Saturday, 20th October 2018  

Vijayavani

ಚೀಪ್ ಮೆಂಟಾಲಿಟಿ ನನಗಿಲ್ಲ - ಇದರ ಹಿಂದೆ ಕೈವಾಡ ಇರಬಹುದು - ನಟಿ ಶ್ರುತಿ ಹರಿಹರನ್ ಆರೋಪ ತಳ್ಳಿಹಾಕಿದ ಅರ್ಜುನ್ ಸರ್ಜಾ        ಸ್ಯಾಂಡಲ್​ವುಡ್​​ನಲ್ಲಿ ಮೀ ಟೂ - ನಾಳೆ ಸುದ್ದಿಗೋಷ್ಠಿಯಲ್ಲಿ ಶ್ರುತಿ ಹಾಕ್ತಾರಾ ಬಾಂಬ್ - ನಟಿ ವಿರುದ್ಧ ಗುಡುಗಿದ ಅರ್ಜುನ್ ಸರ್ಜಾ ಅತ್ತೆ        ಧರ್ಮ ವಿಚಾರದಲ್ಲಿ ಡಿಕೆಶಿ ಕ್ಷಮೆಯಾಚನೆಗೆ ಸಿದ್ದು ಸಿಟ್ಟು - ಒಂದೇ ವೇದಿಯಲ್ಲಿದ್ರೂ ಮುಖ ಮುಖ ನೋಡಲಿಲ್ಲ - ಜಂಟಿ ಸುದ್ದಿಗೋಷ್ಠಿಯಲ್ಲಿ ನಾಯಕರ ಮಹಾ ಮುನಿಸು        ಜೆಡಿಎಸ್‌, ಕಾಂಗ್ರೆಸ್‌ನ ಸುದ್ದಿಗೋಷ್ಠಿ - ಕಾಂಗ್ರೆಸ್‌, ಜೆಡಿಎಸ್‌ ಜಂಟಿ ಸಮರಕ್ಕೆ ಬಿಜೆಪಿ ವ್ಯಂಗ್ಯ- ಟ್ವೀಟ್‌ ಮೂಲಕ ಟಾಂಗ್‌        ಒಂದೇ ಮನಸ್ಸು ಎರಡು ದೇಹ ಅಂದ್ರು ಸಿಎಂ - ಈ ಜನ್ಮದಲ್ಲಿ ಗೌಡ್ರು-ಸಿದ್ದು ಒಂದಾಗಲ್ಲ ಅಂದ್ರು ಕಾರಜೋಳ - ದೋಸ್ತಿಗಳಿಗೆ ಬಿಜೆಪಿ ನಾಯಕರ ಟಕ್ಕರ್        ಗದಗಿನ ತೋಂಟದಾರ್ಯ ಶ್ರೀಗಳು ಲಿಂಗೈಕ್ಯ - ಹೃದಯಾಘಾತದಿಂದ ಗದಗ್‌ನ ಖಾಸಗಿ ಆಸ್ಪತ್ರೆಯಲ್ಲಿ ವಿಧಿವಶ - ನಾಳೆ ಗದಗದಲ್ಲಿ ಅಂತ್ಯಕ್ರಿಯೆ       
Breaking News

ಅಸುರ ಹಿರಣ್ಯಾಕ್ಷನ ದುರಾಡಳಿತ

Saturday, 11.08.2018, 3:04 AM       No Comments

| ಡಾ. ಕೆ.ಎಸ್. ನಾರಾಯಣಾಚಾರ್ಯ

‘‘ಭಗವಂತನಿಂದಲೇ ಸಾಯುವುದಾದರೂ ಸರಿಯೇ!’’ ಎಂದು ವಾದಿಸಿ ದಿತಿ, ಕಶ್ಯಪನಿಂದ ಗರ್ಭ ಧರಿಸಿದಳು! ಕಶ್ಯಪ ಹೇಳಿದ! ‘‘ನಿನ್ನ ಮಕ್ಕಳಿಬ್ಬರೂ ದುಷ್ಟರಾದರೂ, ಮೊಮ್ಮಗನೊಬ್ಬ ಕುಲೋದ್ಧಾರಕನಾಗಿ, ಕುಲದೀಪನೆನಿಸುತ್ತಾನೆ.’’ ದಿತಿ, ತನ್ನ ಮಕ್ಕಳಿಗೆ ಭಗವಂತನಿಂದ ಮರಣವೆಂಬುದಕ್ಕೆ ಭೀತಿ ಹೊಂದಲಿಲ್ಲ! ಹಿಗ್ಗಿದಳು! ಅದು ದೈವಮಾಯೆ!

ದಿತಿ ಗರ್ಭ ನೂರು ವರ್ಷ ಇದ್ದಿತು! ಅದರ ದೈತ್ಯ ತೇಜಸ್ಸು ಸೂರ್ಯಚಂದ್ರರ ಕಾಂತಿಯನ್ನೇ ಮುಸುಕಿತು! ಪ್ರಸವಕಾಲದಲ್ಲಿ ಉತ್ಪಾತಗಳಾದವು. ಬೆಟ್ಟಗಳು ಅಲುಗಾಡಿದವು. ಉಲ್ಕೆಗಳು ಆಗಸದಿಂದ ಸಿಡಿದುಬಿದ್ದವು. ಬಿರುಗಾಳಿ ಬೀಸಿ ಮರಗಿಡಗಳು ಪ್ರಾಸಾದಗಳೂ ಉರುಳಿದವು. ಆಕಾಶವೆಲ್ಲ ಹಗಲಲ್ಲೇ ಕತ್ತಲಾಯಿತು. ಜಪತಪನಿಷ್ಠರಿಗೆ ಆಹ್ನಿಕಕ್ಕೆ ವೇಳೆಗಳೇ ತಿಳಿಯದಾದವು… ಮೊದಲು ಹುಟ್ಟಿದವನು ಹಿರಣ್ಯಕಶಿಪು ಎನಿಸಿದ… ಆಮೇಲಿನವನೇ ಹಿರಣ್ಯಾಕ್ಷ ಎಂದು ಖ್ಯಾತನಾದ! ಹುಟ್ಟುವಾಗಲೇ ಉಕ್ಕಿನ ಮೈಯೊಡನೆ, ಬೃಹದಾಕಾರದಲ್ಲಿ, ಅಬ್ಬರದೊಡನೆ, ಲೋಕವೇ ಹೆದರುವಂತೆ ಗರ್ಜಿಸುತ್ತಾ ಹುಟ್ಟಿದ ಮಕ್ಕಳಿಗೆ ತಂದೆಯೇ ಹಾಗೆ ನಾಮಕರಣ ಮಾಡಿದ…! ಅಣ್ಣತಮ್ಮಂದಿರಲ್ಲಿ ಲೋಕಹಿಂಸಾ ವಿಹಾರವ್ರತದಲ್ಲಿ ಪರಸ್ಪರ ಒಮ್ಮತವಿದ್ದಿತು! ಈ ಒಮ್ಮತದಿಂದ ಹಿರಣ್ಯಕಶಿಪುವು ಜಗತ್ತಿಗೇ ಅಧಿಪತಿಯಾಗಲು ಬಯಸಿದ! ತಮ್ಮ ದಿಗ್ವಿಜಯಕ್ಕೆ ಹೊರಟ! ತಮ್ಮನೆಂದರೆ ಅಣ್ಣನಿಗೆ ಬಲು ಪ್ರೀತಿ… (ಪ್ರಿಯಃ ಪ್ರೀತಿಕೃತ್ ಅನ್ವಹಂ ಎನ್ನುತ್ತಾರೆ, ಶುಕರು!) ಗದೆಯನ್ನು ಹಿಡಿದವನು ಹಿರಣ್ಯಾಕ್ಷ ದಿಗ್ವಿಜಯಕ್ಕೆ ಹೊರಟೇಬಿಟ್ಟ!

ಇಂದ್ರಲೋಕಕ್ಕೆ ಹಿರಣ್ಯಾಕ್ಷ ಬರುವ ವಾರ್ತೆಯನ್ನು ಕೇಳಿಯೇ ಇಂದ್ರ, ಪರಿವಾರದೊಡನೆ ತಲೆಮರೆಸಿಕೊಂಡ! ದೇವತೆಗಳೆಲ್ಲ ಅಂತರ್ಧಾನರಾದರು…! ಭೂಮಿಯಲ್ಲಿ ತನಗಾರೂ ಎಣೆಯಿಲ್ಲವೆಂಬ ದುರಹಂಕಾರದಿಂದ ಇವನು ದೇವಲೋಕಕ್ಕೆ ಹೋದರೆ, ಆ ದೇವತೆಗಳೂ ಹೆದರಬೇಕೆ…? ಹಿರಣ್ಯಾಕ್ಷನಿಗೆ ತನ್ನ ತೋಳಬಲವನ್ನು ಪರೀಕ್ಷಿಸಲು ಅವಕಾಶವೇ ಆಗಲಿಲ್ಲ! ಸುಲಭವಾಗಿ ಇಂದ್ರಾದಿ ಲೋಕಗಳೆಲ್ಲ ವಶವಾದವು! ತೋಳತೀಟೆಗಾಗಿ, ಅವನು ಭೂಲೋಕದ ಜನರಲ್ಲಿ ಬಲಿಷ್ಠರಾದವರನ್ನೆಲ್ಲ ನಾನಾ ರೀತಿಯಲ್ಲಿ ಪೀಡಿಸಲಾರಂಭಿಸಿದ…! ಋಷಿಮುನಿಗಳ ಬಾಯಿ ಕಟ್ಟಿದ! ಕಟ್ಟದವರನ್ನು ಸಾಮೂಹಿಕವಾಗಿ ಸುಡಿಸಿದ! ತನ್ನನ್ನು ಎಲ್ಲರೂ ಎಲ್ಲೆಲ್ಲೂ ಸ್ತುತಿಸುವಂತೆ ಆಜ್ಞೆ ಮಾಡಿದ! ಪುಂಡರ ಹಿಂಡನ್ನೆಲ್ಲ ಕಟ್ಟಿ ‘‘ಇದು ಶಾಂತಿಸ್ಥಾಪನೆಗೆ ಸೈನ್ಯ’’ ಎಂದ; ಸ್ಥಿರರಾಜ್ಯವನ್ನು, ಸರ್ಕಾರವನ್ನು, ತಾನೊಬ್ಬನೇ ಒದಗಿಸುವುದಾಗಿಯೂ, ಹೇಡಿಗಳಾದ ದೇವತೆಗಳ ಪೂಜೆಯನ್ನು ಯಾರೂ ಮಾಡತಕ್ಕದ್ದಲ್ಲವೆಂದೂ ರಾಷ್ಟ್ರದಲ್ಲಿ ಡಂಗುರ ಸಾರಿಸಿದ!

‘‘ಪ್ರಗತಿ’’ಪರವಾದ ಅನೇಕ ಯೋಜನೆಗಳನ್ನು ಹಾಕಿಕೊಂಡ; ಇವೆಲ್ಲ ಮುಂದೆ ಶಂಬರಾಸುರನ ಅರ್ಥಶಾಸ್ತ್ರ ರಚನೆಗೆ ಉಪುಯೋಗವಾಗುವಂತೆ, ದಾಖಲೆಗಳಾಗುವಂತೆ ಮಾಡಿದ! ದೇವಾಲಯಗಳು ಜನರ ವೇಳೆ, ಹಣ, ಬುದ್ಧಿಗಳನ್ನು ಹಾಳುಗೆಡವುವುದುದರಿಂದ ಅವುಗಳನ್ನು ನಾಶಪಡಿಸಲು ನಾಜೂಕಾದ ತಂತ್ರಗಳನ್ನು ರೂಪಿಸಿದ! ದೇವರೇ ಇಲ್ಲವೆಂಬುವರ ತಂಡವನ್ನು ಕಟ್ಟಿ, ಎಲ್ಲೆಲ್ಲೂ ಅದು ಈ ದೃಷ್ಟಿಕೋನವನ್ನೇ ಪ್ರಚುರಿಸುವಂತೆ ಸರ್ಕಾರದಿಂದ ಖರ್ಚು ವೆಚ್ಚಗಳನ್ನು ಕೊಡಿಸಿದ! ದೇವರು, ಧರ್ಮ, ದಯೆ, ದಾಕ್ಷಿಣ್ಯದಿಗಳು ಮೂಢನಂಬಿಕೆಗಳೆಂದೂ, ಮನಸ್ಸಿಗೆ ತೋರಿದ್ದನ್ನು ನಿರ್ಭೀತಿಯಿಂದ ಮಾಡುವ ‘‘ವೀರ’’ರು ಮಾತ್ರ ಬದುಕಿಗೆ ಅರ್ಹರೆಂಬ ಹೊಸ ಶಿಕ್ಷಣಪದ್ಧತಿಯನ್ನು ಜಾರಿಗೆ ತಂದ! ವಯಸ್ಸಾದವರು ಸಮಾಜಭಾರವಾದುದರಿಂದ ತಾವಾಗಿ ಸಾಯಲಾರದವರನ್ನು ಸಮಾಜವೇ ಕೊಂದರೆ ಎಷ್ಟೋ ಸಮಸ್ಯೆಗಳು ತೀರುವುವೆಂದು ಹೊಸ ಸಮಾಜದೃಷ್ಟಿಯನ್ನು ಎತ್ತಿ ಹಿಡಿದ!

(ಲೇಖಕರು ಬಹುಶ್ರುತ ವಿದ್ವಾಂಸರು, ಪ್ರವಚನಕಾರರು)

Leave a Reply

Your email address will not be published. Required fields are marked *

Back To Top