಿಧಾನಿಕ ಹಾಗೂ ತಲಾಕ್ ನೀಡಿದ ಪತಿಯನ್ನು ಅಪರಾಧಿ ಎಂದು ಪರಿಗಣಿಸುವಿಕೆ, ಆತನ ವಿರುದ್ಧ ಜಾಮೀನುರಹಿತ ವಾರಂಟ್ ಜಾರಿ, ಅಪರಾಧ ಸಾಬೀತಾದರೆ ಆತನಿಗೆ ಮೂರು ವರ್ಷ ಜೈಲುಶಿಕ್ಷೆ ಇವೇ ಮೊದಲಾದ ಮಹತ್ವದ ಅಂಶಗಳು ಸದರಿ ಕರಡು ಮಸೂದೆಯಲ್ಲಿ ಅಂತರ್ಗತವಾಗಿವೆ. ಎನ್​ಡಿಎ ಒಕ್ಕೂಟಕ್ಕೆ ಲೋಕಸಭೆಯಲ್ಲಿ ಸಾಕಷ್ಟು ಬಲವಿರುವುದರಿಂದ ಇದು ಅನುಮೋದನೆಗೊಳ್ಳುವುದರಲ್ಲಿ ಸಂದೇಹವೇನೂ ಇಲ್ಲ. ಆದರೆ ರಾಜ್ಯಸಭೆಯಲ್ಲಿ ಇದಕ್ಕೆ ದಕ್ಕುವ ಪ್ರತಿಕ್ರಿಯೆ ಎಂಥದ್ದು ಎಂಬುದು ಸದ್ಯಕ್ಕೆ ಕುತೂಹಲ ಹುಟ್ಟಿಸಿರುವ ಸಂಗತಿ.

ತಮ್ಮ ಪಾಲಿಗೆ ಬೇಗುದಿಯಾಗಿ ಪರಿಣಮಿಸಿರುವ ತ್ರಿವಳಿ ತಲಾಕ್ ಪದ್ಧತಿ ರದ್ದಾಗಬೇಕು ಎಂಬುದು ದಶಕಗಳಿಂದಲೂ ಮುಸ್ಲಿಂ ಸಮುದಾಯದ ಮಹಿಳೆಯರ ಆಶಯವಾಗಿತ್ತು ಎನ್ನಬೇಕು. ಆದರೆ, ಈ ಆಶಯದ ಮಂಡನೆಗೆ ಸಮರ್ಥ ವೇದಿಕೆ ಮತ್ತು ಸಂದರ್ಭ ದಕ್ಕದೆ ಅದು ಕ್ಷೀಣದನಿಯೇ ಆಗಿ ಉಳಿದುಬಿಟ್ಟಿತ್ತು. ಆದರೆ ತ್ರಿವಳಿ ತಲಾಕ್ ಸಂವಿಧಾನಬಾಹಿರ ಹಾಗೂ ಕ್ರೌರ್ಯದ ನಡೆ ಎಂದು ಅಭಿಪ್ರಾಯಪಟ್ಟ ಅಲಹಾಬಾದ್ ಹೈಕೋರ್ಟ್, ಮುಸ್ಲಿಂ ಮಹಿಳೆಯರ ಸಂಕಟ-ಸಂಕಷ್ಟ ತಪ್ಪಿಸುವ ನಿಟ್ಟಿನಲ್ಲಿ ಮುಸ್ಲಿಂ ವೈಯಕ್ತಿಕ ಕಾನೂನಿಗೆ ತಿದ್ದುಪಡಿ ಮಾಡಬಹುದೇ ಎಂಬುದನ್ನು ಪರಿಶೀಲಿಸಬೇಕಿದೆ ಎಂದು ಕಳೆದ ಡಿಸೆಂಬರ್​ನಲ್ಲಿ ಸ್ಪಷ್ಟ ಅಭಿಪ್ರಾಯ ವ್ಯಕ್ತಪಡಿಸಿದಾಗ, ತ್ರಿವಳಿ ತಲಾಕ್ ಪದ್ಧತಿ ರದ್ದಾಗಬೇಕು ಎಂಬ ಮುಸ್ಲಿಂ ಮಹಿಳಾ ಸಂಘಟನೆಗಳ ಬೇಡಿಕೆಗೆ ಒಂದಷ್ಟು ಬಲ ದಕ್ಕಿದಂತಾಯಿತು ಎನ್ನಬೇಕು. ಜತೆಗೆ, ಕಳೆದ ಆಗಸ್ಟ್​ನಲ್ಲಿ ತೀರ್ಪು ಪ್ರಕಟಿಸಿದ್ದ ಸವೋಚ್ಚ ನ್ಯಾಯಾಲಯದ ಪಂಚಸದಸ್ಯ ಪೀಠ, ಮುಸ್ಲಿಂ ಪುರುಷರು ತತ್​ಕ್ಷಣ ಮೂರುಬಾರಿ ತಲಾಕ್ ಎಂದು ಹೇಳಿ ನೀಡುವ ವಿಚ್ಛೇದನ ಅಸಾಂವಿಧಾನಿಕ ಎಂದು ಹೇಳಿದ್ದರ ಜತೆಗೆ, ಆರು ತಿಂಗಳೊಳಗಾಗಿ ತ್ರಿವಳಿ ತಲಾಕ್ ನಿಷೇಧದ ಕಾಯ್ದೆ ಜಾರಿಗೆ ತರುವಂತೆ ಕೇಂದ್ರ ಸರ್ಕಾರಕ್ಕೆ ನಿರ್ದೇಶನ ನೀಡಿತ್ತು ಎಂಬುದಿಲ್ಲಿ ಸ್ಮರಣಾರ್ಹ.

ಒಟ್ಟಿನಲ್ಲಿ ಈ ಪದ್ಧತಿಯ ರದ್ದತಿಗೆ ಅಗತ್ಯವಾದ ಪೂರ್ವಭಾವಿ ಭೂಮಿಕೆಯೇನೋ ಸಿದ್ಧವಾಗಿದೆ. ಇಲ್ಲಿ ಮತ್ತೊಂದು ಸೂಕ್ಷ್ಮವನ್ನೂ ಗಮನಿಸಬೇಕು. ನ್ಯಾಯಾಲಯದ ಸ್ಪಷ್ಟ ನಿರ್ದೇಶನವಿಲ್ಲದೆ ಈ ವಿಷಯವನ್ನು ಸರ್ಕಾರ ಕೈಗೆತ್ತಿಕೊಂಡಿದ್ದಿದ್ದರೆ ಅದಕ್ಕೆ ರಾಜಕೀಯ ಲೇಪ ದಕ್ಕಿಬಿಡುತ್ತಿತ್ತು ಮತ್ತು ರಾಜಕೀಯ ಹಿತಾಸಕ್ತಿಗಳ ಕಾರಣದಿಂದಾಗಿ ಕಾಯ್ದೆ-ಕಾನೂನಿನ ರೂಪಣೆ ಹಾಗೂ ಅನುಷ್ಠಾನದ ಹಾದಿ ಅಂದುಕೊಂಡಷ್ಟು ಸುಲಭವಾಗುತ್ತಿರಲಿಲ್ಲ. ಆದರೆ, ನ್ಯಾಯಾಲಯದ ಅಂಗಳದಿಂದಲೇ ಸ್ಪಷ್ಟ ನಿರ್ದೇಶನ ಬಂದಿರುವುದರಿಂದ ಸದರಿ ಕರಡು ಮಸೂದೆಗೆ ಹಸಿರು ನಿಶಾನೆ ದಕ್ಕುವುದು ನಿಶ್ಚಿತ ಎಂಬುದು ರಾಜಕೀಯ ತಜ್ಞರ ಅಭಿಮತ.

ಆದರೆ, ಈ ಕರಡು ಮಸೂದೆ ವಿರುದ್ಧ ಕೆಲ ಮುಸ್ಲಿಂ ಸಂಘಟನೆಗಳು ಕಿಡಿಕಾರಿರುವುದು ಮತ್ತು ಇದು ಸಮುದಾಯದ ಹಕ್ಕುಗಳನ್ನು ಕಸಿಯುವ ಯತ್ನ ಎಂದು ಅಭಿಪ್ರಾಯಪಟ್ಟಿರುವುದು ಸರ್ವಥಾ ಸಮರ್ಥನೀಯವಲ್ಲ. ಇದು ಆ ಸಮುದಾಯದ ಮಹಿಳೆಯರಿಗಾಗುತ್ತಿರುವ ಅನ್ಯಾಯವನ್ನು ತಡೆಗಟ್ಟುವ, ತನ್ಮೂಲಕ ಆರೋಗ್ಯಕರ ಮತ್ತು ಸಮಾನಹಕ್ಕುಗಳ ಸಮಾಜವೊಂದನ್ನು ಕಟ್ಟುವ ಯತ್ನವೇ ಹೊರತು, ಇದು ಏಕಪಕ್ಷೀಯವೂ ಅಲ್ಲ ಅಥವಾ ಸಮುದಾಯವೊಂದನ್ನು ದಮನಿಸಲು ರೂಪಿಸಿರುವ ಕುತಂತ್ರವೂ ಅಲ್ಲ ಎಂಬುದನ್ನು ಇಂಥವರು ಅರಿಯಬೇಕು.

 

Leave a Reply

Your email address will not be published. Required fields are marked *

Back To Top