Tuesday, 20th February 2018  

Vijayavani

ಸದನದಲ್ಲಿ ಶಾಸಕರಿಲ್ಲದೆ ಬಣಬಣ - ಇಂದಿನ ಕಲಾಪಕ್ಕೆ ಬರೀ 22 ಮಂದಿ ಹಾಜರ್​ - ಬಜೆಟ್​ ಅಧಿವೇಶನವೂ 3 ದಿನ ಮೊಟಕು.        ಒಬ್ಬರಿಗಿಂತ ಮತ್ತೊಬ್ಬ ಖತರ್ನಾಕ್​​ - ಎಂಎಲ್​ಎ ಪುತ್ರನ ಟೀಂನಲ್ಲಿ 8 ಮಂದಿ - ಇದು ನಲಪಾಡ್​​​​​ ಗ್ಯಾಂಗ್​ನ ಕಂಪ್ಲೀಟ್​ ಕಹಾನಿ.        ವಿದ್ವತ್​ ಆರೋಗ್ಯದಲ್ಲಿ ಚೇತರಿಕೆ ಕಂಡಿದೆ - ಮೂಗಿನ ಮೂಳೆ‌ ಕಟ್​​​, ಮೂಖ ಊದಿಕೊಂಡಿದೆ - ಐಸಿಯುನಲ್ಲೇ ಚಿಕಿತ್ಸೆ ಅಂದ್ರು ಮಲ್ಯ ಆಸ್ಪತ್ರೆ ವೈದ್ಯರು.        ವಿದ್ವತ್​​​​​​​​​​ ಬಿಜೆಪಿ ಕಾರ್ಯಕರ್ತ ವಿಚಾರ - ವಿವಾದದ ಬಳಿಕ ತಪ್ಪು ಸರಿಪಡಿಸಿಕೊಂಡ ಬಿಜೆಪಿ - ಅವ್ರು ನಮ್ಮ ಕಾರ್ಯಕರ್ತನಲ್ಲ ಅಂತಾ ಅಮಿತ್ ಷಾ ಸ್ಪಷ್ಟನೆ.        ಚಿತ್ರದುರ್ಗದಲ್ಲಿ ಭೀಕರ ರಸ್ತೆ ಅಪಘಾತ - ಚಲಿಸುತ್ತಿದ್ದ ಲಾರಿಯ ಟಯರ್ ಸ್ಫೋಟ - ಇಬ್ಬರ ದುರ್ಮರಣ, ಲಾರಿ ಚಾಲಕನ ಸ್ಥಿತಿ ಗಂಭೀರ.       
Breaking News

ಗುಣಮಟ್ಟದ ಶಿಕ್ಷಣ ಸಿಗಲಿ

Wednesday, 17.01.2018, 3:03 AM       No Comments

ಜ್ಞಾನಾಧಾರಿತವಾದ ಈ ಯುಗದಲ್ಲಿ ಶಿಕ್ಷಣ ರಾಷ್ಟ್ರನಿರ್ವಣದಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ. ಆದ್ದರಿಂದ ಗ್ರಾಮೀಣ ಭಾರತದಲ್ಲಿ ಶೈಕ್ಷಣಿಕ ಸುಧಾರಣೆಗಳು ತೀವ್ರ ಪ್ರಮಾಣದಲ್ಲಿ ನಡೆಯಬೇಕು ಎಂಬ ಆಗ್ರಹ, ಜನಾಶಯ ಇದ್ದೇ ಇದೆ. ಕೇಂದ್ರ ಮತ್ತು ಆಯಾ ರಾಜ್ಯ ಸರ್ಕಾರಗಳು ಶಿಕ್ಷಣ ಕ್ಷೇತ್ರಕ್ಕೆ ಭರಪೂರ ಅನುದಾನ ಹರಿಸುತ್ತಿವೆ. ಪ್ರತಿ ವರ್ಷ ಆಯವ್ಯಯದಲ್ಲಿ ಈ ರಂಗಕ್ಕೆ ನೀಡಲಾಗುವ ಅನುದಾನ ಹೆಚ್ಚಿಸಲಾಗುತ್ತಿದೆ. ಇದು ಸರಿಯೇ. ಆದರೆ, ಇದರಿಂದ ನಿಜಕ್ಕೂ ಗುಣಮಟ್ಟದ ಶಿಕ್ಷಣ ಲಭ್ಯವಾಗುತ್ತಿದೆಯೇ? ಮಕ್ಕಳ ಕೌಶಲ ವಿಕಾಸವಾಗುತ್ತಿದೆಯೇ ಎಂದು ಗಮನಿಸಿದರೆ ಉತ್ತರ ನಿರಾಶಾದಾಯಕವಾಗಿದೆ. ಎಎಸ್​ಇಆರ್ (Annual Status of Education Report) ಮಂಗಳವಾರ ಬಿಡುಗಡೆ ಮಾಡಿರುವ ಸಮೀಕ್ಷಾ ವರದಿ ಈ ಕುರಿತಾದ ಚಿತ್ರಣವನ್ನು ತೆರೆದಿಟ್ಟಿದೆ.

ಗ್ರಾಮೀಣ ಭಾಗದ 14-16 ವಯೋಮಾನದ ಮಕ್ಕಳ ಪೈಕಿ ಶೇಕಡ 25 ಮಕ್ಕಳು ಮಾತೃಭಾಷೆಯಲ್ಲೇ ಸರಾಗವಾಗಿ ಓದಲು ಅಸಮರ್ಥರಾಗಿದ್ದರೆ ಶೇ.57 ಚಿಣ್ಣರು ಗಣಿತದ ಸಣ್ಣ ಲೆಕ್ಕವನ್ನು ಪರಿಹರಿಸಲೂ ತುಂಬ ಕಷ್ಟಪಡುತ್ತಾರೆ. ಶೇ.36 ಮಕ್ಕಳಿಗೆ ದೇಶದ ರಾಜಧಾನಿ ಹೆಸರು ಗೊತ್ತಿಲ್ಲ, ಶೇ.21 ಮಕ್ಕಳಿಗಂತೂ ತಾವು ಯಾವ ರಾಜ್ಯದಲ್ಲಿ ವಾಸಿಸುತ್ತಿದ್ದೇವೆ ಎಂಬುದರ ಅರಿವಿಲ್ಲ. ದೇಶದ 24 ರಾಜ್ಯಗಳ 28 ಜಿಲ್ಲೆಗಳ 1641 ಗ್ರಾಮಗಳಲ್ಲಿ ಈ ಸಮೀಕ್ಷೆ ನಡೆಸಲಾಗಿದೆ. ದುಡ್ಡನ್ನು ಎಣಿಸುವ, ಗಡಿಯಾರ ನೋಡಿ ಸಮಯ ಹೇಳುವ, ತೂಕವನ್ನು ಕಿಲೋಗ್ರಾಂಗಳಲ್ಲಿ ಹೇಳುವ ಸಣ್ಣ ಸಣ್ಣ ವಿಷಯಗಳಲ್ಲೂ ವಿದ್ಯಾರ್ಥಿಗಳು ವಿಫಲರಾಗಿದ್ದಾರೆ ಎಂಬುದು ಶೋಚನೀಯ ಸಂಗತಿ. ವಿಚಿತ್ರ ಎಂದರೆ ಮೊಬೈಲ್ ಬಳಕೆಯಲ್ಲಿ ಮುಂದಿರುವ ಈ ವಿದ್ಯಾರ್ಥಿಗಳು ಶೈಕ್ಷಣಿಕವಾಗಿ ಹಿಂದಿದ್ದಾರೆ.

ಈಗ ಸರ್ಕಾರಗಳು ಮಾತ್ರವಲ್ಲದೆ ಕಾಪೋರೇಟ್ ಸಂಸ್ಥೆಗಳು ಕೂಡ ಶೈಕ್ಷಣಿಕ ರಂಗದ ಅಭಿವೃದ್ಧಿಗೆ ಒತ್ತು ನೀಡುತ್ತಿವೆ. ಬಹುತೇಕ ಅನುದಾನ ಶಾಲಾ ಕಟ್ಟಡ, ಇತರೆ ಮೂಲಸೌಕರ್ಯ ಒದಗಿಸುವಿಕೆಯಲ್ಲಿ ವೆಚ್ಚವಾಗುತ್ತಿದೆ. ಈ ಸೌಲಭ್ಯಗಳು ಅಗತ್ಯ ಹೌದಾದರೂ ಶಿಕ್ಷಣದ ಗುಣಮಟ್ಟವೇ ಸುಧಾರಣೆ ಆಗದಿದ್ದರೆ ಏನು ಪ್ರಯೋಜನ? ಶಿಕ್ಷಣ ರಂಗದ ಸುಧಾರಣೆ ಎಂದರೆ ಕೇವಲ ಶಾಲಾ ಕಟ್ಟಡಗಳನ್ನು ಕಟ್ಟುವುದಾಗಲಿ ಅಥವಾ ‘ಇಷ್ಟು ಜನರನ್ನು ಶಾಲೆಗೆ ಸೇರಿಸಲಾಗಿದೆ’ ಎಂಬ ತಾಂತ್ರಿಕ ಮಾಹಿತಿಗಳಾಗಲಿ ಅಲ್ಲ. ವಿದ್ಯಾರ್ಥಿಗಳು ದೇಶದ ಭಾವಿಪ್ರಜೆಗಳು. ಕಲಿಕೆಯ ಮೂಲಕ ಜ್ಞಾನ ವೃದ್ಧಿಸಿಕೊಳ್ಳುವ, ಆ ಮೂಲಕ ವ್ಯಕ್ತಿತ್ವ ಕಟ್ಟಿಕೊಳ್ಳುವ ಸಮಯದಲ್ಲಿ ಇವರು ಹೆಸರಿಗಷ್ಟೇ ಶಿಕ್ಷಣ ಪಡೆಯುತ್ತಿದ್ದಾರೆ ವಿನಾ ಯಾವುದೇ ಕೌಶಲಗಳು ಬೆಳೆಯುತ್ತಿಲ್ಲ ಎಂಬ ವಾಸ್ತವವನ್ನು ಈ ಸಮೀಕ್ಷೆ ತೆರೆದಿಟ್ಟಿದೆ. ಗಣಿತ, ವಿಜ್ಞಾನ, ಇಂಗ್ಲಿಷ್ ವಿಷಯಗಳು ಹಳ್ಳಿ ಮಕ್ಕಳ ಪಾಲಿಗೆ ಕಬ್ಬಿಣದ ಕಡಲೆಯಾಗಿಯೇ ಉಳಿಯುತ್ತಿದ್ದು, ಮುಂದೆ ಇದು ಅವರ ವೃತ್ತಿಜೀವನದ ಮೇಲೂ ಪರಿಣಾಮ ಬೀರಿ ಇತರರೊಡನೆ ಸ್ಪರ್ಧಿಸಲು ಆಗದಂಥ ವಾತಾವರಣ ಸೃಷ್ಟಿಯಾಗಿದೆ. ಈ ಸ್ಥಿತಿ ಬದಲಾಗಬೇಕು. ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಶಿಕ್ಷಣದ ಗುಣಮಟ್ಟ ಹೆಚ್ಚಳಕ್ಕೆ ಪ್ರಮುಖ ಆದ್ಯತೆ ನೀಡಬೇಕು. ಆಗ ಮಾತ್ರ, ನಿಜವಾದ ಪರಿವರ್ತನೆ ಕಾಣಲು ಸಾಧ್ಯ.

Leave a Reply

Your email address will not be published. Required fields are marked *

Back To Top