Friday, 20th October 2017  

Vijayavani

1. ಲಿಂಗಾಯತ ಪ್ರತಿಪಾದಕರಾಗಿದ್ದಕ್ಕೆ ಕಲಬುರ್ಗಿ ಹತ್ಯೆ – ಲಿಂಗಾಯತ ವಿಚಾರ ಬರೆದಿದ್ದಕ್ಕೆ ಗೌರಿ ಲಂಕೇಶ್​ ಕೊಲೆ ಶಂಕೆ – ಬೆಂಗಳೂರಿನಲ್ಲಿ ಜಾಮದಾರ್​ ವಿವಾದಾತ್ಮಕ ಹೇಳಿಕೆ 2. ಬಿಜೆಪಿ ಬಿಟ್ಟು ಕಾಂಗ್ರೆಸ್​ ಸೇರಿದಕ್ಕೆ ಮಾರಣಾಂತಿಕ ಹಲ್ಲೆ – ಮಾಜಿ ಕಾರ್ಪೊರೇಟರ್​ ರವೀಂದ್ರ ವಿರುದ್ಧ ಮಹಿಳೆ ಆರೋಪ – ಗಾಯಾಳುವಿಗೆ ಆಸ್ಪತ್ರೆಯಲ್ಲಿ ಚಿಕಿತ್ಸೆ 3. ಮಲೆ ಮಹದೇಶ್ವರ ಬೆಟ್ಟದಲ್ಲಿ ಮಹಾರಥೋತ್ಸವ – ರಥೋತ್ಸವದ ವೇಳೆ ನೂಕು ನುಗ್ಗಲು – ಭಕ್ತರ ನಿಯಂತ್ರಿಸಲು ಪೊಲೀಸರಿಂದ ಲಾಠಿ ಚಾರ್ಜ್ 4. ಹಾಲಿವುಡ್, ಬಾಲಿವುಡ್​ ಬೇರೆ ಅಲ್ಲ – ಎರಡೂ ಕಡೆ ಲೈಂಗಿಕ ಶೋಷಣೆ ಇದ್ದೆ ಇದೆ – ಸಂದರ್ಶನದಲ್ಲಿ ಸತ್ಯ ತೆರೆದಿಟ್ಟ ಪ್ರಿಯಾಂಕ ಚೋಪ್ರಾ 5. ದೀಪಾವಳಿಗೆ ಪ್ರಧಾನಿ ತಾಯಿ ಫುಲ್ ಖುಷ್​ – ರಾಮನ ಹಾಡಿಗೆ ಸಖತ್ ಸ್ಟೆಪ್ಸ್​ – 97ರ ಹರೆಯದಲ್ಲೂ ಹೀರಾಬೆನ್​ ಜೀವನ ಪ್ರೀತಿ
Breaking News :

ಗೃಹಸಾಲದ ಬಡ್ಡಿದರದ ಸುತ್ತ…

Wednesday, 27.09.2017, 3:00 AM       No Comments

|  ಸಿ.ಎಸ್.ಸುಧೀರ್

ಗೃಹಸಾಲವನ್ನು ಎಂಸಿಎಲ್​ಆರ್ ಪದ್ಧತಿಗೆ ಬದಲಾಯಿಸಿಕೊಳ್ಳಬೇಕೆ?

ಮೂಲದರ (ಬೇಸ್ ರೇಟ್) ಆಧರಿಸಿದ ಗೃಹಸಾಲವನ್ನು ನಿಮ್ಮ ಬ್ಯಾಂಕಿನ ಅಥವಾ ಮತ್ತಾವುದೇ ಸಾಲದಾತ ಸಂಸ್ಥೆಯ ಎಂಸಿಎಲ್​ಆರ್ (ಮಾರ್ಜಿನಲ್ ಕಾಸ್ಟ್ ಆಫ್ ಲೆಂಡಿಂಗ್ ರೇಟ್) ಪದ್ಧತಿಗೆ ಬದಲಾಯಿಸಿಕೊಳ್ಳುವುದು ಜಾಣನಿರ್ಧಾರವಾಗಬಲ್ಲದು. ಆದರೆ ಇಂಥ ನಿರ್ಧಾರವನ್ನು ಕೈಗೊಳ್ಳುವಾಗ, ಎರಡೂ ಆಯ್ಕೆಗಳಲ್ಲಿ ಹಾಲಿ ಇರುವ ಅಥವಾ ಅನ್ವಯವಾಗುವ ಬಡ್ಡಿದರ ಎಷ್ಟಿದೆ ಎಂಬುದನ್ನು ಮೊದಲು ಪರಿಗಣಿಸಬೇಕಾಗುತ್ತದೆ. ಆದ್ದರಿಂದ, ಇಂಥದೊಂದು ಬದಲಾವಣೆಗೆ ಮುಂದಾಗುವುದಕ್ಕೂ ಮುನ್ನ ಯಾವುದರಲ್ಲಿ ಬಡ್ಡಿದರ ಕಡಿಮೆಯಿದೆಯೋ ಅದಕ್ಕೆ ವರ್ಗಾಯಿಸುವುದರ ಕುರಿತು ಆಲೋಚಿಸಬೇಕಾಗುತ್ತದೆ. ಜತೆಜತೆಗೆ ಇಂಥ ವರ್ಗಾವಣೆಯ ಸಂದರ್ಭದಲ್ಲಿ ಅನ್ವಯವಾಗುವ ಇತರ ವೆಚ್ಚಗಳ (ಪ್ರೊಸೆಸಿಂಗ್ ಫೀ) ಕುರಿತಾಗಿಯೂ ಗಮನ ಹರಿಸಬೇಕಾಗುತ್ತದೆ. ಹೆಚ್ಚೂಕಡಿಮೆ ಕಳೆದ 1 ವರ್ಷದಿಂದೀಚೆಗೆ, ಬಡ್ಡಿದರ ಸಂಬಂಧಿತ ಎಂಸಿಎಲ್​ಆರ್ ಎಂಬ ಹೊಸ ಪದ್ಧತಿಯನ್ನು ಕಾರ್ಯರೂಪಕ್ಕೆ ತಂದಿರುವುದರಿಂದ ಗೃಹಸಾಲದ ದರ ನಿರಂತರವಾಗಿ ಕಡಿಮೆಯಾಗುತ್ತ ಬಂದಿದೆ. ಇದರ ಜತೆಗೆ, ಅಧಿಕ ಮುಖಬೆಲೆಯ ಹಳೆಯ ನೋಟುಗಳ ಅಮಾನ್ಯೀಕರಣವು ಇದಕ್ಕೆ ಮಹತ್ತರ ಕೊಡುಗೆ ನೀಡಿದೆ ಎನ್ನಲಡ್ಡಿಯಿಲ್ಲ. ಇದರ ಪರಿಣಾಮವಾಗಿ, ಸಾರ್ವಜನಿಕ ವಲಯ ಹಾಗೂ ಖಾಸಗಿ ವಲಯದ ಪ್ರಮುಖ ಬ್ಯಾಂಕುಗಳಲ್ಲಿ ಗೃಹಸಾಲದ ಬಡ್ಡಿದರಗಳು ಶೇ. 8.35ರಿಂದ ಶೇ. 8.8ರಷ್ಟು ಕಡಿಮೆ ಮಟ್ಟಕ್ಕೆ ಬಂದಿದೆ.

2016ರ ಏಪ್ರಿಲ್​ಗೂ ಮುನ್ನ ಗೃಹಸಾಲದ ಬಡ್ಡಿದರವನ್ನು ಮೂಲದರ (ಬೇಸ್​ರೇಟ್)ಪದ್ಧತಿಯಡಿ ನಿಗದಿ ಮಾಡಲಾಗುತ್ತಿತ್ತು. ಎಂಸಿಎಲ್​ಆರ್​ಗೆ ಹೋಲಿಸಿದಾಗ ಈ ಪದ್ಧತಿಯಲ್ಲಿ ವಿಧಿಸಲಾಗಿರುವ ದರವು ಸಾಕಷ್ಟು ಹೆಚ್ಚಿರುತ್ತದೆ. ಭಾರತದ ವಿವಿಧ ಬ್ಯಾಂಕುಗಳಲ್ಲಿ, ಗೃಹಸಾಲದ ಮೇಲೆ ಮೂಲದರ ಪದ್ಧತಿಯಡಿ ವಿಧಿಸಲಾಗುವ ಒಟ್ಟಾರೆ ಬಡ್ಡಿದರವು ಸುಮಾರು ಶೇ. 9.50ರಿಂದ ಶೇ. 10ರವರೆಗೆ ಇದೆ.

ಬದಲಾವಣೆಯ ಕುರಿತು ನಿರ್ಧರಿಸುವುದು ಹೇಗೆ?

ಮೂಲದರ ಪದ್ಧತಿಯಿಂದ ಎಂಸಿಎಲ್​ಆರ್ ಪದ್ಧತಿಗೆ ಬದಲಾಯಿಸಿಕೊಳ್ಳಲು, ವರ್ಗಾವಣೆ/ಬದಲಾವಣೆಗೆ ಸಂಬಂಧಿಸಿದ ಖರ್ಚುವೆಚ್ಚ ಹಾಗೂ ಅದರಿಂದಾಗುವ ಪ್ರಯೋಜನಗಳನ್ನು ವಿಶ್ಲೇಷಿಸಿ ನಿರ್ಧಾರ ತೆಗೆದುಕೊಳ್ಳಬೇಕು. ಖರ್ಚುವೆಚ್ಚದ ಕುರಿತು ಮಾತನಾಡುವುದಾದರೆ, ಒಂದೊಂದೂ ಬ್ಯಾಂಕಿನ ವೈಶಿಷ್ಟ್ಯ ಮತ್ತು ಸೇವಾವೈಖರಿಯನ್ನು ಅವಲಂಬಿಸಿ ಇದು ಸುಮಾರು 5,000 ರೂ.ನಿಂದ 20,000 ರೂ.ವರೆಗೆ ಇರಬಹುದು. ಆದ್ದರಿಂದ, ಮೂಲದರ ಪದ್ಧತಿಯಡಿ ಸಾಲವನ್ನು ಪಡೆದು ಕಾಲಾನುಕಾಲಕ್ಕೆ ನಿಗದಿತ ಬಡ್ಡಿಯನ್ನು ಪಾವತಿಸುತ್ತಿರುವವರು, ಇಂಥದೊಂದು ವರ್ಗಾವಣೆ/ಬದಲಾವಣೆಯು ಒಳಗೊಂಡಿರಬಹುದಾದ ಖರ್ಚುವೆಚ್ಚಗಳ ಕುರಿತಾಗಿ ಬ್ಯಾಂಕು/ಸಾಲದಾತ ಸಂಸ್ಥೆಯಲ್ಲಿ ವಿಚಾರಿಸಿ ತಿಳಿದುಕೊಳ್ಳಬೇಕಾಗುತ್ತದೆ. ಜತೆಗೆ ಬದಲಾವಣೆಗಿರುವ ಪ್ರಮುಖ ಕಾರಣ ಅಥವಾ ಅಂಶದ ಕುರಿತು, ಅಂದರೆ ಇಎಂಐ ಸ್ವರೂಪ ಹಾಗೂ ಎಂಎಇಎಲ್​ಆರ್ ಪದ್ಧತಿಗೆ ಸಾಲದ ವರ್ಗಾವಣೆ ಮಾಡುವುದರಿಂದಾಗುವ ಬಡ್ಡಿ ವೆಚ್ಚದ ಕುರಿತು ಕೂಲಂಕಷವಾಗಿ ಅರಿಯಬೇಕಾಗುತ್ತದೆ. ಈ ಕುರಿತಾದ ಮತ್ತಷ್ಟು ಮಾಹಿತಿಯನ್ನು ಮುಂದಿನ ಕಂತಿನಲ್ಲಿ ತಿಳಿದುಕೊಳ್ಳೋಣ.

(ಲೇಖಕರು IndianMoney.com ಸಂಸ್ಥಾಪಕರು ಮತ್ತು ಸಿಇಒ)

Leave a Reply

Your email address will not be published. Required fields are marked *

Back To Top